ھمگام رپورٹ
سربوتگیں ھالاں رد ءَ بلوچستان گیشتریں ھند ءُ دمگاں بلوچاں زورانسریں گچینکاری ءُ اوٹ رد کتگ ءُ بازیں دمگاں بلوچ لس مھلوک وتی تاگت ءَ اوٹ نہ داتگ ءُ گچینکاری داشتگ-مند ءَ چہ بہ گر داں ھب ءَ ءُ پنجگور ءَ بہ گر داں کوھلو ءَ تاں سھب ءَ داں شپ ءَ لس مھلوک ءَ ھچ وڑیں دلگوشی نہ داتگ ایشی ءَ چہ ابید چاگردی رسانکدر ءَ شنگ بوتگیں تامراں چہ اے ھبر گیشینگ بیت کہ بلوچ لس مھلوک گوستگیں وھد ءِ وڑ ءَ اے رندی اوں پاکستان ءِ زورانسریں گچینکاریاں وتا دور داشتگ ءُ بلکیں بازیں ھند ءُ دمگاں لس مھلوک ءَ پولنگ اسٹیشن ءَ شتگ ءُ پولنگ ءِ ساز ءُ سامان سوتکگ انت اوٹ کنوکانی ڈبی اوں سوتکگ انت-
یات بہ بیت بلوچستان ءِ سرا پاکستان ءِ زورگیری ءَ پد بلوچستان ءِ لس مھلوک ءِ نیمگ ءَ بازیں دروشماں پاکستان ءِ زورگیری ءِ ھلاپ ءَ گھگیری برجم انت وھد ءِ گوزگ ءِ ھمراھی گھگیری ءِ تہ ءَ ترندی ءُ پھتگی جوانی ءَ گندگ پیداک انت ایشی ءَ چہ ھمے پدر بیت بلوچ ءِ سسا ءُ سما گیشتر پھتہ بوتگ، پاکستانی اوٹ ءُ گچینکاری یک بے ماناھیں گپے ءَ ابید ھچے نہ انت، وتگڑیں گچینکاریانی کُمک ءَ بس بلوچستان ءَ پاکستان ءِ زورگیری ءَ مھکم کنگ بیت-
گوستگیں روچ ءَ پری بلوچستان مومٹ ءِ پاگواجہ ھیربیار مری ءِ نیمگ ءَ تامری دروشم ءَ شنگ بوتگیں کلوہ ءِ تہ ءَ گوں راج ءَ گوں دزبندی کتگ کہ پاکستان ءِ اوٹ ءُ گچینکاریاں ھچ وڑ ءَ بھر مہ زور اِت ءُ پہ آجوئی ءَ وتی راجی کرد ءَ ادا کن اِت، ھیربیاری مری ءَ گوں تچکی ءَ گشتگ تئی اوٹ نہ دیگ پہ راجی آجوئی ءَ ھمنچکیں بستارے دار ایت انچو کہ کوہ ءَ یک سرمچارے زند ءِ پرواہ نہ کنت آجوئی جنگ ءَ دزگٹ انت۔
بلوچ ءِ تہ ءَ سسا ءُ سما ءَ ھشت اُستپان ءَ روچ ءَ سابت کت کہ بلوچ پاکستان ءِ زوراکی ءُ ھاکمی، ایدگہ پندلانی ھمراھی داری ءَ نہ کنت، بلوچ ءِ یک رد ءَ برجمیں آجوئی جنز ءَ لس مھلوک ءَ را نہ ترس ءُ دلیر جوڑ کتگ مرچی بلوچ راج پوہ بوتگ کہ کجام چیز شر انت ءُ کجام ھراب بلوچ راج ءِ سسا ءُ سما ءِ تہ ءَ انچو پھتگی اتکگ کہ “اجتماعی” نکس ءُ نپ ءِ تہ ءَ تپاوت کَشگ ءِ کابل بوتگ، البت اے گپ اوں وتی جاہ ءَ راست انت لھتیں پاکستانی کاسگ لیس ءُ زرھرید اوٹ ءَ کٹگ ءُ بے سوبی ءِ پیشدارگ ءِ کوشست ءَ کن انت آ پاکستان ءِ گچینکاریانی بھر انت زوراک ءِ داتگیں دپار ءِ ھلار کنگ ءِ ھاترا بلوچ لس مھلوک ءِ سرا پہ پاکستانی لشکر زوراکیانی ھمراھداری ءَ ھر وھد ءَ کن انت، بلے اے رنگیں چانوگر ءُ کاسگ لیس آں پاکستانی دلارانی راجی گھگیری ءِ دیم ءَ ایشاں ھچ بستار نیست، مرچی اے رنگ ءَ پاکستان ءِ اوٹ ءُ گچینکاری بائیکاٹ کتگ ءُ پیش داشتگ ما اے آسر ءَ سر بیں ھستیں وھد ءِ راجی جنز ءِ نزوری ءُ کمی درگیجگ بہ باں پاکستان ءِ زورگیری ءِ روچ زوت برکت بیت۔
