کابل(ہمگام نیوزڈیسک) غیر ملکی خبر رساں ادارے ایسوسی ایٹڈ پریس (AP) کی رپورٹ میں افغان حکام کے حوالے سے بتایا گیا کہ تقریب میں افغانستان کے چیف ایگزیکٹو عبداللہ عبداللہ سمیت حکومت کی اہم شخصیات موجود تھیں۔
شہر کی ایمبولنس سروس کے عہدیدار محمد عاصم کا کہنا تھا کہ دھماکے کے نتیجے میں 5 افراد زخمی ہوئے جنہیں طبی امداد کے لیے ہسپتال منتقل کردیا گیا۔
انہوں نے بتایا کہ متعدد ایمبولینسز جائے وقوع پر موجود ہیں۔
ایک اور افغان عہدیدار، جو مذکورہ تقریب میں موجود تھے، نے نام شائع نہ کرنے کی درخواست پر بتایا کہ دھماکے کے نتیجے میں ابتک 7 افراد جانبحق ہوئے جبکہ 10 زخمی ہیں۔خیال رہے کہ کابل میں جس تقریب میں دھماکے ہوئے، یہ 1995 میں ہلاک ہونے والے اور ہزارہ اقلیت سے تعلق رکھنے والے سیاسی رہنما عبدالعلی مزاری کی برسی کی تقریب تھی، جو طالبان حملے میں ہلاک ہوئے تھے۔
رپورٹ کے مطابق تقریب کی لائیو نشریات کے دوران محمد یونس قانونی نے عوام کو مخاطب کرتے ہوئے کہا کہ ‘پُر سکون رہیں، دھماکہ یہاں سے دور فاصلے پر ہوا ہے’۔
اور اس کے کچھ ہی دیر بعد دوسرے دھماکے کی آواز سنی گئی، جس کے بعد تقریب میں افراتفری پھیل گئی اور لوگوں نے جانیں بچانے کے لیے خارجی راستے کی جانب بھاگنا شروع کردیا۔
دوسرے دھماکے کے بعد ایک نامعلوم فرد کی آواز تقریب میں گونجی، جو لوگوں کو پُرسکون رہنے کا کہہ رہے تھے کہ ‘مارٹر حملہ یہاں تقریب سے بہت دور ہوا ہے’۔
واقعے کے بعد افغان وزیر خارجہ صلاح الدین ربانی، جو اس تقریب میں موجود تھے، نے سماجی رابطوں کی ویب سائٹ ٹوئیٹر پر ٹوئٹ کیا کہ دہشت گردوں نے برسی کی تقریب میں راکٹوں سے حملہ کیا۔
وزیر صحت محب اللہ کا کہنا تھا کہ ہسپتال سے ملنے والی ابتدائی معلومات کے مطابق حملے میں 3 افراد ہلاک اور 32 زخمی ہوئے ہیں، لیکن یہ تعداد مصدقہ نہیں۔
افغان وزارت داخلہ کے نائب ترجمان نصرت رحیمی کا کہنا تھا کہ دھماکے کا دعویٰ بھی کیا گیا ہے، انہوں نے مزید کہا کہ دھماکا مارٹر شیل کی وجہ سے ہوا جبکہ ایک فرد کو گرفتار بھی کیا گیا ہے۔
I strongly condemn the barbaric attack on the 24th martyrdom anniversary event for Shaheed Mazari today in Dasht-e-Barche in which I & many other public figures were also present. My thoughts & prayers are with all of our fellow citizens who were martyred & wounded in the attack
— Salahuddin Rabbani (@SalahRabbani) March 7, 2019
