ھیروشمیا ءُ ناگاساکی ءِ سرا جوہری بمب ءِ ترْاکینگ ءَ پَد دنیا پوہ بُوت کہ جوہری تراک چِنچو بیم ناک ءُ ھترناک اِنت، اے ترْاکاں پَد دنیا ءَ جوہری بمب داروکیں اِستان کڈن کُت اَنت کہ اے رنگیں بمب ھِجبر کار مرز کنگ مہ بنت
ماں جاپان ءَ ایٹمی تراکانی تباھی ءَ پد یونائٹیڈ نیشن ءِ گل ٹاھینگ بوت، تاکہ آ دنیا ءَ چہ اے رنگیں تباھیاں بہ رکین اِیت ءُ ماں دگنیا ءَ ایمنی ءِ ھاترا ٹوھیں کردار یے ادا بہ کنتِ.
مرچی دنیا ءِ تہا ایٹمی بمب جوڑ کنیں استان پہ میان استمانی ایمنی ءِ واستہ مزنیں ھترءَ زانگ بنت ءُ اے استانانی سرا مالی ءُ سیاسی پابندی ھم جنگ بوھگ ءَ اِنت، تاکہ آ ایٹم بمب جوڈ کنگ ءِ پروگرام ءَ چہ دزکش بہ بنت، بلے ما گندیں بازیں استان اے پابندیاں مان نیارگ ءَ انت ءُ جوھری بمب ءِ جوڈ کنگ ءَ ھِچ چک ءُ پد بوھگ ءَ نہ اَنت. اے استانانی تہا مستریں نام ایران ءُ شمالی کوریا انت، کہ آ پہ میان اُستمانی ایمنی ءِ واستہ بلاھیں ھتر ءَ زانگ بنت۔
میان اُستمانی ایمنی ءِ رکینگ ءِ ھاترا گوْستگیں رُوچاں امریکہ ءِِ سدر ڈونلڈ ٹرمپ ءَ امریکہ چہ ایران جوہری ڈیل ءَ درَکُت، آئی ءِ گُشگ اَت کہ اے ڈیل ءَ ایران مُوہ داتگ کہ آ یورینیم پیداک بہ کنت، پمیشکہ ماں اے ڈیل ءَ چہ دَست کَشی ءَُِ جار ءَ جن ایں، ءُ ایران ءِ سرا گِیشیں پابندی جن ایں تاکہ آ یورنییم ءِ پیداک کنگ ءِ کار ءَ یل بکنت۔ ایران جوہری ڈیل ءِ بابت ءَ امریکہ ءِ اے گامگیج ستا کرزیت، پرچہ کہ دو ہزار پانزدہ ءِ ایران جوہری ڈیل ءَ ایران ءِ گردن ءَ اِیریں سیاسی ءُ مالی پابندیانی بار سُھبک کُت کہ چَرھِشی ءَ ایران ءَ پائدگ چِست کت ءُ مشرقی وسطی ءِ لگام ءَ وتی دست ءَ کنگ ءِ ھاترا مشرقی وسطی ءَ دزمانگیجی بندات کُت۔ اے ڈیل ءِ سوب ءَ ایران ءَ یورینیم ءِ پیداک کنگ ءِ کوشست ھم تیز کُت کہ اے کار پہ دگنیا ءِ ایمنی ءِ واستہ یک مزنیں ھَترایے زانگ بیت.
