برسٹل (ہمگام نیوز ڈیسک) ورلڈکپ کرکٹ 2019 کے وارن اپ میچ میں افغان کھلاڑیوں نے 3 وکٹوں سے شکست دے کر پاکستان کو کرکٹ کا سبق پڑھایا۔
تفصیلات کے مطابق پاکستان کی طرف سے کپتان سرفراز احمد نے ٹاس جیت کر پہلے بیٹنگ کا فیصلہ کیا۔ فخر زمان اور امام الحق نے اننگز کا آغاز کیا تاہم فخر زمان 19 رنز بنا کر محمد نبی کی سیدھی گیند پر بولڈ ہو گئے۔ پاکستان کے دوسرے بیٹسمین امام الحق آؤٹ ہوئے جو 32 پر حامد حسن کی گیند پر بولڈ ہو گئے۔
تیسری وکٹ حارث سہیل کی گری جو 1 رنز بنا کر محمد نبی کی آسان گیند پر بولڈ ہو گئے۔ سینئر بیٹسمین محمد حفیظ کی اننگز 20 گیندوں پر 12 سکور پر محدود رہی اور راشد خان کی گیند پر رحمت شاہ کو کیچ دے بیٹھے۔
ون ڈاؤن بیٹسمین بابر اعظم اور آل رائونڈر شعیب ملک نے شاندار بیٹنگ کی اور گراؤنڈز کے چاروں طرف شارٹس کھیلے۔ تاہم سینئر بیٹسمین 44 رنز بنا کر محمد نبی کے ہاتھوں آوٹ ہو گئے۔ کپتان سرفراز احمد کی اننگز 13رنز سے آگے نہ بڑھ سکی۔ آل راؤنڈر عماد وسیم 18 سکور بنا کر رن آئوٹ ہو گئے۔
بابر اعظم نے سنچری بنائی اور 112 سکور پر دولت زردان کی گیند پر رحمت شاہ کو کیچ دے بیٹھے۔ دیگر کھلاڑی بھی قابل ذکر کارکردگی نہ دکھا سکے اور پاکستان کی پوری ٹیم 47.5 اوورز میں 262 پر ناکام ہو کر ڈھیر ہو گئی۔
افغانستان کی طرف سے اسپنر محمد نبی نے 3، راشد خان، دولت زردان نے دو ، دو وکٹیں حاصل کیں، آفتاب عالم کے حصے میں ایک وکٹ آئی۔
ہدف کے تعاقب میں افغانستان کی کرکٹ ٹیم نے شاندار بیٹنگ کی اور باؤلرز کی ایک بھی نہ چلنے دی۔ اوپنر محمد شہزاد اور حضرت اللہ زازئی نے جارحانہ کھیل پیش کیا۔ ٹی ٹونٹی کے ایک اوور میں چھ چھکے لگانے والے زازئی نے 28 گیندوں پر 49 کی باری کھیلی۔ اس باری میں انہوں نے 8 چوکے اور 2 بلند و بالا چھکے لگائے۔
اوپنر محمد شہزاد 23 اسکور پر ریٹائر ہرٹ ہوئے۔ ون ڈائون بیٹسمین رحمت شاہ 32 سکور بنا کر وہاب ریاض کی گیند پر آئوٹ ہوئے۔ سمیع اللہ شنواری 22 پر اسپنر عماد وسیم کو وکٹ دے بیٹھے۔ اصغر افغان کو بھی عماد وسیم نے پویلین بھیجا۔ وہ صرف 7 رنز کی باری کھیل سکے۔
محمد نبی نے 34 رنز بنائے اور محمد حسنین کی گیند پر وکٹ کیپر سرفراز احمد کو کیچ دے بیٹھے۔ گلبدین نائب2 رنز بنا کر وہاب ریاض کی گیند پر بولڈ ہو گئے۔ نجیب اللہ زردان ایک رن بنا کر وہاب ریاض کی گیند پر ایل بی ڈبلیو ہو گئے۔ حشمت اللہ شہیدی 74 رنز بنا کر ناٹ آئوٹ رہے۔ راشدخان 5 سکور بنا ناٹ آوٹ رہے۔
ورلڈکپ کرکٹ 2019, افغانستان نے پاکستان کو 3 وکٹوں سے شکست دی
