منگچر ( ہمگام نیوز) مقبوضہ بلوچستان کے علاقہ منگچر میں لاپتہ محمد فہیم بلوچ اور خادم بلوچ کی عدم بازیابی کے خلاف احتجاج تیسرے روز بھی جاری رہا ۔ مظاہرین نے شال کراچی مرکزی شاہراہ سمیت تمام لنک روڈز کو مکمل طور پر بند کر دیا ہے، جس کے باعث علاقے میں آمد و رفت معطل ہو چکی ہے اور شہریوں کو شدید مشکلات کا سامنا ہے۔
مظاہرین کا کہنا ہے اس سے پہلے دو روزہ ہڑتال کے دوران انتظامیہ نے مظاہرین سے مذاکرات کیے، مگر بعد میں اپنے کیے گئے وعدوں سے مکر گئی۔
لواحقین اور قبائلی عمائدین کا کہنا ہے کہ اب تک لاپتہ افراد کی بازیابی کے لیے کوئی عملی قدم نہیں اٹھایا گیا، اور نہ ہی ضلعی یا تحصیل انتظامیہ کی جانب سے کوئی نمائندہ مذاکرات کے لیے آیا ہے۔
احتجاج مزید شدت اختیار کر گیا ہے، اور مظاہرین کا کہنا ہے کہ جب تک لاپتہ افراد بازیاب نہیں ہوتے، دھرنا جاری رہے گا۔ دوسری جانب شاہراہ بند ہونے کے باعث مسافروں، ٹرانسپورٹرز اور مقامی افراد کو شدید پریشانی کا سامنا ہے۔