ایران ءِ سرا گیش ایں پابندی جنگ یک جوانیں گامگیج یے بلے پاکستان ءِ ھلاپ ءَ ھِچ رنگیں گامگیج چست کنگ بوھگ ءَ نہ انت پرچہ؟ چیاکہ میان استمانی ایمنی ءِ واستہ ایران ءِ ھمرائی ءَ پاکستان ھم یک مزنے ھتراے، دنیا ءِ بازیں استاناں اے پرشانی ءِ اِزھار کتگ کہ پاکستان یک زمہ داریں استانے نہ انت، یک گیر زمہ داریں استانے ءِ گْورا جوہری بمب ءِ بوھَگ پہ میان اُستمانی اَمن ءِ واستہ یک ٹوھیں ھتراے۔ تُرْس ءِ گپ اِش انت کہ اگاں پاکستان ءِ ایٹم بمب پاکستان ءِ پوج ءِ رُودینتگیں نیکراھی ناشرکارانی دست ءَ بیا اَنت،گُڈا دنیا یک رندے پدا ناگاساکی ءُ ہیروشیما ءِ سرا کَپوکیں آپتانی گندگ ءَ دیر نہ کنت۔ اے ھیال ءِ تہا ھِچ رنگیں شک مان نیست کہ پاکستان ءِ ایٹم بمب یک ناں یک روچے الّم پاکستان ءِ ناشرکاریں پوج ءِ رودینتگیں نیکراھی ناشرکارانی دست ءَ کَپ انت، پرچہ کہ پاکستان ءِ ایٹم بمب مُور ءُ مھکمیں دستاں نیا انت، اگاں اے نیکراھی ناشرکاراں امریکہ ءِ پیمیں مور ءُ ڈبتگیں استانے ءِ تہا دنیا ءِ بیپاری بنجاہ (ورلڈ ٹریڈ سینٹر ) ءِ سرا اُرش کنگ ءِ واک ءُ وس اَست، گڈا پہ اِشاں پاکستان ءِ وڈیں نابود ءُ شُلیں استانے ءِ جوہری بمبانی سرا دست رَس ھاسل کنگ بلائیں گپے نہ اِنت۔ بلے پاکستان ءِ ایٹم بمب چاھئے نیکراھی ناشرکارانی دست ءَ بنت یا پاکستان ءِ ناشرکاریں ءُ زور گِریں پوج ءِ، مانا یک اِنت، پرچہ کہ پاکستان ءِ پوج ءِ ءُ نیکراھی ناشرکارانی میان ءَ ھِچ رنگیں دِگری نیست ِ، اے دوھیں یکیں مارءِ وارتگین اَنت۔ پاکستان ءِ پوج ءُ آئی ءِ مھلوک گپ، گپ ءِ سرا ھندوستان ءَ ایٹم بمب جنگ ءِ بہار دنت۔ اے گپ پدر کنت کہ پاکستان ءِ گوْرا ایٹم بمب بوھَگ پہ ھندوستان ءِ ءُ بر ء سگیر ءِ مھلوک ءِ واستہ چِنچوکیِں بلائیں ھترایے۔ پاکستان ناں تھنا بر ءسگیر بلکیں سرجمیں دنیا ءِ واستہ یک بلائیں ھترایے، پرچہ کہ پاکستان ایٹم بمب جوڈ کنگ ءِ ٹیکنالوجی ءَ ایدگہ نابود ءُ گیر زمہ داریں ملکاں دیگ ءَ چک ءُ پد نہ بیت۔ پاکستان ءِ سائنسدان داکتر کدیر ءَ کلانی دیما اے گپ منّیتگ کہ ما ایران ءُ شمالی کوریا ءَ جوہری بمب جوڑ کنگ ءِ ٹیکنالوجی داتگ ۔ھمے ٹیکنالوجی ءَ چہ ایران ءُ شُمالی کوریا ءَ نیوکلیر بمب جوڈ کُت کہ مروچی اے ھَردوئیں استان پہ سرجمیں دنیا ءَ ھترا ءُ بِیم جوڈ بوتگ اَنت، بلے بژن ءِ گپ ھِش اِنت کہ دنیا ءَ پاکستان ءِ اے گیر ذمہ داری ءِ سرا ھِچ وڈیں گامگیج چِست نہ کُت بلکیں اے ردا دنیا چٹ بے تِرْک ءُ توار اَت۔ بائید وَ ھِش اَت کہ دنیا ءَ پاکستان ھما روچ ءَ مان تَرّینت اِنت کہ پاکستان ءَ ھندوستان ءِ زِدّ ءَ اے انسان کُشیں بمب جوڈ کُت، ءُ پدا ھمے بمب ماں بلوچستان ءَ چاگی ءِ ھند ءَ پہ چار ءُ تپاس ءِ ھاترا راسکوہ ءِ دلبند ءِ سر ءَ ترْاک اینت۔ بلے دنیا ءَ اے درگت ءَ اِچ پیمیں زھر شانی درشان نہ کُت۔
