گوادر ءِ میانجی ءَ میرین ڈرائیو ءَ جوڑ بوتگیں بلوچی زبان ءِ شہزانتیں نبشتہ کار، زبان زانت، شاعر ءُ کواس، بلوچی زبان ءِ اولی بلوچی لبز بلد ءِ جوڑ کنوک، بازیں کتابانی ساچشتکار نمیرانیں واجہ سید ظہور شاہ ہاشمی ءِ بُت (مجسمہ) ءِ پروشگ ءِ بے سوبیں جہد کنگ بوتگ۔ یک مزن ریشیں مردکے گِندگ بوتگ کہ آئی ءِ دست ءَ تپرے بوتگ، پولیس ءِ دیم ءَ مرد ءَ نمیرانیں سید ھاشمی ءِ بُت (مجسمہ) گوں تپر ءَ جنئگ ءُ پروشگ بندات کتگ چہ ایشی ءِ سبب ءَ سید ھاشمی ءِ مجسمہ ءِ پونز ءُ چشمک ءَ تاوان رستگ۔ ہمے نزیک گوراں محمد علی جناح ءِ ہم مجسمہ ے ہم است بلئے آ دست نہ جتگ۔
زانگ بیت کہ ہمے ملا دروشمیں مردک ءَ بس پرمائگ بوتگ کہ آ بلوچانی شہزانتیں بامرد نمیرانیں واجہ سید ہاشمی ءِ بُت (مجسمہ) ءَ بہ پروشیت۔ مردک ءَ باز کوشش کتگ کہ اے مجسمہ ءَ سرجم ءَ بہ بروشیت بلئے آ بے سوب بوتگ ۔ اے سِلکاری ءَ چِہ بس بت ءَ کمو تاوان رستگ۔ بلئے اے وڑیں ناشرکاری ءُ اے سکیں ردیں عمل ءَ چِہ بلوچانی دل آزاری بوتگ ءُ اے عمل بلوچانی کرّا گوں نفرت ءِ نگاہ ءَ چارگ بیت۔ اگاں چشیں سلکاری ءُ ناشرکاری دارگ مہ بنت گڑا چشیں عملانی ردعمل سک ترند بوت کنت۔
