کوئٹہ( ہمگام نیوز ) تفصیلات کے مطابق کوئٹہ پریس کلب کے سامنے جبری طور پر اغواء امتیاز لہڑی بلوچ کے بھتیجی عالیہ بلوچ نے پریس کانفرنس کرتے ہوئے کہا کہ جس درد اور تکلیف سے میں اور میرا خاندان اور امتیاز کی بوڑھے والدین گزر رہے ہیں اس کا اندازہ صرف اُن لوگوں کو ہوسکتا ہے جن کے پیارے پاکستانی فورسز ہاتھوں جبری طور پر گمشدگی کا شکار ہوچکے ہیں. امتیاز کی والدہ پاؤں سے معذور ہے اور اس کا دوسرا بھائی فالج کا مریض ہے.
انہوں نے کہا امتیاز احمد لہڑی کو 9 جون 2018 کو سریاب روڈ طارق اسکول کے سامنے سے ایف سی اور سادہ کپڑوں میں ملبوس اہلکاروں نے دن دھاڑے اٹھاکر جبری طور پر لے گئے. امتیاز احمد اسکول وین ڈرائیور تھا جو بچوں کو اسکول پہنچاتا تھا اور سیکنڈ ٹائم درزی کا کام کرتا تھا.
عالیہ بلوچ نے مزید کہا کہ امتیاز بلوچ کی والدہ بیٹے کی جدائی کے کرب میں ماری ماری پھرتی ہے مایوسی کے عالم میں امید اور حوصلے کے سہارے جی رہی ہے کہ ایک دن امتیاز کو واپس لاؤں گی. اقوام عالم تک ہماری آواز پہنچتی ہے لیکن پاکستان کے اداروں کے دلوں پر مہر لگ چکے ہیں.
عالیہ بلوچ نے صحافیوں کو مخاطب کرتے ہوئے کہا کہ صحافت کے پیشے کو مقدس اس لیے کہا جاتا ہے کہ اس میں حق و صداقت کے لیے آواز اٹھائی جاتی ہے۔ آپ امتیاز کے والدہ کی آواز ریاست کے عدالتوں اور ایوانوں تک پہنچائیں اور سوال اٹھائیں کہ ان کے بیٹے کو کس قانون کے تحت اٹھایا گیا ہے جبکہ ریاست پاکستان کا آئین کسی طور اس کی اجازت نہیں دیتی ہے۔
انہوں نے پاکستان کے عدالت عظمیٰ، عدالت عالیہ، انسانی حقوق کے اداروں اور سول سوسائٹی سے کہا کہ امتیاز احمد لہڑی کی باحفاظت بازیابی کے لیے آواز اٹھائیں اور ہمارے خاندان کو اس درد سے نجات دینے میں ہماری مدد کریں۔
کوئٹہ:جبری طور پر اغواء شدہ امتیاز احمد کو بازیاب کیا جائے.عالیہ بلوچ