پاکستان ءِ ایٹم بمب جوڈ کنگ ءِ بنداتی روچاں بلوچ راج آئی ءِ چار ءُ تپاس ءِ تراک ءِ آماچ بوت، پرچہ کہ پاکستان ءِ نیوکلیئر بمب ماں بلوچستان ءِ ھما ھند ءَ ترْاکینگ بوتگ کہ آ ھند ءَ بلوچ مھلوک آباد ءُ جاہ منند اِنت ۔ تراک ءَ رَند اُود ءِ جاہ منند ایں بلوچ مھلوک جُتا جتائیں نادُرائیانی آماچ بوت انت۔ پَٹ ءُ پولکارانی گُشگ اِنت کہ اے ہلک ءُ دمگاں مھلوک جُتا جتائیں نادرائیانی آماچ اِنت کہ آئی ءِ سبب اے ھند ءَ نیوکلیئر تراک ءِ Radiation ءِ سان (اَثر) اِنت۔ پاکستان ءِ جوہری بمب آماچیں ھند ءُ دمگاں بیتداک بوتگیں نُنُّک جتا جتائیں جنیاتی جیڑانی آماچ انَت، بزاں آ لنگ، کُور ءُ نیم توام پیداک بوھَگ ءَ انت
ما اگاں نیوکلیر تراک ءِ Radiation effect آں میڈیکل سائنس ءِ لیکہ ءِ بنیاد ءَ بچار ایں گڈا مارا چراِشی ءِ سوَب ءَ پیداک بوہوکیں بازیں نادرائی یے گندگ ءَ کیت، مسلن:
یک: heart failure: جوہری ترْاک ءِ Radioactive materials آنی سبب ءَ انسان ءِ جسم ءِ تہا گونڈیں گوْنڈیں Blood vessel ھُشک ءُ کلائینچ بنت کہ چرائی ءِ سبب ءَ انسان ءِ دل کار کنگ ءَ یَل کنت ءُ انسان بیران بیت ۔
دو: Brain: جوہری تراک ءِ Radiation انسان ءِ دماگ ءِ مجْگ ءِ تہا سان دور دنت کہ آئی ءِ سوَب ءَ انسان سَرّا بَرّا بیت
سَے: Thyroid: نیوکلیئر Radiation انسان ءِ جان ءِ تہا potassium Iodide یانی سرا سان دور دنت کہ چرائی ءِ سوب ءَ انسان ءِ جسم ءِ تہا Thyroid ءِ تمامیں بَھر ھتم بنت۔
چار: Blood System: اگاں نیوکلیئر تراک ءِ سان ءِ زور سَد Rem ءَ بیت گڈا انسان ءِ ھون ءِ Lymphocyte cell ءِ جھلی ءُ بُرزی ءِ تہا دِگری کیت
پنچ: Reproductive Track : اشی ءِ مراد اِش انت کہ Reproductive Track cell آنی بھر ءُ بانگ ءَ بوھَگ ءِ سوَب ءَ انسان ءِ جسم ءِ بازیں بھر کلائینچ بنت کہ چرائی ءِ سوَب ءَ انسان سَنٹ جوڈ بیت
شَش: gastrointestinal tract: جوہری تراک ءِ Radiation ءِ سان Nausea ءِ نادرائی ءِ سبب جوڈ بیت کہ چرائی ءِ سوَب ءَ انسان ءِ دپ ءَ چہ ھون درکیت یا انسان ھون شان ایت۔
نیوکلیئر Radiation ءِ سوب ءَ پیداک بوہوکیں تمامیں نادرائی، کہ آیانی ذکر من بُرز ءَ کت، چاگی ءِ جاہ منندیں مھلوک اے کُلیں نادریانی آماچ انت.
