کرمان(ہمگام نیوز ) اطلاع کے 12 اکتوبر 2026 کو کرمان کی جیل میں آج بروز پیر علی الصبح بلوچ قیدی حبیب اللہ قنبر زہی فرجاد کی سزائے موت پر عمل درآمد کر دیا گیا۔ انہیں منشیات سے متعلق ایک مقدمے میں سزائے موت سنائی گئی تھی۔
تفصیلات کے مطابق، اہل خانہ نے پھانسی سے ایک روز قبل انہیں انفرادی سیل میں منتقل کیے جانے کے بعد آخری ملاقات کی تھی۔
ذرائع نے قیدی کی 38 سالہ شناخت حبیب اللہ قنبر زہی فرجاد ولد اللہ داد کے نام سے کی ہے۔ وہ شادی شدہ، بچوں کے والد اور زاہدان کے رہائشی تھے۔
موصولہ اطلاعات کے مطابق، حبیب اللہ کو نومبر 2023ء میں کرمان میں اس وقت گرفتار کیا گیا تھا جب وہ ایک گاڑی چلا رہے تھے۔ ان پر منشیات سے متعلق الزامات عائد کیے گئے، جن کے تحت بعدازاں انہیں سزائے موت سنائی گئی۔ باخبر ذرائع کے مطابق، مقدمے میں برآمد ہونے والی منشیات ان کی ملکیت نہیں تھیں۔
حبیب اللہ کی سزائے موت پر عمل درآمد ایسے وقت میں کیا گیا جب ایران میں انسانی حقوق کے لیے اقوام متحدہ کی خصوصی نمائندہ مائی ساتو نے گزشتہ روز ان کی پھانسی پر عمل درآمد کے خدشات پر تشویش ظاہر کی تھی۔ انہوں نے کہا تھا کہ وہ اس مقدمے کی قریب سے نگرانی کر رہی ہیں۔ مائی ساتو نے اس کیس کو منشیات سے متعلق دیگر ایسے مقدمات سے بھی مشابہ قرار دیا تھا جن میں سزائے موت سنائے جانے کے واقعات کو انہوں نے اپنے مینڈیٹ کے تحت دستاویزی شکل دی ہے۔
پھانسی سے قبل حبیب اللہ کی والدہ اور بہن نے بھی ان کی سزائے موت پر عمل درآمد کے خدشے کے پیش نظر حکام سے اپیل کی تھی کہ سزا روک دی جائے۔
رپورٹس کے مطابق، حبیب اللہ اپنے خاندان کے اکلوتے بیٹے اور واحد کفیل تھے۔ ان کی پھانسی کے بعد خاندان کو سرپرست سے محرومی کے علاوہ معاشی اور سماجی مشکلات کا بھی سامنا کرنا پڑے گا۔
بلوچ قیدی کو اقوام متحدہ کی خصوصی نمائندہ کی تشویش اور اہل خانہ کی جانب سے رحم کی اپیلوں کے باوجود پھانسی دیے جانے کے واقعے نے ایک بار پھر ایران میں منشیات سے متعلق مقدمات میں سزائے موت پانے والے قیدیوں کی صورتِ حال اور منصفانہ عدالتی کارروائی کے تقاضوں پر توجہ مرکوز
کر دی ہے۔
