واشنگٹن(ہمگام نیوزڈیسک) مانیٹرنگ نیوز ڈیسک کے مطابق امریکی صدر ڈونلڈ ٹرمپ نے ‘بزنس فاکس نیوز’ کو دیے گئے انٹرویو میں توقع ظاہر کی کہ ایران کے ساتھ جنگ کی نوبت نہیں آئے گی۔ البتہ جنگ ہوئی تو امریکا طاقت ورثابت ہوگا۔ ان کا کہنا تھا کہ جنگ طول نہیں پکڑے گی، اور نہ ہی ہم بری فوج بھیجنے کا کوئی ارادہ رکھتے ہیں۔ٹرمپ نے کہا ہے کہ اگر ایرانی قیادت جوہری تنازع پر بات چیت کی طرف نہیں آتی تویہ اس کی بہت بڑی بے وقوفی اور ‘انا پرستی’ کا واضح ثبوت ہوگا۔
قبل زیں بدھ کے روز امریکی صدر نے کہا تھا کہ جنگ کی صورت میں ہم اپنی معاشی و فوجی حکمت عملی سے ایران کوجلد ہی گھٹنے ٹیکنے پر مجبور کر دیں گے۔ جنگ میں ہراعتبار سے امریکا کا پلڑا بھاری رہے گا۔ ان کا کہنا تھا کہ ایران کے ساتھ ممکنہ جنگ اس لیے زیادہ طول نہیں پکڑے گی کیونکہ اس میں بری فوج قصدا شامل نہیں کریں گے۔امریکی صدر نے منگل کے روز خبردار کیا تھا کہ اگر ایران نے امریکی مفادات کو نشانہ بنانے کی حماقت کی تو اس کے نتیجے میں ایران کوصفحہ ہستی سے مٹایا جاسکتا ہے۔ ان کاکہنا تھا کہ ایران کے موجودہ لیڈر اپنی قوم کامال دہشت گردی کے فروغ پر صرف کرتے ہیں اور یہ لوگ صرف طاقت کی زبان سمجھتے ہیں۔
