ازرائیلی روتاک یروشلم پوسٹ ءِ پَرّیسی(تجزیاتی) درونت نویسکار جونہ جیریمی پوپ ءَ یک جُستے ودی کرت کہ ”چہ آدینک ءَ ءَد گزہ ءِ سر ءَ زمینی اُرش پرچے ءَ نزور تر اِتگ اَنت؟“۔ چُشکہ شُما سرپد اِت ازرائیلی لشکر ءَ پلستینی آناں چہ گْوریچانی گزہ ءَ در آیگ ءَ واست ءَ لھتیں وھد داتگ اَت، آئی ءَ داتگیں وھد آدینک ءِ نیمروچ ءَ ھلاس بوتگ۔
ازرائیلی پرّیسکار ءِ گْوشگ اِنت کہ اِے جْیڑہ پنچ شمبہ ءِ روچ ءَ سرجم ءَ پدر بوتگ، کہ ازرائیلی لشکر گزہ ءِ سر ءَ پسّوی اُرش آدینک یاںکہ گنجان ءِ روچ ءَ بندات کنت۔ آ دیمتر ءَ گْوش اِیت کہ جنگ یکشمبہ ءُ دوشمبہ ءِ سُھب ءِ ماھل ءَ بندات بوتگ، پِزائیہ ءِ بازیں روچانی تباہ کاریں اُرشاں راہ گْیش ءُ گیوار کرت اَنت۔ بلے مرچی سے شمبہ اِنت کہ ما ودار ءَ اَیں، ءُ اِے جنگ ءِ نشانی (تب زانتی جنگے بوت کرت کنت) اِے گپ ءَ پدّر کنت کہ اُرش کنگ یک دوریں گپّے تندی دوری ءَ تاں آئی ءِ نام ءُ نشان ھم گِندگ نہ بنت۔
یونا گْوش اِیت کہ جنگ ءِ ماھتل دارگ ءِ سوب ءِ بازیں جْیڑہ گندگ بوگ ءَ اَنت۔ ایشانی تہ ءَ یک مستریں سوبے ایش اِنت کہ ھزب اللّہ اِے ساھت ءِ ودار ءَ اِنت وھدیکہ ازرائیلی لشکر ءَ چہ زمینی لشکر ءِ گْیشیں بَھر گَزہ ءِ نیمگ ءَ روت تاںکہ آ ازرائیل ءِ بگیری ءَ گوریچانی نیمگ ءَ یک مزنیں جنگے بندات کرت بہ کنت۔ ھزب اللّہ ءَ گنجان ءِ سُھب ءَ جنگ ءِ بندات ءَ چہ پد جنگ ءَ بھر نہ زرتگ، ازرائیل ءِ سر ءَ وتی اُرشانی درچ ئِے ماھتل داشتگ، نبشتہ کار ءِ گْوشگ اِنت کہ اِے گپ انگت زانگ نہ بیت کہ آئی ءِ جنگ دارگ ءُ بند کنگ بوتگ، یاںکہ اِے آئی ءِ یک مزنیں جنگی چالے بوت کنت، ازرائیل ءِ لشکر ءَ را رَد دیگ ءُ سیکورٹی ءِ دروگیں چالے بوت کنت انچشکہ زرباری نیمگ ءَ ھماس ءَ انچش کرت رَد دات ءُ پد ءَ آئی ءِ سر ءَ اناگت ءَ اُرش کرت۔ بلے روتاک ءِ ھساب ءَ اِے تُرس ازرائیلی لشکر ءَ را گزہ ءِ سر ءَ اُرش ءَ داشت کرت نہ کنت۔ انگت اے وڑ بوت کنت کہ ازرائیل ءَ پمیشکہ وتی اُرش ماھتل داشتگ کہ آ ھزب اللّہ ءِ ارادھاں سرپد اِنت کہ بلکیں آئی ءِ سر ءَ اّرش بِہ کنت ءُ تاں وھدے کہ آ نہ گیگیں جاورانی دیمپانی ءِ واست ءَ وتی گْوریچانی لشکر ءَ مھکم کرت بہ کنت۔
