تربت ( ہمگام نیوز ) انجمن تاجران کیچ (رجسٹرڈ) نے تربت، مند روٹ پر مقامی تاجروں کی مال بردار گاڑیوں پر فائرنگ، لوٹ مار، سامان چھیننے اور گاڑیوں کو سامان سمیت جلانے کے واقعات پر گہری تشویش کا اظہار کرتے ہوئے حکومت اور متعلقہ سیکیورٹی اداروں سے مطالبہ کیا ہے کہ ان واقعات کی فوری، شفاف اور غیر جانب دارانہ تحقیقات کرکے ذمہ دار عناصر کو قانون کے کٹہرے میں لایا جائے۔
انھوں نے کہا کہ مقامی تاجروں کی گاڑیاں اشیائے ضروریہ لے کر تربت آتی ہیں۔ ان گاڑیوں پر حملوں سے نہ صرف تاجروں کو بھاری مالی نقصان پہنچ رہا ہے بلکہ مقامی مارکیٹ میں اشیائے ضروریہ کی فراہمی، کاروباری سرگرمیوں اور عوامی معیشت بھی متاثر ہونے کا خدشہ ہے۔ مسلسل ایسے واقعات تاجروں میں خوف و ہراس پیدا کر رہے ہیں اور کاروبار کرنا مشکل ہوتا جا رہا ہے۔
انجمن نے واضح کیا کہ تاجروں کی جان و مال کا تحفظ حکومت کی بنیادی ذمہ داری ہے۔ کسی بھی فرد، گروہ، تنظیم یا دیگر عناصر کی جانب سے تاجروں کو لوٹنے، ان کی گاڑیوں کو نذرِ آتش کرنے یا کاروباری سرگرمیوں میں زبردستی رکاوٹ ڈالنے کا عمل ناقابلِ قبول ہے۔ تاہم، ان واقعات میں ملوث کسی بھی فریق کی شناخت اور ذمہ داری کا تعین مستند تحقیقات کے ذریعے کیا جانا چاہیے۔
انجمن تاجران کیچ نے مطالبہ کیا کہ تربت، مند روٹ پر سیکیورٹی کے مؤثر انتظامات کیے جائیں، مال بردار گاڑیوں کی محفوظ آمدورفت یقینی بنائی جائے، متاثرہ تاجروں کے نقصانات کا جائزہ لیا جائے اور لوٹ مار و آتش زنی کے واقعات میں ملوث عناصر کے خلاف بلاامتیاز قانونی کارروائی کی جائے۔
بیان میں مزید کہا گیا ہے کہ مقامی تاجر پہلے ہی مہنگائی، کاروباری اخراجات اور دیگر معاشی مشکلات سے دوچار ہیں۔ ایسے حالات میں ان کی گاڑیوں اور سامان کو نشانہ بنانا مقامی تجارت اور عام شہریوں کے معاشی مفادات کو نقصان پہنچانے کے مترادف ہے۔
آخر میں انھوں نے حکومت، ضلعی انتظامیہ اور متعلقہ سیکیورٹی اداروں سے مطالبہ کیا ہے کہ اس سلسلے کو فوری طور پر روکا جائے اور تاجروں کو ایسا محفوظ ماحول فراہم کیا جائے جس میں وہ بلاخوف و خطر اپنا کاروبار جاری رکھ سکیں
