کوئٹہ ( ہمگام نیوز) بلوچ نیشنل موومنٹ کے مرکزی ترجمان نے سندھ میں سندھی اور پشتونوں کے درمیان حالیہ کشیدگی پرتشویش کا اظہار کرتے ہوئے کہا کہ محکوم اقوام کا آپس میں دست و گریبان ہونا نہایت افسوسناک ہے۔ اس سے ہم مظلوموں کی طاقت تقسیم ہوگی۔ اس تقسیم کو بلوچ، سندھی اور پشتونوں کے مشترک دشمن پاکستان اپنی کامیابی گردانتا ہے۔
انہوں نے کہا پاکستان نے ہمارے ہمسایہ برادر ملک میں جنگ برپا کرکے انہیں مجبور کیا کہ وہ اپنا ملک چھوڑ کر یہاں آئیں۔ اس صورتحال کا فائدہ اٹھاکر پاکستان نے پناہ گزینوں کا سارا بوجھ بلوچ اور سندھیوں پر ڈالا۔ اس کے معاشی اور سیاسی اثرات بھی ہم پر پڑے لیکن برادر ملک اور قدیم تعلقات کی بنا پر بلوچ اور سندھیوں نے انہیں ہر وفعہ مہمان کے طور پر قبول کیا مگر پاکستان نے ہماری سخاوت اور مہمان نوازی اور افغانوں کی مجبوری کا فائدہ اٹھاکر انہیں کئی مواقع پر اسلامی تنگ نظری، مذہبی انتہا پسندی، اور بنیاد پرستی کی طرف دھکیلا۔ اس سے سندھ اور بلوچستان کی سیکولر ماحول پر بُرے اثرات پڑے۔
ترجمان نے کہا کہ پاکستان نے افغان مہمانوں کو پناہ گزین رکھنے کے بجائے انہیں شناختی کارڈ اور ڈومیسائلز سے نوازا۔ اس طرح یہاں ڈیموگرافک تبدیلی کے لئے راستے ہموار کئے گئےلیکن اب پناہ گزینوں کیلئے ضروری ہے کہ وہ اس سرزمین کے ساتھ مکمل وابستہ رہیں اور اس کی سلامتی سمیت امن اور خوشحالی کے لیے کام کریں جہاں وہ بستے ہیں۔ یہ ایک فطری عمل ہے۔ دنیا میں جہاں بھی پناہ گزین ہیں وہ اسی ملک کی اصول و ضوابط کے ساتھ زندگی گزارتے ہیں اور وہاں integrate ہوجاتے ہیں۔ یوں وہ اس ملک کی فلاح و بہبود، سلامتی اور ترقی میں کردار ادا کرتے ہیں۔ اس صورتحال میں سندھ اور بلوچستان میں موجود پناہ گزینوں کو پاکستان کے مظالم کے سامنے کھڑا ہونا چاہیئے نہ کہ ان مظلوم اورمیزبان اقوام کے سامنے۔
