لندن (ھمگام بلوچی) بلوچ راجی رھشون ءُ آجوئی بلوچستان جنز (ایف بی ایم) ءِ بنجاھی کماش واجہ ھیربیار مری ءَ یک گلگدارے گْوں انڈیا نریٹیو ءَ کرتگ کہ اِے گلگدار بلوچی ءَ رجانک کنگ بوتگ۔
واجہ ھیربیار مری آجوئی بلوچستان جنز (ایف بی ایم ) بنجاھی کماش اِنت، کہ آ پاکستان ءَ چہ بلوچ راج ءِ آجوئی ءِ جُنز ءِ جھگیری ءَ کنگ ءَ اِنت، ھیربیار مری ءِ سیادی گْوں بلوچ راجدوستیں رھشون ءُ مری تمن ءَ اِنت کہ آ بندات ءَ پاکستان ءِ راجکاری ءِ تھر ءَ ھوار اِت اَنت۔ وھدے کہ پاکستان ءَ گْوں بلوچ راج ءَ دوپوستیں مُلکاری ءِ لیب بندات کرت ءُ پاکستانی لشکر ءَ تمنی ربیت ءِ نزور کنگ ءِ جھد کرت، گُڑا چہ ایشی ءَ اِے تمن ءِ تہ ءَ دَگہ ورگ ءُ مایوسی ءِ مارشت ودی بوت۔ ھیر بیار مری ءِ پِس ءُ نامداریں بلوچ راجی رھشون واجہ ھیر بکش مری ءَ بلوچستان ءِ تہ ءَ گچین کاری ءَ مدام باج برت۔ وتی راج ءُ وتی ملک ءِ اُلسان ءِ بھر اَت۔ 70 ءِ دھک ءَ وھدے زُلپکار الی بُٹو مزن وزیر جْوڑ بوت گُڑا آئی ءَ مھکمیں راجی رھشوناناں چہ بلوچ راجکاری ءَ گِستہ کنگ ءِ کوشست کرت۔ بُٹّو ءَ را یک جوانیں مْوھے ھما وھد ءَ رس اِت وھدے اناگت ءَ چہ اسلام آباد ءَ اِراکی سپارتھانہ ءِ تہ ءَ آئی ءَ را سِلاہ دست کپت اَنت گُڑا چہ ایشی ءَ بلوچ سروک ایشی ءِ انگیر ءَ اھت اِنت۔ بلوچستان ءِ اسمبلی ھلاس کنگ بوت، بلوچ راجی سروکاں ھوار 8000 – 5000 ءِ کساس ءَ بلوچ نودربر ءُ باسک ئِے دستگیر کرت ءُ زنداناں بندیگ کرت اَنت۔ پاکستان ءِ اُلسانیں راجکاری ءِ تہ ءَ جنرل زیاالھک ءَ اکتدار ءِ سر ءَ کبزہ کرت ءُ بُٹّو ءَ را زندانیگ کرت۔ جنرل ءَ یکیں وھد ءَ واجہ ھیربکش مری ءَ ھوار دگہ بازیں بلوچ رھشوناناں چہ زندان ءَ آجو کرت ءُ آیاناں گْوشت ئِے کہ گْوں اسلام آباد ءَ شورہ سلاہ بہ کن اِت، بلے راجی رھشون واجہ ھیربکش مری ءَ پاکستان یلہ کرت ءُ اوگانستان ءِ روگ ءِ پیسلہ کرت۔
انڈیا نریٹیو: تو بازیں ملکاں بوتگ ئے، مارا وتی درملکیں زندمانی ءِ بابت ءَ سرپدی کمّیں بہ دے؟
ھیربیارمری: یک رندے وھدے کہ منی پِس 1978 ءَ چہ زندان ءَ آجو بوت گُڑا چْو پاکستان ءِ آدگہ گْوست ءِ لشکری کارندہ ءُ راجکاری سروکانی پیم ءَ جنرل زیا الھک ءَ مارا سَلاہ کنگ ءِ گْوشت، بلے منی واجھیں پِسّ ءَ اوگانستان ءِ روگ ءِ پیسلہ کرت، آئی ءَ پرانس ءُ برتانیہ ءَ ھم سپَر کرتگ۔
