زاہدان (ہمگام نیوز) ایرانی مقبوضہ بلوچستان کے اضلاع سیب و سوران اور راسک میں فائرنگ کے دو الگ الگ واقعات میں تین بلوچ شہری ہلاک جبکہ ایک شخص زخمی ہوگیا۔
تفصیلات کے مطابق، پہلا واقعہ منگل 27 اکتوبر 2026 کی شب ضلع سیب و سوران کی تحصیل کنت میں پیش آیا، جہاں ذاتی تنازعات کے باعث دو قبائل سے وابستہ افراد کے درمیان مسلح جھڑپ ہوئی۔ فائرنگ کے نتیجے میں دو بلوچ شہری ہلاک اور ایک دیگر زخمی ہوگیا۔
رپورٹ کے مطابق ہلاک ہونے والوں کی شناخت فرشاد پاہنگ ولد یوسف، ساکن تحصیل کنت، اور تقریباً 29 سالہ سلمان پیرسیری سندک زہی ولد جہانبخش کے ناموں سے ہوئی ہے۔ زخمی شہری کی شناخت اور اس کی موجودہ حالت کے بارے میں تاحال معلومات سامنے نہیں آسکی ہیں۔
دوسرا واقعہ منگل 3 نومبر 2026 کو ضلع راسک کے علاقے جکیگور کے سہ راہی پر پیش آیا، جہاں ایک بلوچ شہری کو نامعلوم مسلح افراد نے فائرنگ کا نشانہ بنایا، جس کے نتیجے میں وہ ہلاک ہوگیا۔
اس شہری کی شناخت تقریباً 53 سالہ شوکت رند (نبات زہی) کے نام سے ہوئی ہے۔ وہ شادی شدہ اور بچوں کے والد تھے اور جکیگور کے رہائشی تھے۔
ذرائع کے مطابق شوکت رند کو جکیگور کے سہ راہی پر مسلح افراد نے متعدد گولیاں ماریں، جس کے باعث وہ شدید زخمی ہوگئے اور زخموں کی تاب نہ لاتے ہوئے دم توڑ گئے۔
رپورٹ کے مطابق دونوں واقعات میں فائرنگ کرنے والے افراد کی شناخت اور ان کے محرکات کے حوالے سے تاحال کوئی معلومات سامنے نہیں آسکی ہیں۔ جبکہ سیب و سوران میں زخمی ہونے والے شہری کی حالت کے بارے میں بھی تفصیلات دستیاب ن
ہیں ہیں۔
