روچے سرگراں موریک ات
روزیگءِ بند و بست چو زیک ات
دانی مُچّ ءَ کرت و کد لِنگے
په رِپکی ایر کت چیر سِنگے
کپ کپی کت انت داناں پهک
تاں که مه رُد انت نمب ءِ تَهک
گودرے چموداں سر گوئست
موریکی کلاگ اے داب بست:
داناں مُچ کن ئے بیکاریں
لنگاں هم بَرئے ننگاریں
نئے شهد و نئے زباد آوانی
گواهی کس نداته تا انّی .
موریک چو جواب دات شِرّءَ:
واجه تو لگام دئے تِرّ ءَ
داناں مُچ کناں و لنگاں هم
توشگ اے منیگ انت دلجم
جهد ءَ گوں وتی نَزّآراں
زمستان ءَ سرجمیں نئے واراں
زباداں و تو شهد ءِ رندئے
بالاں تو روئے و هر هندئے
پُلاں و تو شهد ءِ بیل ئے
هنچو ڈنگ جنئگ په هیل ئے
وهدے سیرئے تو وهدے ژند
چکاں هم تئی رند سد رند
شهداں مُچ کن ئے شاباش انت
بلے لوگ و جه تئی هم کاش انت
شهد ءَ تئی بر انت سرزوراں
نندئے وار و چارئے موراں
موراں وتی ور انت روزیگ ءَ
نئے شهداں په تمه نئے پیگ ءَ
کریم تهل
03.09.2021