دنیا ءِ تہا کُل راج وتی سرا بوتگیں زُلم ءُ زوراکی یا وش ءَ شاتکامیانی روچ آں دار اَنت، اَنچو ما (بلوچ )هم وتی سرا بوتگیں زُلم ءُ زوراکیانی روچاں سیاه ایں روچانی هساب ءَ داریں، هیر، وَشی ءُ شاتکامی داں برطانیہ ءِ اِیردستی ءَ بِگر تاں روچ ء مرچی بلوچ ءَ نہ دیستگ، بَلے مئے سرزمین ءِ پُسّگ وتی راجی وت واجهیءِ هاترا سدآں سال جُهد کناں ءُ پیداک اَنت، آ بِرٹش سامراج ءِ اِیردستی بہ بیت یا بِرٹش سامراج ءِ جوڈ کتگیں مُلک پاکستان ءِ ایردستی، بلوچءَ ھروھدءَ وتی زمین ءُڈگار ءِِ پھازگ ءِ جھدءَ وتی نگراھیں جان بباداتگ انت. مرچی بلوچ پاکستان ءِ ھلاپ ءَ چو کوہ ء چِلتن ءَ مِک انت ءُ بلوچستان ءِ آجوئی ءِ درچک ءَ گوں وتی ھوناں سیر آپ کنگا اِنت. پاکستان وڈ وڈیں ھنر ءُ ھیلءَ، زلم ءُ زوراکی کنگ انت، تاکہ آ ھمے درچکءَ چہ ھُنڈالاں ولگْواج بہ کنت، ءُ وتی ہستی (وجود) ءَ برجم بدار ایت. دنیا بلوچ راجی جنز ءِ پلہ مرزی ءَ بہ کنت پرچہ کہ پاکستان ءِ ہستی تھنا پہ بلوچ راج ءَ ناں بلکیں سرجمیں دنیا ءِ سرا وباه ء جان ئے.
پاکستان، بِزاں زور پیداوریں مُلک کہ جوڑ بیت گُڑا درستاں پیش آ بلوچستان ءِ دلبند ءِ سرا کئیت، وتی لَگت آں اِیر کنت، پرچہ کہ آ وهدا ما بلوچ باز نزور بئیں ءُ لهتیں چیزاں پہ مارا هُنّپ جنْت ءُ لهتین ءَ زور ءُ زوراکی جَنت ءُ پَچّ گیپت، هما وهدا آغا عبدالکریم ءَهمے جُنز ءِ بُنپدّ اِیر کت ، تاں روچ مرچی همے جُنز اِنت پہ زمین پہ زبان ءُ راجی وت واجهی ءُ پجّار ءِ دمک آں گوازی کنان اِنت، منا ترا سرجمیں بلوچاں یکمُشتی ءِ جار ءَ پِرّ جنان ءُ دیم پہ وتی منزل ءَ رهادگیں. اِے همے مَنزل اِنت کہ مئے ایمان همیشی ءِ چادرءِ لَمبّ ءَ گوں ماهور ساچ ایں گُکّ ئے ءَ ڈَکّ داتگ ءُ بستگ. هیر گپ دراج بُوان اِنت ءُ من اِشی ءَ چہ پیش وتی سرهال ءَ لَگتمال بکناں، من رواں وتی سرهال ءِ نیمگ ءَ.
