اسلآم آباد(ہمگام نیوزڈیسک) پاکستان کے ناگفتہ سیاسی و معاشی حالات میں پیمرا نے 3 بڑے ٹی وی چینلز پر غیر معینہ مدت کیلئے پابندی عائد کردی۔ نجی نیوز ٹی وی چینلز 24 نیوز، کیپیٹل ٹی وی اور اب تک کی ٹرانسمیشن فوری طور پر بند کر دی گئی۔ تفصیلات کے مطابق پاکستانی الیکٹرانک میڈیا ریگولیٹری اتھارٹی پیمرا نے پاکستان کے تین بڑے ٹی وی چینلز کی نشریات پر غیر معینہ مدت کی پابندی عائد کرتے ہوئے پاکستان بھر میں ان کی نشریات فوری طور بند کروا دی ہے۔
بتایا گیا ہے کہ نجی نیوز ٹی وی چینلز 24 نیوز، کیپیٹل ٹی وی اور اب تک کی جانب سے پیمرا کے قوانین کی خلاف ورزی کا الزام لگایا گیا ہے، جس کے بعد ان چینلز کی نشریات پر پابندی عائد کرنے کا فیصلہ کیا گیا۔ ان تینوں ٹی وی چینلز کی انتظامیہ کی جانب سے دعویٰ کیا جا رہا ہے پاکستان بھر کے کیبل نیٹ ورکس پر ان کے چینلز غائب کر دیے گئے ہیں۔
پاکستان بھر میں ان چینلز کی نشریات بند کر دی گئی ہے۔
2 روز قبل پیمرا نے پاکستان مسلم لیگ ن کی نائب صدر مریم نواز کی پریس کانفرنس نشر کرنے والے نیوزچینلز کو نوٹس جاری کیے تھے۔ پیمرا کے ترجمان نے الزام لگایا تھا کہ مریم نواز نے عدلیہ اور ریاستی اداروں کے خلاف پریس کانفرنس کی جسے براہ راست نشر کرنا قوانین کی خلاف ورزی ہے۔سماجی رابطے کی ویب سائیٹ ٹوئٹر پر پیمرا نے اپنے پیغام میں کہا ہے کہ مریم نواز کی پریس کانفرنس براہ راست نشر کرنے والے ٹی وی چینلز کو نوٹسز جاری کردیے گئے ہیں، مختلف نیوز چینلز نے مریم نواز کی عدلیہ اور پاکستان کے ریاستی اداروں کیخلاف پریس کانفرنس براہ راست دکھائی جو قانون کی خلاف ورزی ہے۔اب پیمرا نے اپنے جاری کردہ نوٹس کے بعد ایکشن بھی لے لیا ہے۔ جبکہ بتایا جا رہا ہے کہ پیمرا نے اپنے قوانین پر سخت سے علمدرآمد کروانا شروع کر دیا ہے۔ اس لیے پیمرا قوانین کی خلاف ورزی کرنے والے مزید چینلز بھی پابندی کا شکار کیئے جا سکتے ہیں۔
— Report PEMRA (@reportpemra) July 6, 2019
