نیودہلی (ہمگام نیوز) مانیٹرنگ نیوز ڈیسک رپورٹ کے مطابق انڈیا کے علاقے بہار کے بھاگلپور ضلع میں جمعرات کی رات ایک تین منزلہ عمارت میں زور دار دھماکے ميں کم از کم 14 افراد ہلاک اور متعدد زخمی ہوگئے۔
پولیس اور ایمرجنسی سروس فوری طور پر جائے وقوعہ پر پہنچ گئی اور امدادی کاروائیاں شروع کر دیا۔
منہدم ہونے والی عمارت کے ملبے تلے دس سے پندرہ افراد کے دب جانے کا خدشہ ہے۔ زخمیوں کو مایا گنج کے جے ایل این اسپتال منتقل کیا گیا،
جہاں پہنچتے ہی ڈاکٹروں نے چار لوگوں کو مردہ قرار دے دیا۔ باقیوں کا علاج جاری ہے۔ یہ واقعہ ضلع کے کاجولیچک علاقے میں ایک یتیم خانے سے ملحقہ علاقے میں پیش آیا، جو مقامی تھانے سے 100 میٹر سے بھی کم دور ہے۔ زور دار دھماکے سے ملحقہ دو سے تین مکانات کو بھی نقصان پہنچا۔
ایک پڑوسی بنام محمد یوسف کے مطابق تباہ شدہ عمارت کے مکین پٹاخے بنانے کا کاروبار کرتے تھے۔ بھاگلپور رینج کے ڈی آئی جی سوجیت کمار نے بتایا کہ دھماکے کی بنیادی وجوہات بارود، غیر قانونی پٹاخے اور عمارت میں رکھے ہوئے دیسی ساختہ بم تھے۔ پولیس نے بتایا کہ تحقیقات کا آغاز کر دیا گیا ہے اور فرانزک ٹیم کے جائے وقوعہ کا معائنہ کرنے کے بعد مزید تفصیلات شیئر کی جائیں گی۔
