نبشتانک ۔ ڈاکٹر تاج بریسگ
ھمگام بلوچی
چو بلوچی ئ وڑا، کردی ھم گون الفبا ئ جنجالا گر او چیل انت۔ شمالی کردی (ترکیہ) گون رومن ئا نبیسگ بئیگا انت او جنوبی کردی (عراق، ایران) گون عربیک اسکرپٹ ئا۔ ادا، مئے بنگپ، عربی الفبا ئ سرا ایرانت۔ ھنچو کہ اشارہ کنگ بیت، جنوبی کردستان ئا عربی رسم الخط کارمرز بئیگا انت۔ رسم الخط ئ سیستم وا عربی انت، بلئے کامرزی ئ رھبند مختلف۔ ایرانی کردستان ئا، کردی زبان، گیشتر گون پرسو-عربیک، بزان چو فارسی ئا نبیسّگ بیت۔ عراقی کردستان ئا البتہ، عربی الفبا ئ سیستم ئ اندرا، بازین بدل او سدلی آرگ بیتگ۔
راستر گشگ بہ بیت، یک نوکین الفباے، چہ پرسو۔عربیک الفبائی سیستم ئ ٹگلینگ ئا جوان کنگ بیتگ۔ مان اے اسکرپٹ ئا، تواردارین حروف (vowels) گیشتر گون رومن الفبائی سیستم ئا نزیک انت او بے توارین حروف (consonants) گون عربی ئا۔ کردی اسکرپٹ چہ ۲۹ بیتوارین او ھشت تواردارین حرفان جوڑ کنگ بیتگ۔ رسم الخط ئا، گون تواردار او بیتوارین حرفانی نوکین رد او بندا، کردی زبان گپتاری او نبشتاری پرک او پیر کم کتگ انت، بلئے، دگہ دیمے، زبان ئ صرف او نحو او گرامری گستاہی باز گیش۔
زانگ لوٹیت کہ رومن او عربی الفبائی سیستم دو جتائین نبیشتانکی رھبند انت۔ عربی رسم الخط، گیشتر صامت نگاری ئ (بیتوارین حرفانی) الفبا زانگ بیت۔ بزان، نبیشتانک ئ اصلیئن بوج، بیتوارین حرفانی سرا ایر انت۔ بلئے، رومن اسکرپٹ ئ نبیشتانک ئ واناکی، مان تواردارین حرفانی سرا تکو انت۔ اگن ھیرتتر چارگ بہ بیت، ھنچو گندگ بیت کہ نوکین کردی اسکرپٹ، مان ھمے دوئین الفبائی سیستمانی اندرا مانگیشتگ۔ تقریبان، اسکرپٹ ئ توامین سرینوکین حرفان (اعراب)، چو بے توارین حرفانی پیما، لبزانی اندرا نبیسگ بنت۔
اسکرپٹ ئ ھشتین تواردارین حرفان، گون بیتوارین حرفان ھمرد کنگ بیتگ انت۔ مان کردی ئا سرینوکین حرفان چو کہ چیرا گندگ بنت، نبیسگ بئیگا انت۔
۱۔ زبر: (فتحہ) ئ بدلا “ہ” ئ علامت (حرف) کار مرز کنگ بیت۔ چو کہ “سر” نبیسگ بیت “سہ ر”۔
۲۔ زیر: (کسرہ) ئ بدلا “ئ” ئ حرف زیرگ بیتگ۔ چو کہ حساب نبیسگ بیت “حیساب” یاکہ کتاب بیت “کیتاب”۔
۳ : پیش: (ضمہ) ئ بدلا “و” حرف زیرگ بیتگ۔ چو کہ “کرد” نبیسگ بیت “کورد”۔
۴ ۔ ھمے وڑا، دراجکشین تواردارین حرفان ھم ٹگلینگ او نوکین استانداردے دئیگ بیتگ انت۔ پہ درور، دراجکشین “و” ئ بدلا دو “وو” ایر کنگ بیتگ۔ چو کہ “دور” بیت “دوور”۔
۵ ۔ “و” بزان کہ انگریزی او (O) نبیسگ بیت “و”۔ چو کہ “زور” او یا کہ “روچ”۔