ھمے پیما The Environment Literacy Council ءِ ردا نیوکلیئر مواد ءَ چہ رُودوم زوروکیں Ionized Radiation گوات ءُ موسم ءِ سرا ھترناکیں ءُ زھَریں سان دور دانت، کہ چراِشی ءِ سبب ءَ تُوم ءِ رُودوم کمزور بیت، بزاں Ionized Radiation ءَ چہ سان زُورتگیں ھَند ءُ دمگاں درْچک نہ ُرودیت ۔ 1986 ءَ ماں روس ءَ Chernobyl نامیں Nuclear Plant یے پِژار بندیت (لیک بیت )، کہ اَچ آئی ءِ سوَب ءَ Radiation pollution کِِش ءُ گوْر ءِ ھند ءُ دمگاں وتی امبازاں زوریت، کہ چرائی ءِ سبب ءَ اے ھَند ءُ دمگاں Plant Growth ھتم بیت ۔ Plant Growth ءِ ھَتم بوھَگ وت ھَم انسان ءِ زندمان ءِ واستہ مزنیں ھتراھے۔
ماں چاگی ءَ جوہری تراک ءِ ھند دمگاں Ionized Radiation ءِ سان انگت موجود انت کہ اُود ءِ Plant Growth ءَ را نُکسان دیگ ءَ انت ءُ توم ءِ رودوم باز کمزور انت۔ اگاں اے ہلک ءُ دمگاں گیشیں پٹ ءُ پول کنگ بہ بیت گڈا اے ہلک ءُ دمگاں چہ نیوکلیئر تراک ءَ ودّوکیں گیش ایں زَھریں سان مارگ بیت کہ آ پہ انسان ءِ زندگی ءَ باز ھترا انت، بلے پاکستان ءِ زورگریں پوج ءَ پٹ ءُ پول کار اے ھند ءُ دمگانی روگ ءَ کڈن کتگ انت، پرچہ کہ پاکستان اے گپ ءَ شَر پوہ اِنت کہ اگاں پٹ ءُ پول کار ماں چاگی ءَ جوہری تراک ءِ ھند ءَ برْوانت، گڈا پاکستان ءِ سیائیں دیم دنیا ءِ دیما شَر سھرا ءُ پدر بیت۔ ماں دنیا ءِ تمامیں میان استمانی انسانی ھکانی پلّہ مرزاں گوں دست بندی کنیں کہ آ وتی پٹ ءُ پولکاراں ماں بلوچستان ءَ راہ بدی انت تاکہ اے گپ دنیا ءِ دیما سھرا بہ بیت کہ پاکستان کجام کچّ ءَ ماں بلوچستان ءَ انسانی ھکاں لگت مال کنگ ءَ انت؟ بلے بژن ءِ گپ اِنت کہ دنیا اے درگت ءَ بے ترْک ءُ توار اِنت۔ دنیا ءِ بازیں ھاموشی ءَ پاکستان ھوَس کتگ، آ گیشتر میان اُستمانی قانود ءَ لگت مال کنان انت۔ اگاں دنیا ءَ 1972 ءَ پاکستان ایٹم بمب ءِ جوڈ کنگ ءَ کڈن کتیں، مرچی ناں پہ دنیا ءَ سردردے اَت ءُ ناں آئی ءَ راسکوہ ءِ دل بند ءَ آس رُوک کتگ اَت ءُ ھزاراں بلوچ نپس کَشّیں نادْرایانی آماچ کتگ اَت۔ بلے انگت دیر نگْوستگ، دنیا اے ردا الم بہ جیڑ ایت۔ پاکستان ءِ ایٹم بمب ناں تھنا پہ بلوچ راج ءِ واستہ وبا ء جان اِنت، بلکیں اے انسان ءِ نسل ءِ تبا کنوکیں توپگ پہ سرجمیں دنیا ءِ واستہ یک بلائیں ھتراھے۔ نو بائید اِنت دنیا اے درگت ءَ گران بڈی مہ کنت ،انچو کہ دنیا پہ گلوبل وارمنگ ءَ پریشان ءُ تکانسُر انت ،ہمے پیما دنیا پہ پاکستان ءِ بیم ناکیں ایٹم بمباں ھم تکانسر ءُ پریشان بہ بیت ، پرچہ کہ پاکستان ءِ ایٹم بمب پہ دنیا ءِ واستہ چہ گلوبل وارمنگ ءَ کمیں ھترایے نہ اِنت، اگاں گلوبل وارمنگ ءَ چہ رکّگ ءِ ھاترا ارابانی ڈالر ھرچ کنگ بنت ءُ مزنیں گامگیج چست کنگ بیت, گڈا پاکستان ءِ جوہری بمبانی ھلاپ ءَ پرچہ اِچ رنگیں گامگیج چست کنگ بوھَگ ءَ نہ انت ؟ اگاں دنیا اے گواچن ءَ منّ ایت کہ پہ انساناں planet -B ءِ گیچین (option ) نیست، گڈا دنیا زمین ءِ رکینگ ءِ ءُ پھازگ ءِ جھُد ءِ تہا ءَ جان بڈی مہ کنت، من سرپد باں زمین ءِ پھازگ ءُ ایمنی ءِ واستہ گلوبل وارمنگ ءَ چہ رکگ ءِ واستہ مزنیں گامگیج چِست کنگ ءِ ھَمرائی ءَ اے ھم ھژدری اِنت کہ دنیا پاکستان ءِ ایٹم بمباں ڈی پیوز بہ کنت ۔
