کوئٹہ(ہمگام نیوز) اطلاعات کے مطابق بلوچستان شہر کوئٹہ میں سی ٹی ڈی اور پاکستانی انٹیلیجنس و فورسز نے مشترکہ کارروائی کی جس کے نتیجے میں خاتون سمیت چھ افراد جانبحق ہو گئے۔ تفصیلات کے مطابق کوئٹہ کے علاقہ مشرقی بائے پاس پر سی ٹی ڈی اور انٹیلیجنس کی کارروائی کے دوران 2 افراد اور خاتون سمیت 6 افراد کو قتل کیا ۔اس کارروائی کے دوران فورسز نے اپنے 4 اہلکاروں کے زخمی ہونے کی تصدیق کی ہے ۔
سی ٹی ڈی ترجمان کے دعوی کے مطابق کوئٹہ کے نواحی علاقہ مشرقی بائے پاس پر گودام میں مسلح افراد کی خفیہ اطلاع پر کارروائی آج صبح کی گئی۔علاقے کو فورسز نے گھیرے میں لے کر گودام میں داخل ہونے کی کوشش کی تو پاکستانی فورسز کے دعوی کے مطابق ایک خود کش حملہ آور نے خود کو دھماکے سے اُڑا لیا اور گودام سے فائرنگ کا سلسلہ بھی شروع ہو گیا۔
فورسز نے جوابی کارروائی کی جس کے دوران 4 اہلکار زخمی ہوئے جنہیں سول اسپتال منتقل کیا گیا۔
بقول فورسز کے اس دوران ایک اور خود کش حملہ آور نے خود کو دھماکے سے اُڑالیا جبکہ فورسز کی فائرنگ سے ایک خاتون سمیت 3 افراد جانبحق ہوئے۔ سی ٹی ڈی اور فورسز کی یہ مشترکہ کارروائی تقریباً 5 گھنٹے میں مکمل ہوئی، علاقے میں پولیس اور ایف سی کی مزید نفری نے علاقے کو گھیرے میں لے لیا ہے۔فورسز ذرائع کے مطابق گودام سے اسلحہ و گولہ بارود بھی برآمد کیا گیا۔ جبکہ فورسز نے دعوی کیا ہے کہ ہلاک ہونے والے خاتون اور ایک مسلح شخص نے خود کش جیکیٹیں بھی پہن رکھی تھی۔