اِے یک ابرمی گپّے اَت کہ ما ھم گْوں آئی ءَ دیم پہ اوگانستان ءَ شُت اَیں، آھود ءَ ما بازیں چیزے دیست، تاں چُنت وھد ءَ کہ ما اوگانستان ءَ اِت اَیں، جنگ اَت، سوویت یونین ءِ لشکر ءَ اوگانستان ءِ تہ ءَ دور کرتگ اَت، ما کسان اَت اَیں بلے ما سرپد اِت اَیں، پرچے کہ ما ھم بلوچستان ءِ تہ ءَ تیرانی آماچ بوتگیں لس مھلوک ءِ چارگ ءَ ھیل اِت اَیں۔ مئے گس ءِ تہ ءَ پہ اِے پیمیں (زدگیں) مردمانی واست ءَ کوٹی ھست اَت، مئے گِس اِے وڑیں بازیں مھمان ھم اھتگ ءُ گْوشتگ اِش کہ ”مئے واست ءَ دوا بہ کن اِت کہ ما دراھجان بہ بہ اَیں۔“ پمیشکہ اوگانستان ءِ روگ ءَ پیسر ما سرپد ات اَیں کہ جنگ چے ءَ را گْوش اَنت۔ ھمے زوتاں من ءَ ءُ منی برات ءَ را وانگ ءِ واست ءَ ماسکو ءَ راہ اِش دات۔ بلے ما اوگانستان ءُ بلوچستان ءَ شُت ءُ اھت اَیں۔ بازیں انچیں کار دیم کپتگ کہ من یک کسانسالیں چُکّے ءِ بِستار ءَ ھِچ سرپد نہ بوتگ آں کہ چے بوگ ءَ اِنت۔ منی برات ءَ چہ گِس ءَ آرت زرتگ ءُ دگّ ءِ نزّیک ءَ برتگ، من اِے جْیڑ اِتگ کہ آ پرچے آرتاناں روڑ ءِ نزیک ءَ دور دیگ ءَ اِنت۔ بلے پد ءَ رَند ءَ من سرپد بوتگ آں کہ اِے آرتاں بلوچ ”سرمچار“ شپ ءِ تہ ءَ چست کنگ ءُ برگ ءَ اَنت۔
کابل ءِ تہ ءَ مئے لوگ سپارتی الاکھے ءَ یو این ءِ کارگس ءُ سپارتھانہ آنی نزیک ءَ بوتگ۔ اوگانستان ءِ تہ ءَ روس ءِ ساڑی بوگ ءَ ما مدام تپنگ ءِ تیرانی توار اِشکرتگ۔ راکٹ مئے لوگ ءِ 5-8 میل ءِ دوری ءَ کپتگ اَنت کہ آ چہ بادشاہ ءِ مِھل ءَ دور نہ بوتگ۔ برے برے مئے پھازوک ھم چہ تیرگواری ءُ اُرشانی سوب ءَ جنگ بوتگ اَنت۔ ما چہ جاپان ءِ سپارتھانہ ءَ نزّیک بوتگ اَنت ءُ آھود ءَ یک ھورکیں زمین ءِ ٹُکّرے بوتگ بلے ما رکّ اِتگ اَنت۔
ایشی ءَ پد اوگانستان ءِ گھگیری وزیر جنرل تنائی کہ آ اوگان راجی لشکر ءِ سروک اَت، کابل ءِ سر ءَ اُرش ئِے بندات کرت، مئے لوگ ءَ را ھم نشانگ ءِ آماچ ئِے کرت۔
مُردنی گرابانی بالگراں مئے گِس ءَ را نہ زانتگ ءُ باچاھان ءِ گِس ءِ سر ءَ اُرش اِش کرتگ، منی ھیال ءَ جنرل تنائی ءَ ھمے جْیڑ اِتگ کہ آ مئے سر ءَ وھدے اُرش کنت گُڑا چہ اِیشی ءَ پاکستان ءِ تہ ءَ آئی ءَ را دل ءِ جُھلانکی ءَ وش اَتک کن اَنت۔ یک رندے اوگانستان ءِ کماش نجیب اللّہ ءَ وتی گْوشتانک ءِ تہ ءَ گْوشتگ کہ ”جنرل تنائی ءَ وتی واجھانی وش کنگ ءِ ھاتر ءَ مئے لوگ ئِے اُرش کرتگ۔“
