کابل(ہمگام نیوزڈیسک) میڈیا اطلاعات کے مطابق افغانستان کی سپریم کورٹ نے افغان صدر ڈاکٹر اشرف غنی کی مدت صدارت میں الیکشن کے انعقاد اور نئے صدر کے انتخاب تک توسیع کردی۔
غیرملکی خبررساں ادارے کے مطابق افغان سپریم کورٹ نے افغان صدر اشرف غنی کی مدت صدارت میں توسیع کردی، اشرف غنی کی مدت صدارت 22 مئی کو ختم ہونا تھی۔
افغانستان میں صدارتی الیکشن 20 اپریل کو کروانے کا اعلان کیا گیا تھا تاہم ملکی صورتحال اور افغان امن مذاکرات کے سبب الیکشن کا انعقاد ممکن نہیں ہوسکا تھا۔
الیکشن کمیشن نے سپریم کورٹ میں موقف اختیار کیا کہ صدارتی الیکشن کی تیاری کے لیے وقت نہیں مل سکا، الیکشن کمیشن نے صدارتی الیکشن کے لیے 28 ستمبر کی تاریخ دے دی۔
افغان سپریم کورٹ نے اپنے فیصلے میں کہا کہ ملک کو درپیش خارجی و داخلی حالات اور معاشی بحران کا علم ہے اس لیے افغان صدر اشرف غنی کو صدارتی الیکشن ہونے تک صدارت کے عہدے پر فائز رہنے کی اجازت دی جاتی ہے۔
واضح رہے کہ افغان صدر اشرف غنی 2014 میں کامیابی کے بعد صدر منتخب ہوئے تھے۔
یاد رہے کہ گزشتہ ماہ افغان صدر اشرف غنی کا کہنا تھا کہ افغانستان میں امن چاہتے ہیں، سیکیورٹی آپریشن کے دوران عام شہریوں کی ہلاکتیں ناقابل قبول ہیں، عالمی برادری طالبان سے بات چیت کرے۔ہم اپنے ملک میں پائیدار امن چاہتے ہیں۔
