ھمگام بلوچی
لیو ٹالسٹای / کریم بلوچ
سُهب و پگاه ءِ مهلا ات . نوکی چه سورتمه ءَ ایرکپتگ اتنت . لوگ ءِ پیژکاه ءَ هنگت برپ مُچ اتنت . کلگ ءَ چه آپ بَیوکیں برپاں ، جوگاں شیوگ اتنت . گلی یے تها ، دو لوگ ءِ نیام ءَ بازیں آپے آوشتاتگ و مچ بیتگ ات و سهدارانی لِڈ و کاهاں آپ ءِ راه ءَ داشتگ ات .
همے مُچ بیتگیں آپ ءِ اے نیمگ و آ نیمگ ، دو جنکو چه دو لوگ اوشتاتگ اتنت . یکے کسترینے ات و دومی مسترینے . آهانی مات هر دوئیں جنکواں نوکیں و شوکیں جامگ ، گوئر ءَ داتگ ات . دوئیانی سر اش گوں سُهریں دزمالاں کلوتک بستگ ات . دوئیں ناهاری وارتت و چه لوگ ءَ درکپتگ اتنت .
هما اوشتاتگیں آپ ءِ اے کش و آ کش ءَ اوشتات انت و وتی نوکیں گُد اش یک و دگر ءَ پیشداشت انت و لیب و گوازی ءَ گلائیش بوت انت . لوٹت اش یک و دگر ءِ نیمگ ءَ آپاں ترینز دیاں و ریچاں به بنت . کستریں گوں وتی بوٹاں آپ ءَ ماندات . مستریں آئی ءَ گوئشت :
_ کسانلک ! گوں بوٹاں آپ ءَ مان مه دئے ، تئی مات ترا هبر دنت . من وتی کوشاں کشاں ، تو هم وتی کوشاں به کش .
وتی بوٹ اش کشیت و آپ اش مان دات و یک و دگر ءِ نیمگ ءَ روان بوت انت کسانتریں تاں پاد ءِ شُگُلُک ءَ آپ ءَ مان دات و اوشتات و گُپتی ( گوئشتی ) :
_ جُهل انت ، پاگاسک من ترساں ( پاگاسک مستریں جنکو ءِ نام ات ) .
_ پرواهے نه انت ، گیشتر جهل نه انت . هنچو سیده منی نیمگ ءَ بیا .
دوئیناں یک و دگر ءِ نیمگ ءَ روان بوت انت . پاگاسک گوئشت :
_ کسانَلُک هنچو آرامی بیا . بچار آپاں ترینز مه دئے …
هنگت آئی ءِ هبر تمام ( تماں ) نبوت ات که کسانلک گوں پاد آپاں آئی ءِ نیمگ ءَ ترینز دات . آئی ءِ جامگ پر ترینز بوت و ترینز آئی ءِ دیم و چماں هم رهت انت .
پاگاسک که ترینزانی پولنگ ءَ وتی جامگ ءَ دیست گرم گپت و آئیا زا و بد گوئشاں ، آئی ءِ نیمگ ءَ بیڑی برت تاں کسانلک ءَ به جنت . کسانلک که سرپد بوت که بدیں کاری کرته ، ترست و چه آپ ءَ درکپت و دیم په لوگ ءَ تتک .
پاکاسک ءِ مات چه هموداں گوئزان ات . دیستی که آئی ءِ جنک ءِ گُد پولنگ و تَرّ بوتگ انت . آئی ءِ سرا زهر گپت و گوئشتی :
_ تئو شِرّ ، کجا وت ءَ تو چو رزوا کرته ؟
_ کسانلک منی سرا دستی آپاں ترینز دات .
پاگاسک ءِ مات کسانلک ءَ گپت و یک شهماتے آئی ءَ جت .. کسانلک هم دپ پُر گریوگ ءَ گلائیش بوت و آئی ءِ گریوگ سرجمیں سڑک ءَ اشکنگ ءَ بوت .
کسانلک ءِ مات درکپت و همساهگءَ بد گوئشاں گوئشتی :
_ منی زهگلک ءَ پر چا جن ئے ؟
گپ یک و دو ءَ گیش بوت و دپ جنگی و کوکار کناں بوت انت .ایدگه جنیناں هم درکپت انت و هر کس پر وت گوانک جناں و مردیناں هم جیڑه ءَ یهت و هوار بوت انت . کس آدگر ءِ هبر ءِ اشکنگ ءَ تیار نه ات . تهلانک دیکا بوت انت و پورهیں جنگے بنگیج بیان ات .
یگبرے که پاگاسلک ءِ بلک در کپت و مردینانی نیام ءَ اوشتات و گوئشتی :
_ چون بیتگ شما را منی دل ءِ بنداں ! مرچی چونیں روچے ؟ پیکه شما گَل و وش دل به بئیت ، بلے شما چونیں گناهاں وت ءَ بار کنان ایت .
کس بلک ءِ هبر ءَ گوش نداشت و مان نه یائورت . کمے هست ات که آئی ءَ وتی پادانی چیر ءَ به ترپ انت . مردماں جاک و کوکار کنان اتنت . پاگاسلک و کسانلک همودان اتنت . پاگاسلک وتی جامگ ءَ پهک کرت و چست بوت و هما گلی ءَ شت که اوداں آپ اوشتاتگ ات . ڈوکی زرت و جهد کناں بوت تاں هاک ءَ به کونچیت تاں آپ شیوگ و سڑک ءَ مان جوگ ءَ به رؤت . وهدے که آئی کونچان ات کسانلک هم یهت و رست و گوں دارے په آئی ءِ کمک ءَ جهد کناں بوت و جوگک ءِ دِرّگ ءَ گلائیش بوت و جوگک اش تیار کرت و آپ اش ویل کرت . مردیناں نوں جنگ ءَ بنگیج کرتت . آپ شیوگ ات و هما جاه ءَ که مردیناں جنگ اتنت روان ات . مردماں مچ اتنت و بلک په مردمانی گیشینئگ ءَ جهد کنان ات .
جنکواں آپ ءَ جکے دؤر داتت و جک آپ ءِ برزگ تروراں و بُڈ وراں دیما روان ات و جنکواں آپ ءِ اے کش و آ کش ءَ جک ءِ چاراں و کنداں دیما تچان اتنت .
پاگاسُک کنداں گوانک جت :
_ بوشت ، کسانَلُک بوشت !
کسانلک هم چیزے لوٹت به گوئشیت ، بلے کندگ آئی ءَ په هبر نه هشت .
جنکواں چه تچوکیں آپ ءِ دوئیں نیمگ ءَ تچاں و دارک ءِ بُڈ ورگ و چست بیگ ءَ چاراں و کندان اتنت ، تاں مردینانی جنگ جاه ءَ رست انت . بلک جنکواں دیست و مردینانی گوانک جت :
_ شما چه هدا به ترسیت ! شما مردیناں اے دوئیں جنکوانی نیمون ءَ جنگ کنان ایت . آهاں دیر انت وتی پیشی گپان اش شموشتگ . اپدا گوں مهر و دل وشی ، گوں یک و دگر ءَ لیب و گوازی انت . آهاں چه شما هُژیار تر انت !
مردیناں جنکوانی نیمگ ءَ سئیل کرت و چارست ، وتی کار ءَ چه شُهرت بیت انت و وتی سر اش کندت و هر کس وتی لوگ ءَ شت .
« تاں وهدے که چکانی داب ءَ دلپهک مه بئیت ، شما را هدای ءِ بادشاهی ءِ درگاه ءَ راهے نیست »