گُڈسر ءَ جنرل تنائی چہ اوگانستان ءَ تچ اِیت ءُ پاکستان ءَ کیت۔
منی اُمر شانزدہ سال اَت من اوگانستان ءِ ھند ھِلمند ءَ شُت آں، راجدپتری بنیات ءَ اِے جاہ بلوچ ءِ سرڈگار اِنت، اوگانستان ءِ سرکار ھم اِے گپ ءَ من اِیت۔ آھود ءَ من وتی لس مھلوک ءِ بزّگی ءُ واری دیست، نادراھی ءِ ویل ءَ جاہ جتگ اَت، بازیں گْونڈویں چُک نادراہ اِت اَنت ءُ چہ آسراتی ءِ نہ بوگ ءَ مرگ ءِ آماچ اِت اَنت۔ اوگانی وتی کوپگاں چہ جنگ ءَ اِت اَنت، بلے آیاں کجام کساس ءَ تاں کمک کرت اِش کرت، مارا کمک اِش کرت، من آیانی اھسانمند اوں۔ اِے پہ بلوچ راج ءَ نہ گیگیں جاور اِت اَنت۔
من بازیں وھدے ماسکو ءُ ھلمند ہ میان گْوازینت، اے وھد ءَ من برے برے تواری ءَ بلوچستان ءَ ھم اتکگ آں، تُرسناکی ابید ھم اِے گران نہ اَت، پرچے کہ سیمسرانی دویں نیمگ ءَ بلوچ جاھمنند اَنت۔ من ماسکو اسٹیٹ مزن شھدربرجاہ ءَ من تاکّاری (صحافت) ءِ وانگ 1990 ءَ دربرتگ، منی برات ھم ماسکو ءِ مزن شھدربرجاہ ءَ وانگ ءَ اَت۔
من وتی وانگ ءِ سرجم کنگ ءَ چہ پد وتی کھول ءَ گْوں یک مواھدھے کرتگ اَت کہ من چے کہ کن اِیں من آ کار ءِ کنگ ءَ آجو آں، من بلوچستان ءَ واتر آیگ ءِ پیسلہ کرتگ۔
اوگانستان ءِ تہ ءَ ما مجاھدین ءُ روسی آنی میان ءَ پَس اِت ایں کہ مئے سر ءَ راکٹ گْواری کنگ ءَ اِت اَنت، مئے یک نیمگے ءَ مجاھدین ءُ دریا اَت، دومی نیمگ ءَ روسی ءُ بالی پَٹ اَت۔ دویں یکے دومی سر ءَ راکٹ گواری کنگ ءَ اِت اَنت، ایشانی میان ءَ ما جاھمنند ات اَنت۔ کدی کدی راکٹ گواری ءِ ردیں نشانگ ءَ بازیں بے میاریں بلوچ جنَگ بوت اَنت۔
چہ مستریں تاگتور بوگ ءِ سوب ءَ روس ءَ بازیں راکٹ گواری کرت، بالی گراپ یک درچ ءَ نندگ ءُ بال کنگ ءَ اِت انت، سِلاہ آرگ ءَ اِنت اَنت، ایشی ءَ چہ من ءَ اندازہ بوت کہ مستریں تاگت ور بوگ چے یے۔ روسیاں بازیں گولہ، تراک، ءُ راکٹ چگل دات اَنت پرچے کہ ایشانی اسر ھلاس بوتگ اَت یاںکہ آ ھراب اِت اَنت۔ اِے گولہ، راکٹ چو کْوہ ءِ پیم ءَ مُچ اِت اَنت، بلے وھدے مئے لس مھلوک (بلوچ) کہ آھود ءَ شُت اَنت، راکٹ اِش زرت ءُ آس اِش دات گُڑا راکٹ ءَ جوان کار کرت، مئے واست ءَ اے سِلاہ پائدگ مند بوت اَنت۔
