**زاہدان، 9 اکتوبر 2026**
زاہدان (ہمگام نیوز) ایرانی مقبوضہ ک بلوچستان کے شہر زاہدان کے علاقے چشمہ زیارت میں بم دھماکے اور مسلح جھڑپوں کے نتیجے میں بلوچستان پولیس کے ثقافتی و سماجی امور کے نائب سربراہ کرنل نصرت افتخاری اور ان کے ہمراہ موجود سکیورٹی اہلکار احسان دہمردہ کی ہلاکت کی ابتدائی اطلاعات سامنے آئی ہیں۔ تاہم، احسان دہمردہ کی موت سے متعلق سرکاری میڈیا نے بعد میں بتایا کہ وہ قلبی بحالی کی کوششوں کے بعد دوبارہ زندہ ہوگئے تھے، جبکہ جھڑپوں میں ہلاک اور زخمی ہونے والوں کی حتمی تعداد کی آزادانہ تصدیق نہیں ہوسکی۔
بلوچ خبر رساں ادارے حالوش کے مطابق، فوجی اور سکیورٹی اہلکاروں کا ایک قافلہ زاہدان کے علاقے چشمہ زیارت کی جانب جا رہا تھا کہ مسلح افراد نے راستے میں نصب بم دھماکے سے اسے نشانہ بنایا۔ اس واقعے کے بعد علاقے میں جھڑپیں شروع ہوگئیں اور قابض ایرانی سکیورٹی فورسز کی مزید نفری موقع پر روانہ کردی گئی۔ اطلاعات کے مطابق، درجنوں فوجی اور سکیورٹی گاڑیاں علاقے میں پہنچیں، جبکہ ایک فوجی ہیلی کاپٹر کو بھی فضا میں دیکھا گیا۔
دوسری جانب جبهہ مبارزین مردمی نامی تنظیم نے ایک بیان جاری کرکے چشمہ زیارت میں فوجی اہلکاروں کو لے جانے والی گاڑی پر مسلح حملے کی ذمہ داری قبول کی ہے۔ تنظیم نے دعویٰ کیا کہ حملے میں صوبائی پولیس کے ثقافتی و سماجی امور کے نائب سربراہ نصرت افتخاری سمیت متعدد فوجی اور سکیورٹی اہلکار ہلاک ہوئے۔ تاہم، ہلاکتوں کی حتمی تعداد کی آزادانہ تصدیق نہیں ہوئی۔
دریں اثنا، جھڑپوں کے دوران ایک بلوچ شہری عبداللہ قنبرزہی، ولد جمعہ، بھی سکیورٹی فورسز کی فائرنگ سے ہلاک ہوگئے۔ ذرائع کے مطابق، عبداللہ زاہدان کے علاقے دومگ کے رہائشی اور دو بچوں کے والد تھے۔
مزید ذرائع کے مطابق عبداللہ کا جھڑپوں سے کوئی تعلق نہیں تھا اور وہ غیر مسلح تھے۔ وہ تقریباً دوپہر 1:30 بجے خریداری کے لیے دومگ سے زاہدان جا رہے تھے کہ چشمہ زیارت کے علاقے میں بم دھماکے اور جھڑپوں کے بعد سکیورٹی فورسز کی فائرنگ کا نشانہ بن گئے۔
سرکاری میڈیا نے عبداللہ قنبرزہی کو سڑک کنارے بم نصب کرنے اور دو فوجی اہلکاروں کی ہلاکت کا ذمہ دار قرار دیا ہے۔ تاہم، ان کے قریبی افراد اور باخبر ذرائع نے اس الزام کو مسترد کرتے ہوئے کہا ہے کہ عبداللہ کا حملے یا جھڑپوں سے کوئی تعلق نہیں تھا۔
رپورٹس کے مطابق، چشمہ زیارت میں جھڑپوں کا آغاز اس وقت ہوا جب مسلح افراد نے فوجی اہلکاروں کو لے جانے والی ایک ٹویوٹا ہائی لکس گاڑی کو نشانہ بنایا۔ اس کے بعد فوجی اور پولیس دستے علاقے میں پہنچے اور دونوں جانب سے جھڑپیں جاری رہیں۔
تاحال ہلاک اور زخمی ہونے والوں کی مجموعی تعداد، واقعے کی مکمل تفصیلات اور تمام ہلاکتوں کی آزادانہ تصدیق سامنے نہیں آئی۔ کسی دوسرے تنظیم کی جانب سے حملے کی ذمہ داری قبول کرنے کی اطلاع بھی د
ستیاب نہیں ہے۔
