کوئٹہ ( ہمگام نیوز ) لاپتہ افراد کی بازیابی کے لیے قائم کمیشن کا اجلاس کوئٹہ میں شروع ہو گیا ہے جو تین جولائی تک صوبے کے مختلف علاقوں سے جبری لاپتہ کیے گئے 121 افراد کے کیسز کی سماعت کر ے گا-اجلاس کے پہلے روز جبری لاپتہ ہونے والا ایک نوجوان پیر کو اپنے گھر واپس پہنچ گیا۔
کمیشن کا گزشتہ اجلاس اپریل میں پانچ روز تک کوئٹہ میں جاری رہا تھا جس میں 71 کیسز کی سماعت ہوئی تھی۔ ان میں سے جبری لاپتہ کیے گئے 16 افراد کا پتہ لگا لیا گیا تھا اور 12 لاپتہ افراد اپنے گھروں میں واپس پہنچ گئے تھے۔
وائس فار مسنگ بلوچ پرسنز نے پیر سے شروع ہونے والے کمیشن کے اجلاس کا بائیکاٹ کیا ہے۔
وائس فار مسنگ بلوچُ پرسنز کا کہنا ہے کہ اجلاس میں شرکت کرنے والے مختلف اداروں کے اہل کار ہماری شکایات پر توجہ نہیں دیتے۔ ان کا یہ بھی کہنا ہے کہ نوجوانوں کو جبری لاپتا کرنے کا سلسلہ اب بھی جاری ہے اور حال ہی میں کئی نوجوان لاپتا ہو چکے ہیں۔مزید کہا کہ ہم یہ کہتے ہیں کہ لاپتہ کیے گئے سینئر افراد اور سیاسی کارکنوں کو چھوڑا جائے۔ اب تک رہا کیے جانے والے افراد وہ ہیں جنہیں تین چار مہینے پہلے اٹھایا گیا تھا۔انہوں نے کہا کہ اگر ایک سو افراد رہا کیے جاتے ہیں تو تین سو نوجوانوں کو لاپتہ بھی کر دیا جاتا ہے۔