اندین نریٹیو: تو بلوچستان ءِ تہ ءَ وزیر اَت ئے، آھود ءَ تئی تجربگ چے اَت، ھکومت پاکستان ءِ گْون ءَ ایشی ءِ چے آسر در اھت ؟
ھیربیارمری: گچین کاری ءِ درگت ءَ منی ھوار بوگ ءِ بابت ءَ مئے گس ءَ باز باوست بوتگ، من ایشی ءَ گْوں دیم ءَ جنزگ ءِ پیسلہ کرت، پرچے کہ من سرپد اِت آں کہ من پہ بلوچ راج ءَ لھتیں جوانیں کار کرت کن اِیں، ھمے پیم ءَ من کنسٹرکشن ءُ کارانی (CNW) وزیر جوڑ بوت آں، من ھمے پھم اِت کہ اِے تیوگیں ربیت مردمانی سلکار جوڑ کنگ ءِ کارجاہ اِنت۔ بلوچستان ءِ تہ ءَ زمین جمب ءَ چہ پد جاپان ءِ سرکار ءَ مئے کمک کنگ ءِ گپ جت گُڑا اسلام آباد ءِ سرکار ءَ گْوشت کہ من جاپان ءِ نیمگ ءَ کرتگیں کمک ءِ وت بندوبست ءَ کن اِیں، درملکی کمک ءِ پانگی ءَ من وت کن اِیں، بلوچستان ءِ سرکار ءَ را اِے درگت ءَ ھچ گپ کنگی نہ اِنت۔ ما ھمے جْیڑگ ءَ اِت اَیں کہ ما پارلیمنٹ ءَ ھوار بہ اَیں ءُ لس مھلوک ءِ واست ءَ چیزے کن اَیں بلے من ءَ زوت اھساس بوت کہ اِے پیم ءَ کار نہ بیت۔ بلوچ رھشون ءُ اسلام آباد ءِ میان ءَ بے نبشتانکی مواھدہ ایش اَت کہ شُما (بلوچ رھشون) وت سلکار جوڑ بہ بہ اِت، بلے پہ لس مھلوک ءَ ھچ کار مہ کن اِت۔ مارا اِے گپ کبول نہ اَت، مارا پاکستانی لشکر ءِ مراگشانی ءُ آدگہ دیواناں ھوار بوگ ءِ لوٹگ نامہ اِش دیم داتگ تاںکہ اِے مئے ھمکوپگ بہ بنت، ھمے پیم ءَ پنجاپ ءِ تہ ءَ مارا پاکستانی لشکر ءُ راجکارانی دست ءِ لیبوک جوڑ کنگ ءِ کوشست اِش کرت۔ یک رَندے من یک یک آرمی جنرلے ءَ گْوشت کہ آ بلوچستان ءِ تہ ءِ ”کرار“ بے توار بوؤکاناں چہ ”پرار“ جنگولاں رکین اِیت۔ من جنرل ءَ را گْوشت کہ من اسل ءَ یک ”پرارے“ آں، من یک جنگولے آں، نہ کہ کرار-بے توارے۔
انڈیا نریٹیو: پاکستانی ءِ ھستیں ریاست سک ءِ باز نزور اِنت، بلوچ جُھد ءِ سر ءَ چونیں سانے دور دات کرت کنت ؟ اِے یک ریاستے ءِ آجوئی ءِ واست ءَ تئی ارادہ مھکم کنت ؟
ھیربیارمری: اگاں دژمن نزور اِنت گُڑا بلوچستان ءِ تہ ءَ ایشی ءِ جوانیں اسرے دیم ءَ کیت۔ چہ مکُران ءَ ابید کہ آ جاہ ءَ چین زر ھرچ کنگ ءَ اِنت بلے پاکستان بلوچستان ءِ آدگہ جاھاں باز نِزور اِنت، پاکستان ءِ لشکر ءَ مری ءُ آ دگہ تمنی الاکھانی تہ ءَ پروش وارتگ۔ 50 – 40 لشکری بنجل بوتگ اَنت کہ آیاناں پاکستانی لشکر ءَ پہ آ دگہ جاھانی واست ءَ ھالی کرتگ اَنت۔ کْوھانی تہ ءَ بُنجلانی جْوڑ کنگ ءُ نندگ آئی ءِ واست ءَ باز مشکل اِنت، چہ بلوچ سرمچاراں پاکستانی لشکر ءَ را باز ھترہ اِنت۔ مئے براس ھر روچ وتی جاناں ندر کنگ ءَ اَنت۔ ھر روچ لس مھلوک چست کنگ ءُ بیگواہ کنگ بوگ ءَ اِنت لٹ ءُ کٹ کنگ بوگ ءَ اِنت، آیانی ژانگولیں جْون چگل دیگ بوگ ءَ اَنت۔ ما مدام جْیڑ اِتگ کہ انڈیا مارا کُمک کنت بلے اِے یک واھشتداریں سوچے بوتگ، انڈیا ءَ بلوچ لس مھلوک ءِ جْیڑھاناں کدی نہ پھم اِتگ، مزن وزیر نریندر مودی ءِ نیمگ ءَ چہ لال کِلّہ ءِ تہ ءَ بلوچستان ءِ بابت ءَ گپ کنگ ءَ پد پاکستان ءِ لشکری کارمنداں بازیں بلوچ شپانک، لس مھلوک جتگ ءُ کشتگ کہ آ انڈیا ءِ چاریگ اَنت، من اِے گپ ءَ ھم زان اِیں کہ انڈیا ءَ وتی بگیریں پاکستان ءُ چین ءِ بابت ءَ ردیں اندازہ جتگ۔
انڈیا نریٹیو: بلوچانی سر ءَ اوگان جنگ ءِ چونیں سان کپتگ؟
ھیربیارمری: اوگان نیکراھی اَنت بلے ریڈیکل نہ اَنت۔ وھدے دگنیا ءَ پاکستان ءُ اوگانستان ءِ تہ ءَ سلاہ دیم دات اَنت، مدرسہ جْوڑ کنگ بوت اَنت۔ پاکستان ءَ اِے سلاھاناں اوگانستان ءَ برگ ءِ ھاتر ءَ چہ بلوچستان ءِ تہ ءَ جتا جتائیں راہ کارمرز کرتگ، بلے بلوچ چو آدگہ راجانی پیم ریڈیکل نہ بوت اَنت۔
چہ بندات ءَ ڈالر ءُ سلاھاں بلوچ لس مھلوک ءَ را مَٹ کرت نہ کرت، ایوک ءَ پاکستان 20 سال اِنت کہ لھتیں بلوچ ئِے ریڈیکل جوڑ کنگ ءَ سوبمند بوتگ 1992 ءَ وھسے کہ من چہ ماسکو ءَ اوگانستان ءَ اھت آں ءُ پد ءَ بلوچستان ءَ اھت آں، گُڑا من روتاک ءَ ھمے ونت کہ بلوچ ورنایاناں انڈیا ءِ سیمسراں دیم دیگ ءَ اَنت، چہ کرناں من دیست کہ بلوچ ورنا کشمیر ءِ تہ ءَ جنگ بوگ ءَ اَنت۔ من جْیڑ اِت کہ وھدے ما وتی آجوئی ءَ جنگ ءَ کنگ ءَ اِت اَنت تو اِد ءَ مئے ورنا پہ دگہ یکے ءَ جنگ کنگ ءَ اَنت۔ پاکستان چہ یک سنگے ءَ دو مرگ شکار کنگ ءَ اَت، بلوچاناں کشمیر دیم بہ دے اِیں تاکہ آھود ءَ ھندستانیاں بہ جن اِیں، ھمے پیم ءَ ھندستانی جنگ بہ بنت یاںکہ بلوچ۔ پد ءَ اے بابت ءَ ما گْوں وتی ورنایاں گپ ءُ باوست بندات کرت، 2000 ءِ سال ءَ پد بلوچ ورنایاں کشمیر ءِ روگ بند کرت۔ پرچے کہ آیاں زانت کہ آیاناں وتی گس ءِ تہ ءَ جنگ کنگی اِنت۔ من سرجمیں اوگان ءِ جنگ ءَ یک درونتے ءِ ھساب ءَ چار اِیں ءُ روبرکتی آنی دوپوستی ایشی ءِ یک مزنیں دروَرے۔
