ھلسینکی (ھمگام نیوز) پی ٹی ایم ءِ نیمگ ءَ ھلسینکی پن لینڈ ءِ پارلیمنٹ ءِ دیم ءَ زھرشانی کنگ بوتگ، اِے زھرشانی پاکستانی سرکار ءِ زوراکیں روشتانی بگیری ءَ کنگ بوتگ، پاکستان ءِ تہ ءَ اوگان مھاجرانی زوراکیں کشّگ ءُ درکنگ ءُ آیانی گس ءُ جاگھانی سر ءَ پنجاپی لشکر ءِ کبزہ ءِ بگیری ءَ تران کنوکاں وتی ھیال درشان کرتگ اَنت۔
پی ٹی ایم ءِ شپیک اللّہ یوسپزئی، جاوید پشتون، بنارس ھان، ابدالباری بڑیچ ءُ آ دگہ مردماں وتی ھیال درشان کرتگ ءُ گْوشتگ کہ پاکستانی سرکار ءِ نیمگ ءَ چہ اوگانی مھاجرانی زوراکیں کشّگ ءُ درکنگ یک بے رھبندی ءُ درکانودی گامگیجے۔ اکوام متھدہ ءِ جُست نہ کنگ ءُ اوگاناں چہ وتی گساں گْوں زوراکی ءَ کشّگ ءُ درکنگ ءُ آیانی لٹ ءُ کٹ کنگ یک درمردمی روشتے، پنجاپی لشکر ءِ بگیری ءَ اکوام متھدہ کرد ءَ پیلو بہ کنت ءُ پاکستان ءَ را پابند بہ کنت کہ آ اوگان ءِ مھاجرانی بگیری ءَ درمردمی روشت ءَ ھلاس بہ کنت۔
زھرشانی ءِ تہ ءَ آجوئی بلوچستان جُنز (ایف بی ایم) ءِ سادک رئیسانی ایڈوکیٹ ءُ ا بی مری ءَ وتی ھیال درشان کنان ءَ گْوشت کہ پی ٹی ایم ءِ رھشون منزور پشتون ءِ جرت مندیں گامگیج پہ پٹاناں یک یک مزنیں ارزشتے دار اِیت۔ آیاں دیمتر ءَ گْوشت کہ بلوچ ءُ اوگانی آنی راجدپتری سیادی نزّیکی ھست، بلوچ ءُ اوگاناناں گیش ءَ چہ گیش بلوچ ءُ اوگانی پارلیمانی گلاں نکس ءُ تاوان داتگ، اگاں راجدپتری ھساب ءَ بہ چار ئے پاکستان ءَ اوگانی آنی چکچینی ءِ درچ یکشل ءَ برجاہ داشتگ۔ ھمے وڑ ءَ پاکستان ءُ ایران ءَ بلوچ راج ءِ چکچینی ءِ درچ براجہ داشتگ، بلوچ راج انگریز ءِ گولڈ سمتھ ءُ ڈیورنڈ لکیر ءَ نہ من اِیت، بلوچ ءُ اوگان تپاک ءُ یکجاہ بہ بنت گُڑا آ مزن مزنیں دژمن ءَ ھم بے سوب کرت کن اَنت۔