نیودہلی(ہمگام نیوزڈیسک) ہمگام مانیٹرنگ نیوزڈیسک رپورٹس کے مطابق انڈین فوج کے سربراہ جنرل راوت نے پاکستان کو خبردار کرتے ہوئے کہا ہے کہ پاکستانی فوج کی جانب سے ہر قسم کی طالع آزمائی کی سزا اسے ضرور دی جائے گی ۔اور اسے کسی بھی طرح کی دہشت گردی کا خمیازہ بھگتنا پڑے گا۔ جنرل بپن راوت نے پاکستان کی فوج کو مستقبل میں کسی قسم کی مہم جوئی سے باز رہنے کی دھمکی دیتے ہوئے کہا کہ ماضی میں پاکستان نے بارہا یا تو انڈیا میں مداخلت کی یا دہشت گردی کی سرکاری سطح پر سرپرستی کی ہے۔
وہ کارگل جنگ کے 20 برس مکمل ہونے پر سنیچر کو دلی میں منعقدہ ایک سیمنار سے خطاب کر رہے تھے۔جنرل راوت نے کہا کہ’انڈیا کی مسلح افواج ہماری ملکی سالمیت کے دفاع کے لیے تیار ہیں۔ اس بارے میں کسی طرح کی غلط فہمی نہیں ہونی چاہئے، کہ کسی بھی طالع آزما کا دندان شکن جواب دیا جائے گا۔’
انڈین آرمی چیف جنرل راوت کا کہنا ہے کہ ٹیکنالوجی اور انٹرنیٹ کی وجہ سے آئندہ ہونے والی جنگیں تشدد سے زیادہ بھرپور اور اچانک ہونگی۔روزنامہ ہندوستان ٹائمز کے مطابق انھوں نے فوج کو کثیرالجہتی جنگ کے لیے تیار رہنے کی بھی ہدایت کی۔
ان کے بقول غیر ریاستی عناصر میں اضافہ اور جدید ٹیکنالوجی نے جنگی حربوں کو بدل کر کے رکھ دیا ہے۔
مستقبل کی جنگوں کا نقشہ بیان کرتے ہوئے جنرل راوت کا کہنا تھا کہ ‘انٹرنیٹ اور خلا جنگوں میں اہم کردار ادا کریں گے کیونکہ ان کی وجہ سے میدانِ جنگ زیادہ مربوط ہو گیا ہے جس پر فریق بالادستی کی کوشش کریں گے۔’
انڈین فوج کے سربراہ کا کہنا تھا کہ ان کی فوج تبدیلی کے عمل سے گزر رہی ہے اور سپیس، سائبر اور سپیشل فورسز ڈویژن کا قیام اسی تبدیلی کا حصہ ہے۔
