اسلآم آباد(ہمگام نیوز ڈیسک)افغان طالبان کی جانب سے اعلان کیا گیا ہے کہ امریکا کے ساتھ مذاکرات کا اگلا دور 18 فروری کو اسلام آباد میں ہوگا۔ مذاکرات کے اس دور میں افغان طالبان اور امریکا کے اعلی حکام شرکت کریں گے۔امریکا اور افغان طالبان کے درمیان مذاکرات کا اگلا مرحلہ محمد بن سلمان کی پاکستان آمد کے فوری بعد 18 فروری کو اسلام آباد میں ہوگا۔ تفصیلات کے مطابق افغان جنگ کے خاتمے کیلئے یہ اب تک کی سب سے بڑی پیش رفت ہوئی ہے۔
جبکہ پاکستان کی جانب سے بھی مذاکرات کے اس عمل میں شرکت کیے جانے کا امکان ہے۔
افغان طالبان کی جانب سے بتایا گیا ہے کہ مذاکرات کے عمل کو کامیاب بنانے کے سلسلے میں افغان طالبان کا وفد وزیراعظم پاکستان عمران خان سے بھی خصوصی ملاقات کرے گا۔ وزیراعظم پاکستان عمران خان سے پاکستان افغان تعلقات اور افغان مہاجرین سے متعلق بھی بات ہوگی۔ اس حوالے سے مزید بتایا جا رہا ہے کہ سعودی ولی عہد محمد بن سلمان کی جانب سے بھی افغان مذاکراتی عمل میں کردار ادا کیے جانے کا امکان ہے۔
یہی وجہ ہے کہ امریکا اور افغان طالبان کے درمیان مذاکرات کا اگلا مرحلہ محمد بن سلمان کی پاکستان آمد کے فوری بعد 18 فروری کو اسلام آباد میں ہوگا۔ واضح رہے کہ امریکی صدر ڈونلڈ ٹرمپ افغان جنگ جلد ختم کرنے کا اعلان کر چکے ہیں۔ اسی باعث گزشتہ 18 برس کے دوران پہلی مرتبہ امریکا افغان طالبان کے ساتھ سنجیدہ نوعیت کے مذاکرات کر رہا ہے۔
قوی امکان ہے امریکا افغانستان میں اقتدار افغان طالبان کے حوالے کر دے گا۔ اس حوالے سے افغان طالبان اور امریکا کے درمیان مذاکرات کے کئی سیشن ہو چکے ہیں۔ جبکہ اگلا سیشن اب اسلام آباد میں ہوگا۔
