ماسکو (ہمگام نیوز) مانیٹرنگ نیوز ڈیسک رپورٹ کے مطابق روس نے یوکرین پر حملے کی وجہ بتاتے ہوا کہا کہ وہ صدر ولودومیر زیلنسکی کی حکومت کو ختم کرنا نہیں چاہتا، ثبوت ہیں کہ امریکا کی یوکرین میں حیاتیاتی ہتھیار بنانے کی لیباریٹریز ہیں۔
غیر ملکی میڈیا کی رپورٹ کے مطابق روسی وزارت خارجہ کی ترجمان ماریہ زخارووا نے کہا ہے کہ ماسکو زیلنسکی کا تختہ الٹنے کے لیے یہ کام نہیں کر رہا۔
خیال رہے کہ روس اور یوکرین کے درمیان بات چیت کے حالیہ دور میں کچھ پیش رفت بھی دیکھی گئی ہے، تاہم اس دوران روس نے یوکرین پر اپنے مطالبات رکھے ہیں ـ
ہفتہ وار پریس بریفنگ کے دوران وزارت خارجہ کی ترجمان کا کہنا تھا کہ ان کے پاس یہ دستاویزی ثبوت ہیں کہ امریکا یوکرین میں حیاتیاتی ہتھیار بنارہے ہیں ۔
امریکی انڈر سیکریٹری اسٹیٹ برائے سیاسی امور وکٹوریہ نولینڈ کا حوالہ دیتے ہوئے ماریہ زخارووا کا کہنا تھا کہ ’ایک سوال کے جواب میں نولینڈ نے یہ تصدیق کی تھی کہ یوکرین میں حیاتیاتی ریسرچ کی لیباریٹریز ہیں۔‘
انہوں نے کہا کہ ہم سائنسی مقاصد کے لیے ان لیباریٹریز کے بارے میں بات نہیں کررہے، ان پروگرامز میں پیسہ تو امریکی محکمہ دفاع کی جانب دے دیا جارہا ہے۔
روسی وزارت خارجہ کی ترجمان نے مزید کہا کہ امریکی محکمہ دفاع اور امریکی انتظامیہ سرکاری طور عالمی برادری کے سامنے یوکرین میں اپنے اس پروگرام کی وضاحت دینے کے پابند ہیں۔
انہوں نے یہ بھی کہا کہ ہم تفصیلات کا مطالبہ کرتے ہیں، ہم مطالبہ کرتے ہیں اور دنیا کو اس کا انتظار ہے۔
واضح رہے کہ یوکرین اور امریکا پہلے ہی روس کی جانب سے حیاتیاتی ہتھیار بنانے کے الزام کو مسترد کرچکے ہیں۔
