نبشتانک: کریم تھل
سی و چل سال پیش ءِ گپ انت که ازرائیلی ، فلسطینی شهراں و هنداں واهندی کناں و په وتی مردماں لوگ و جاه بنداں بوت انت و ازرائیلیانی ٹینکاں هر جاه فلسطینیانی دیما در کپت و بیهار دیان اتنت ، بلے فلسطینی کسانلک و پنچ و شش سالی چکلکاں که وتی پت و مات ءِ درداں و ارسانی شاهد اتنت ، هما ازرائیلی ٹانک و سلیهبندیں پئوجیانی دیما درکپت انت و گوں بیست و سی گرمی یا چارک کیاسی ڈوککاں آهان جناں بوت انت و اے کسانکیں زهگلکانی هر روچی کار ، وت ماں فلسطین ءَ مزنیں زرمبشتے بوت که « انتفاضه » یا باهند نامینئگ بوت . امریکا و ایدگه زوراکیں ملکاں همے پنچ و شش سالی زهگکاں که سنگک اش دست ات « تروریست » گوئشت و وت هما وهد هون واریں دز و مردم کشیں گلبدین راکتیار و سیاف ءَ برت و هردابیں راکٹ و جنگی هتیار و ملیونانی هساب ءَ زر دات تاں اوگانستان و اوگانانی ملک ءَ بیران و تباه بکن انت و مردماں بکش انت تاں آهاں « مجاهد کبیر » ءِ نام دیگ ببیت .
نوں مرچاں هما زهگلکاں ماں فلسطین ءَ رُستگ انت و مزن بوتگ انت بلے آهانی دل ءَ زلم و زورگری ءِ هلاپ ءَ کینگ ءِ آس جمبور انت و آهانی راج ءِ واهگاں و آهانی آزاتی تان هنون پیلو نبوتگ انت . نون هما زهگلکاں که هرکجام شیر و مزارے ءِ هم درور انت پدا ازرائیلیانی دیما در کپتگ انت ، بلے اے گَشتیں آهانی دست هما چارک کیاسی ڈوکک نه انت ، بلکیں هما مرد ور و زندوریں هتیار انت که پیش ءَ تهنا ازرائیل ءِ پئوجیانی دست اتنت و مرچیگیں جنگ ، اگں مرچی فیصله مه بیت ، باندات هنگت ترندتر و پر هون تر بیت . اے جنگ ءَ ازرائیل و ازرائیلیاں گوں فلسطینیانی ملک و ڈگارانی واهندی کنئگ و آهاں دران ڈیه کنئگ ءَ ، بُنگیج کرته ، بلے فلسطینی گوں وتی هک ءِ گرگ ءَ پیکه اے جنگ ءَ هلاس بکن انت . بلے باریں ازرائیلی په فلسطینیانی هکانی منئگ ءَ تیار انت یا وتی زوراکیں پشتیوانانی سرا که هنون وت نزور و سست بیان انت ، هنگت تماه و امیتے اش هست ؟ اے جنگ ءِ هلاسی هم فلسطینی و هم ازرائیل ءِ پایده انت ، بلے هما وهد که زورگری هلاس و یک و دگر ءِ هک ءَ به من انت .