یک رندے وھدے روبرکتی آنی بنیات پرستاں اِے مردمانی کمک کنگ بند کرت، اِے مَٹ بوت اَنت پد ءَ ھمیشانی جِند ءِ سر ءَ اُرش اِش بندات کرت۔ نوں پاکستان ھمے پیم ءَ بلوچاناں ھم بنیات پرست جْوڑ کنگ ءِ جھد ءَ کنگ ءَ اِنت، چُشکہ بلوچ ءِ انتہا پسند بوگ پاکستان ءَ را مئے بگیری ءَ جنگ کنگ ءِ ءُ روبرکتی آنی (مغرب) کمک ءِ یک بلاھیں موھے رس اِیت۔ میان استمانی راج اے وڑیں مردمانی جْیڑہ ءُ اڑ ءُ جنجالاں ڈالچار کن اَنت تاں وھدے کہ آ بنیات پرست جوڑ بہ اَنت ءُ آیانی واست ءَ ھترہ جوڑ بہ اَنت۔ وھدے کہ جْیڑہ ودان کن اَنت گُڑا آ ایشی ءَ را گیش چہ لَٹ ءُ کُٹ ءِ وسیلہ ءَ گیش ءُ گیوار کنگ ءِ جھد ءَ کن اَنت۔
انڈیا نریٹیو: پاکستان ءَ درملکی زرکارانی واست ءَ بلوچستان ءِ تہ ءَ یک مزنیں زرکاری (سرمایہ کاری) ءِ اھد کرتگ، تو ایشی ءَ کجام چم ءَ چار ئے ؟
ھیربیارمری: من ایشی ءَ را وتی راج بگیری ءَ یک مزنیں زوراکی یے سرپد بہ اَیں، بلے من ایشی ءَ را سوبمند بوگ ءَ ھم گندگ ءَ نہ آں، بازیں مسلمانیں راج اِے سرپد بہ اَنت کہ اسلام ءِ سوب ءَ پاکستان ءَ را کمک کنگ ءَ اَنت۔ اگاں اِے یک راستی یے گُڑا آ پرچے اسلام ءِ بنیات ءَ مئے کمک ءَ نہ کن اَنت۔ منی ھیال ءَ پاکستان چہ روکپتی ملکاں دُزّی ءَ پد ھم گْوں چین ءَ ھمکوپگ بیت۔ پرچے کہ آ زانت کہ اسلام آباد ءُ بیجنگ ءِ دویں پھناتاں دوینانی دژمن ساڑی اِنت بزاں انڈیا۔
دومی نیمگ ءَ کجام وھد ءَ کہ وھدے انڈیا پاد کیت گُڑا روکپتی ملکاناں آئی ءِ کمک کنگ ءِ امکان بیت۔
انڈیا نریٹیو: پاکستان ءِ تہ ءَ جاور سگ نہ گیگ اَنت، اگاں پَٹان چہ گوریچاناں پاکستانی لشکر ءِ بگیری ءَ پاد کاینت، گُڑا تو چے سرپد بہ ئے کہ اِے وھد ءَ بلوچ آجوئی دوست چہ اِے موہ ءَ نپ چست نہ کن اَنت ؟ ایشی ءَ ابید چہ اِے گامگیج ءِ بگیری ءَ تو ھلیجی ملکانی گامگیج ءَ چوں چار ئے ؟
ھیربیارمری: گْوستگیں 7 دھک اِنت کہ ما وتی مکسد ءِ ھاسل کنگ ءِ ھاتر ءَ اِے ہیمیں ھِچ وڑیں موہ یلہ نہ داتگ، مئے لوٹ آجوئی اِنت، من یک گپّے زان اِیں کہ کجام وھد ءَ ما آجو بوت اَنت گُڑا تیوگیں ھلیجی ملک مئے کمک کنگ ءَ ساڑی بہ اَنت۔ وھدے کہ آ گِند اَنت کہ پاکستان ءَ را زندگ بوگ ءِ ھِچ وڑ ءُ پیم نیست تو ارب دگنیا ءِ تہ ءَ بازیں ملکے مارا کمک کنت۔ بلے من اِے گپ ءَ زان اِیں کہ پیم (آجو) بوگ ءَ پیسر بازیں روبرکتی ملک مارا منّ اَنت۔ بلے اِے ھد ءَ تاں ما چین ءِ سر ءَ اُرش نہ کن اَنت ما گْوں چین ءَ ھما وھد ءَ گپ ءُ تران کن اَنت وھدے کہ آ مارا مئے پجّار ءُ شَرپ ءَ دنت۔ بیجنگ ءَ را بلوچاناں آیانی سرڈگار ءِ واھند سرپد بوگی اِنت ءُ آئی ءَ را مئے سرڈگار ءِ بابت ءَ گْوں ایران ءُ پاکستان ءَ گپ ءُ تران بند کنگی اِنت، ما میان استمانی ملکاں گْوں گپ کن اَنت ابید چہ پاکستان ءُ ایران ءَ۔ گْوں ایشاں ما بلوچستان ءِ آجوئی ءِ بابت ءَ گپ کن اَنت۔ یکبرے وھدے کہ ما آجو بوت اَنت گُڑا ما گْوں ایشاں ھمساھگی ءِ بنیات ءَ گپ ءُ تران کن اَنت۔
انڈیا نریٹیو: تو چمشانکے دات کرت کن ئے کہ آجوئیں بلوچستان چے پیم بیت ؟
ھیربیارمری: ما دگرانی سرڈگار ءَ کبزہ نہ کن اَنت بلے ما وتی سرڈگار ءَ کدی ھم یلہ نہ کن اَنت۔ انگریزاں بلوچستان ءِ چھرگ مَٹ کرت، پٹانانی الاکہ بلوچستان ءِ تہ ءَ ھوار ءَ کرت اَنت، چُشکہ شال ءِ گوریچانی نیمگ ءَ پٹان یاںکہ اوگانی آنی زمین انت، اِے سرڈگار ءِ سر ءَ مئے ھِچ وڑیں اگبال نیست، بلوچ آ جاہ ءَ ھمے پیم نشتگ اَنت انچش کہ بلوچستان ءِ تہ ءَ پٹان جاھمنند اَنت۔ ھلمند ءُ نمروز بلوچ سرڈگار ءِ بھر اَنت،بلے انگریز ءَ اے ڈیورنڈ لکیر ءِ بنیات ءَ اِے سرڈگار ءَ اوگانستان ءَ را داتگ اَنت، کہ اِے لکیر بلوچ ءُ اوگانی آنی رزا ءُ منشا ءَ ابید کشّگ بوتگ، ما اے الاکہ ءِ کِرّ ءُ گْور ءِ مردماناں وتی دوست پھم اَنت۔ مئے گْوں تالباناں ھچ جْیڑہ نیست، مئے ھیال ءَ تالبان وتی پیم ءَ اسلام ءِ تبلیگ ءَ کن اَنت ءُ ما وتی پیم ءَ۔ گُزرانکی بنیات ءَ ما وتسر اَنت، مئے کِرّ ءَ مری ءِ الاکھانی ءُ کلات ءِ نزیک ءَ کرب ڈالرانی کساس ءَ گیس ھست اِنت۔ مئے کِرّ ءِ سُھر ءِ یک مزنیں ھمبارے ھست، مئے کِرّ ءَ پٹرول ھم ھمینچو ھست انچشکہ سئودی ارب ءِ کرّ ءَ ھست۔ مئے کِر ءَ پنجاپ ءِ سیمسر ءِ نزّیک ءَ یورینیم ھست۔ مستریں گپ ایش اِنت کہ ما بے تیاب (لینڈ لاک) نہ اَیں، مئے کِرّ ءَ دریا ھست ءُ دریا ءِ وسیلہ ءَ دُگنیا ھست۔ یک آجوئیں بلوچستان ءِ دروشم ءَ بھارت یاںکہ آ دگہ ملکاناں اوگانستان واست ءَ راہ ءُ کِشک ھست۔ ما بیوپاری (تجارت) ءِ واست ءَ تیار اَیں ءُ ما رواداریں مردم اَیں۔