امریکہ کے دارالحکومت واشنگٹن ڈی سی کے نواح میں فائرنگ کے ایک واقعے میں کانگریس کے رکن اسٹیو اسکالس سمیت کم ازکم تین افراد زخمی ہوگئے ہیں۔
اطلاعات کے مطابق اسکالس دیگر ارکانِ کانگریس کے ساتھ واشنگٹن ڈی سی سے متصل ورجینیا کے علاقے الیگزنڈریہ کے ایک میدان میں بیس بال کی پریکٹس کر رہے تھے جب ان پر فائرنگ ہوئی۔
اطلاعات کے مطابق اسکالس کے کولہے میں گولی لگی ہے جب کہ فائرنگ سے ارکانِ کانگریس کی حفاظت پر مامور کیپٹل ہِل پولیس کے کم از کم دو اہلکاروں کے زخمی ہونے کی بھی اطلاع ہے۔
اسٹیو اسکالس کا تعلق ری پبلکن پارٹی سے ہے اور وہ جنوبی امریکی ریاست لوزیانا سے ایوانِ نمائندگان کے منتخب رکن ہیں۔
اطلاعات کے مطابق جس وقت فائرنگ ہوئی اس وقت ارکانِ کانگریس اپنے بیس بال کے سالانہ میچ کی پریکٹس میں مصروف تھے جو جمعرات کو ہونا ہے۔
فائرنگ کے وقت جائے واقعہ پر موجود ایک اور رکنِ کانگریس مو بروکس نے ‘سی این این’ کو بتایا ہے کہ فائرنگ کرنے والا شخص ایک سفید فام مرد تھا جس نے میدان میں موجود افراد کو نشانہ بنایا۔
مو بروکس کے مطابق فائرنگ کے وقت میدان میں 20 سے 25 افراد موجود تھے جنہوں نے ادھر ادھر چھپ کو اور زمین پر لیٹ کر خود کو بچایا۔
الیگزنڈریہ پولیس نے ایک ٹوئٹ میں مشتبہ حملہ آور کو حراست میں لینے کا دعویٰ کیا ہے۔ عینی شاہدین اور پولیس ذرائع کا کہنا ہے کہ حملہ سوچی سمجھی کارروائی لگتا ہے۔
