تربت، بلوچستان یونیورسٹی کے دو طلبا کی عدم بازیابی کے خلاف تربت یونیورسٹی میں طلبہ کا احتجاج

تربت(ہمگام نیوز)مقبوضہ بلوچستان کے شہر کوئٹہ میں قائم بلوچستان یونیورسٹی کے ہاسٹل سے پاکستانی خفیہ اداروں کے ہاتھوں جبری گمشدگی کے شکار بلوچ طلباء سہیل بلوچ اور فصیح بلوچ کی جبری گمشدگی اور عدم بازیابی کے خلاف تربت یونیورسٹی کے طلبہ و طالبات نے بدھ کو کلاس کا بائیکاٹ کرکے واک کیا اور دونوں طالب علموں کی بازیابی کا مطالبہ کیا، طلبہ نے کہا کہ ایک نومبر کو بلوچستان یونیورسٹی کوئٹہ کے ہاسٹل سے فورسز نے دو نوجوان طالب علموں کو پاکستانی خفیہ اداروں نے جبری گمشدگی کا نشانہ بناکر نامعلوم مقام پر منتقل کردیا اور ان دونوں کی بازیابی کے لیے وہاں طلبہ سراپا احتجاج ہیں ان کی حکومت کے ساتھ مزاکرات ناکام ہوگئے ہیں جس کی وجہ سے بلوچستان یونیورسٹی کئی دنوں سے بند ہے اور امتحانات کا بائیکاٹ کیا گیا ہے-