بیوٹمزکے انتظامی امور میں بلوچوں کو نمائندگی نہ دینا باعث افسوس ہے، BSAC

کوئٹہ(ہمگام نیوز)بلوچ اسٹوڈنٹس ایکشن کمیٹی کے مرکزی ترجمان نے اپنے جاری کردہ بیان میں کہا کہ بیوٹیمز کے انتظامی امور میں بلوچوں کو نمائندگی نہ دینا باعث افسوس ہے۔یونیورسٹی میں ایک مخصوص گروہ پورے انتظامی امور کو یرغمال بنائے ہوئے ہے جو انتظامی امور پر اپنے من پسند افراد کے ذریعے تسلط برقرار رکھنا چاہتا ہے۔یہ مخصوص گروہ پچھلے ایک سال سے یونیورسٹی پر برا جمان ہے جن سے طالب علموں سمیت ٹیچنگ فیکلٹی مطمئن نہیں ۔ حال ہی میں یونیورسٹی انتظامیہ نے میرٹ کی دھجیاں اڑا کر اپنے من پسند افراد پر مشتمل سینٹ کمیٹی تشکیل دی تھی ۔ترجمان نے مزید کہا کہ سینٹ کمیٹی کی تشکیل انتخابات اور برابری کی بنیاد پر ہونا چاہیے تھی لیکن بیوٹیمز میں ایک مخصوص گروہ کے مفادات کو مدنظر رکھ کر سلیکشن کمیٹی تشکیل دی گئی جو قابل مذمت عمل ہے جسے کسی صورت قبول نہیں کیا جاسکتا۔ بیان میں گورنر بلوچستان اور بلوچستان ہائیکورٹ سے اپیل کرتے ہوئے کہا گیا ہے کہ وہ طلبا و طالبات کی تشویش کو مدنظر رکھ کر موجودہ سینٹ کمیٹی کو تحلیل کرکے نئی کمیٹی تشکیل دینے کے احکامات جاری کریں اور بلوچوں کو بھی سینٹ کمیٹی میں نمائندگی دی جائے۔