سبی (ہمگام نیوزڈیسک)سندھ شکار پور میں سنگین وارداتوں میں انتہائی مطلوب دو ملزمان پاکستانی خفیہ انٹیلیجنس اور شکارپور پولیس کی کارروائی میں مارے گئے۔
حکام کے مطابق خفیہ ادارے اور شکارپور پولیس نے مصدقہ خفیہ اطلاع پر بلوچستان کے ضلع سبی کے علاقے ڈھاڈر میں کارروائی کی جس میں انتہائی مطلوب دو ملزمان مقابلے میں مارے گئے۔
پولیس کے دعوے کے مطابق مقابلے میں مارے گئے ملزمان کی تعلق اور شناخت کالعدم داعش پاکستان سندھ کے امیر عبداللہ بروہی اور داعش پاکستان سندھ کے نائب امیر حفیظ پندرانی کے نام سے ہوئی۔
فورسز زرائع نے مزید بتایا کہ ان مطلوبہ ملزمان کے سرکی قیمت 2 کروڑ روپے رکھی گئی تھی، فورسز کے دعوے کے مطابق ان کے قبضے سے 4 ہینڈگرینیڈ، 2 کلاشنکوف اور 2 ٹی ٹی پسٹول برآمد ہوئے۔
مقابلے میں مارے جانے والے ملزمان شکارپور کی کربلا مولا امام بارگاہ دھماکے، ڈاکٹر محمد ابراہیم جتوئی پر ناکام خودکش دھماکے، حاجن شاہ ماڑی بم دھماکے، تین سال قبل عید قربان پر خانپور میں نماز عید کے اجتماع پر ناکام خودکش حملوں اور سہون میں قلندر لعل شهباز درگاہ پر بم دھماکے میں ملوث تھے۔
ذرائع نے دعویٰ کیا کہ عبداللہ بروہی داعش کے امیر سے ملاقات بھی کر چکا تھا۔
آئی جی سندھ نے شکارپور پولیس کے لیے 20 لاکھ روپے کا انعام کا اعلان کیا ہے۔
