وهدے که گرماگ ءِ پیتاپیں روچے ءِ پگاه ءَ جنگل ءَ رویت ، ڈگارانی تها ، کاهانی سرا شما درپشوکیں الماسانی برشک و شهم ءِ داب دابیں رنگ و رُژناں گندیت ؛ سُهریں ، زردیں ، نیلیں و … که روچ ءِ رُژن و نیر ءِ چیرا ، ترپگ انت . پیتاپ ءِ چیرا رُژن شاننت .
شما وهدے که دیماتر رئیت ( رویت ) تاں بزانیت که اے چے انت ، گندیت که اوداں شپ نمب ءِ ترینز انت که کاهانی سئے کُنڈیں تاکانی سرا مُچ بیتگ انت و روچ ءِ پیتاپ ( آپتاپ ) ءِ چیرا ترپگ انت .
همے کاهانی تاکاں کمے زِبر انت و پُژک اش پِر ۔ بهمل ( مهمل ) ءِ داب ءَ .
شپ نمب ءِ ترمپ همے تاکانی سرا سُر انت و لیٹ ءَ ور انت ؛ و تاکاں هم تَرّ ءَ نه کن انت .
وهدے که شما چه هما کاهاں ، تاکے ءَ بے سار ءِ دارگ ءَ سِندیت ، گڑاں هما پٹک ، ترپوکیں ٹوپُکے ءِ داب ءَ لیٹ ءَ وارت و شما جوانی ءَ نه گندیت که چون تاک ءِ بُن ءِ نیمگ ءَ رَؤت . بیت که گوں هیالداری ، شما چشیں ترمپ داریں تاکے ءَ به سندیت و گلاسُک ءِ داب ءَ ، آئی ءَ په آرامی وتی دپ ءِ نیمگ ءَ به بَریت و شپ نمب ءِ آپ ءَ به تِنگیت ، گڑاں شما هیال ءَ کنیت که شپ نمب ءِ آپ چه جهان ءِ شربتاں ، وشتام تر انت .
