اسلام آباد(ہمگام نیوزڈیسک) نیوزڈیسک رپورٹ کے مطابق ترجمان دفتر خارجہ ڈاکٹرمحمد فیصل کا کہنا ہے کہ امریکی نمائندہ خصوصی زلمے خلیل زاد اور امریکی نائب وزیرِ خارجہ ایلس ویلز آج پاکستان پہنچیں گے۔
ترجمان کے مطابق امریکی وفد دونوں ممالک کے درمیان جاری مشاورتی عمل کے ضمن میں پاکستان پہنچ رہے ہیں ۔ دونوں ممالک کے درمیان آج دفتر خارجہ میں دو طرفہ تعلقات اور افغان مفاہمتی عمل پر بات چیت ہوگی۔
زلمے خلیل زاد رواں ماہ کے آغاز میں بھی پاکستان کا دورہ کرچکے ہیں، جس کے دوران انہوں نے پاکستانی حکام کو افغان مفاہمتی عمل میں ہونے والی پیش رفت سے آگاہ کیا تھا۔
امریکی صدر ڈونلڈ ٹرمپ کی جانب سے پاکستان کو مذاکرات میں کردار ادا کرنے کی درخواست کے بعد افغانستان میں پائیدار امن کے قیام کے لیے کوششیں ہو رہی ہیں، اسی سلسلے میں امریکی نمائندہ خصوصی افغانستان، پاکستان، یواے ای اور قطر سمیت دیگر ممالک کے کئی دورے کرچکے ہیں۔یاد رہے کہ رواں ماہ 19 اپریل کو افغان طالبان اور افغان حکومت کے درمیان قطر میں ہونے والے مذاکرات آخری لمحات میں منسوخ کردیے گئے تھے۔
افغان حکومت کی مذاکرات کے لیے تیار کی گئی فہرست پرطالبان نے تنقید کرتے ہوئے کہا تھا کہ یہ شادی یا کسی اور مناسب سے دعوت اور مہمان نوازی کی تقریب نہیں کہ کابل انتظامیہ نے کانفرنس میں شرکت کے لیے 250 افراد کی فہرست جاری کی۔جبکہ افغان حکومت نے اس معاملے میں جوابی بیان جاری کرتے ہوئے کہا تھا کہ کہ ہم اپنے ملک میں پائیدار امن بارے مزاکرات میں زندگی کے تمام شعبوں سے تعلق رکھنے والے لوگوں کی شمولیت کے خواہاں ہیں۔