جنگ ءِ ماھتل دارگ ءِ دومی سوب ءِ بابت ءَ نبشتہ کار ءِ گْوشگ انت کہ ازرائیل ءِ دیمپانی لشکر ءِ تہ ءِ راجکاریں پِڑ ءَ گْوں بندوکیں لس مھلوک جُھلانکی ءَ تپاسگ ءُ چارگ ءُ جْیڑگ ءَ اَنت کہ ازرائیل ءِ دیمپانی لشکر ءَ چہ بازیں دَھکاں اے پیمیں جنگ نہ کرتگ، بے تیاری ءُ اشتاپی ءَ اُرش کنگ ءُ وتی بیر ءِ گرگ یک مزنیں ردی یے بوت کرت کنت۔ اِیشی ءِ یک مزنیں درورے 2006 ءِ سال ءَ گْوں لبنان ءَ دومی جنگ ءَ زمینی اُرش ئیگ اِنت کہ آ یک بے سْوبی ءُ مزنیں پروشے اَت، اِے اُرش ءِ تہ ءَ ھالاںکہ سوبمندیں بُرزی اُرش ءَ ابید ھم ازرائیل ءِ لشکر ءَ پروش وارت۔
نبشتہ کار ءِ ھیال اِنت کہ ازرائیل ءِ لشکر ءِ واست ءَ اناگتیں اُرش کنگ ممکن نہ اِنت، پرچے کہ ھماس ءَ اِے جنگ بندات کرتگ ءُ ازرائیل ءِ لشکر ءَ ھم ھماس ءِ بگیری ءَ گْوں چارگ ءُ تپاس ءَ پد یک اناگتیں اُرشے کنگ لوٹ اِیت پمیشکہ اے جْیڑہ سک ءَ شوربندی لوٹ اِیت، آ دیمتر ءَ گْوش اِیت کہ اُرش ءِ ماھتل دارگ ءِ دگہ ھم بازیں سوَب ھست اَنت، چُشکہ امریکہ ءِ زور دیگ ءِ بنیات ءَ شھری آناں رکینگ، گزہ ءِ تہ ءَ ازرائیلی بندیگانی بابت ءَ ھدشہ، پلستینی آنی لڑّینگ ءِ واست ءَ وھد ءِ درکار، اِے کُل سوَب ھوار انت۔
نبشتہ کار ءَ اِے گپ پدّر کرتگ کہ ازرائیل ءَ را میان استمانی ملکانی کُمک کنگ ءَ ابید، وھدیکہ جنگ ءِ ساھت ءَ گزہ ءِ تہ ءَ بیران بوتگیں مردمانی شُمار گیش بہ اَنت، امریکہ ءُ آدگہ ملکانی نیمگ ءَ ایشی ءِ گِر ءُ دار ءِ واست ءَ سک ءَ زور دیگ بیت۔ روتاک ءَ اے گپ ءِ راستی درگپتگ کہ انگت اِے پیسلہ کنگ نہ بوتگ کہ ازرائیل ءِ ھکومت ءِ ھلاس بوگ ءَ پد گَزہ ءَ گْوں چے کنگ بیت؟ نبشتہ کار ءَ وتی درونت ءِ گُڈ سر ءَ اِے گْوشتگ کہ جنگ ءَ چہ پد اِے زانگ بیت کہ انوگیں جنگ ءِ ماھتل دارگ ءُ گیشیں وھد ءِ زورگ پہ اُرشانی شوربندی کنگ ءُ گیشیں زانت ءُ شاھوکاری ءِ واست ءَ زورگ بوتگ یاںکہ اِے وھد ھُشکہ زوال کنگ بوتگ۔