پاکستانءِ سائنسدان قدیر خان پنّام ءِ گُل خان ( من پمیشکہ اِشی ءَ گُل خان گُشاں کہ وتی راج ءُ تاریخ ءَ سرپد نہ اِنت) کہ آ وت اِیردستیں راج ئے ءَ گوں پیوندیں بَلے پہ پاکستان ءَ همے اِیردستیں راجانی نسل کُشی ءِ واستہ یک ایٹمی ہتهیار یے جوڑ کنت کہ همے ایٹمی تَراک اول سرا چکّاسگ ءِ بہانہ ءَ 28 مئی 1998 ءَ نواز شریف ءِ وزیراعظم ءُ اختر مینگل ءِ وزیر اعلی ئی ءِ دؤران ءَ چاگی ءِ دلبند ءَ جنئگ بیت، پدا همے گپ ءَ پاکستانی مظلوم کُشّیں سائنسدان قدیر خان وت رسانکدر ءِ تہا منّیت کہ همے ایٹمی تْراک پاکستانی حکومت ءِ رزا ءُ قدیر خان ءُ دگہ پاکستانی فوج ءِ سربرائی ءَ بوتگِ. اپسوز همے تراک ءَ بیست سال سرجم بوتگ بَلے انسان دوست ایں هچ وڑیں گَلّ یے ءَ پاکستان ءِ سرا ایکشن نہ زُرتک . بلے پرےگپ ءَ مارا هچ وڑا مایوس بوؤگی نہ اِنت کہ دنیا پرچہ اے ردا ھاموش انت ؟ بلکیں مارا دنیا ءِ دھیان وتئی نیمگ ءَ چِکّگ ءِ ھاترا وتی سرُپُر گیش کنگی انت ءُ دنیا ءِ دیما اِے گپ پدر کنائینگی اِنت کہ پاکستان ءَ مارا پہ تُپنگ ءِ زور ءَ اِیردست کُتگ ءُ پدا کُجام وڑا مئے نسل کُشی کُتگ ءُ کنگ ءَ اِنت ،بلوچ ءِ سرا هما تْراک کارمرز کُتگ کہ انسانی نسل کُشی ءِ گُڈّی جنگّی اَزباب اِنت کہ اے توپگ ءِ تباہ کاریاں سھرا کنگ ءِ ھاترا جاپان یک بلائیں مسالے دنیا ءِ دیم ءَ. هیر جاپان وت یک وت واجهیں مُلک ئے ءُ آ وهدا باز دیما بوتگ، پمیشکہ آئی ءَ وت ءَ یک هَدّیے ءَداں وتی پادانی سرا اوشتارینت ، بلے بلوچ ءَ چُشیں آسراتی نیست کہ راسکوہ ءِ دلبندہ دارمان کت بہ کنت اِے گپ ءَ دنیا شر پوہ انت کہ بلوچ ءِ پوزیشن چی اِنت، ءُ بلوچ بیست ءُ یکُمّی کَرن ءَ کجام هالا ایں .؟ پاکستان ءِ ایٹمی تراک ءِ سوب ءَ چاگی ءِ ھند ءُ دمگاں وڈ وڈیں نادرایاں سر چِست کت کہ چرائی ءِ سبب ءَ سدانی بلوچ بیران بوتگ. بلوچ راج اے روچ ءَ، بزاں 28 مئی ءَ یک سیاہ ایں روچے ءِ بستار ءَ یاد کنت. بلوچ آجوئی لوٹوکیں گل اے روچ ءَ دنیا ءِ جتا جتاھیں ملکاں زھرشانی کنت ءُ پاکستان ءِ سیائیں دیما دنیا ءِ دیما پدر ءُ سھرا کنت. مُدامّی ایں سالانی وڑا اِے رندا هم ایف بی ایم، بزاں فری بلوچستان موومنٹ ءَ جار جَتّگ کہ آ ھمک سال ءِ پیما اے سال ءَ ھم 28 مئی ءَ َماں دنیا ءِ بازیں ملکاں پاکستان ء ِماں بلوچستان ءَ جوہری بمب ءِ کارمرز ءِ ھلاپ ءَ زھرشانی کنت. فری بلوچستان موومنٹ مدام اے رنگ ایں روچاں ماں دنیا ءِ جتا، جتائیں ملکاں دگانی سرا درکیت. اے ردا فری بلوچستان موومنٹ ءِ جھد ستا کرزیت. بلوچ مھلوک گیشاں چہ گیش فری بلوچستان موومنٹ ءَ گوں ھم کوپگ ءُ ھم دست بہ بیت تاکہ راجی جنز گیش ودّان بہ کنت
فری بلوچستان موومنٹ دنیا ءِ تمامیں انسان دوست، انسانی ھکانی پلہ مرز ءُ جوہری بمبانی ھلاپ ءَ زھرشانی کنوکاں گوں دست بندی کنت کہ آ 28 مئی ءَ فری بلوچستان موومنٹ ءِ زھرشانی اں وت ءَ ھوار بگیج اَنت
(بلوچ ، بلوچی ءُ بلوچستان سبز ءُ میزران بات آں)