۶ ۔ مزنین “ے” نبیسگ بیت “ی”۔ چو کہ “دی” (دہ) یا کہ “ری” (راہ)۔
۷ ۔ شدّ ( ّ) ئ بدلا حرف ئ جرند دو رندا (دو برا) نبیسگ بیت۔ چو کہ “ملّت” نبیسگ بیت “میللہ ت” یا کہ “علّت” نبیسگ بیت “عیللہ ت”۔
۸ ۔ ھمزہ (ئ): چو بلوچی زبان ئا، ھمزہ کاربرد مان کردی اسکرپٹ ئا باز مھم انت۔ لبز، الف (آ) ئ بدل ئا مدام گون ھمزہ ئا بندات بنت۔ گون بیتوارین حرفان ھم ھمزہ بدینگ بیت۔ چو کہ “آزاد” نبیسگ بیت “ئازاد”، “ایران” نبیسگ بیت “ئیران”، ھمے وڑا “اسب” نبیسگ بیت “ئہ سب” او یا کہ “انسان” نبیسگ بیت “ئینسان”۔
دگہ مھمین نکتہے ایش انت کہ چو سید ھاشمی ئ املائی لیکہ ئا، عربی ئ حروف “ث”، “ذ”، “ص”، “ض”، “ط”، “ظ” ھم چہ الفبا ئی سیستم ئا سندگ او دور کنگ بیتگ انت۔
زانگ لوٹیت، چو بلوچی ئ وڑا، نوکین کردی رسم الخط ئ تاریخ، ۱۹۵۰ ئ دھک ئا بندات بیت۔ بلئے، دان انگت ھم خاصین نامانی املائی مسئلہ، توجیل کنگ نہ بیتگ۔ دری نام، خاصکن عربی نامان، استثنائات (exceptions) گشگ بنت۔ البتہ، عامین وامگالانی مسئلہ، دان حدے ٹھینگ بیتگ۔ دگہ دلگوش کرزین گپے ایش انت، وام گالانی املائی دروشم، گون نوکین الفبائی سیستم ئا وتا وت پرش انت۔ لبز ئ املائی دروشم (عربی دروشم) گون سرینوکانی نبشتہ کنگا، گار بیت۔ ھمے وڑا، لبز ئ بنداتی بزانت او اصلی ریشگ ھم ٹگل ایت۔ چو کہ ساری ئا گشگ بیت، “ملّت” ئ لبز، “میلہ ت” نبیسگ بیت او یا کہ “صبر” ئ لبز، “سہ بر”۔
ھنچوکہ ذکر کنگ بیت، کردی زبان ئ نوکین اسکرپٹ، وامگالانی پرسو۔عربیک املائی دروشم ئا عوض کنت۔ چو کہ، “صبر” ئ لبز گون نوکین املائی رھبندا، اگن گون “ص” ئا ھم نبیسگ بہ بیت (کہ نبیسگ نہ بیت) چوش بیت: “صہ بر”۔ اے حالت ئا خاصین عربی حرفانی وجود بے معنی بیت۔
عربی اسکرپٹ ئ گچین کنگ ئ مسترین مقصد، دود او ربیدگی او لبزانکی رشتہ آنی زندگ دارگ انت۔ بلئے، وھدے کہ عربی الفبا ئ نبیشتانکی ڈانچہ بزان املا، چہ بنیادا بہ ٹگل ایت، گڑا، وامگالانی او یا کہ حتّا، ھورین لبزانی رشتہ گون سیادین او ھمسایگین زبانان کہ گون یکین رسم الخط ئا نبیسّگ بنت، سدیت۔ اے حالتا، عربی رسم الخط ئ دارگ ئ ضرورت “وتا وت” پشت نہ کپیت۔
ھبر گونڈ گرگ بہ بیت۔ پہ راستی، چہ اے پیمین بدل او سدلین عربی رسم الخط ئا، پر چی ئا رومن (لاتین) ئ رسم الخط زورگ مہ بیت؟ حال آنکہ، کردی زبان ئ گیشترین گپ جنوک ماں رومن الفبائی زون ئ تھا (ترکیہ) انت۔ بلئے، شاید، اودا ھم، چو بلوچی ئ وڑا، ٹرائیبلیسم، ریجنلیزم او گالوارانی پرک او دگری ئ وئیلا، وتی شومین ساھگ ماں زبان او الفبا ئ سرا دور داتگ۔
