تہران (ہمگام نیوز ڈیسک) ایرانی پاسدارانِ انقلاب کے سربراہ میجر جنرل محمد علی جعفری نے کہا ہے کہ اگر پاکستان نے اپنی ذمہ داریاں ادا نہ کیں تو ایران اپنی سرحدوں پر موجود خطرات کا جواب دینے کا حق رکھتا ہے۔ایران نے پاکستان کو خبردار کیا ہے کہ وہ رواں ہفتے بقول ان کے دونوں ملکوں کی سرحد کے نزدیک ایرانی فورسز پر ہونے والےحملے کے ذمہ داروں کو سزا دے ورنہ ایران خود ان کے خلاف فوجی کارروائی کرے گا۔ایرانی کمانڈر نے کہا کہ بین الاقوامی قانون ایران کو اپنے دفاع کا حق دیتا ہے جس کے تحت وہ حملہ آوروں کو سزا دینے کے لیے خود کارروائی کرے گا۔
واضح رہے کہ بدھ کو مقبوضہ بلوچستان میں خاش زاھدان کے قریب ایک قافلے پر خود کش حملے میں ایرانی فوج کے 27 اہلکار ہلاک ہوگئے تھے۔
ہلاک ہونے والے اہلکاروں کا تعلق ایرانی پاسدارانِ انقلاب کی سرحدی فورس سے تھا جن کی بس سے خود کش حملہ آور نے بارود سے بھری اپنی گاڑی ٹکرادی تھی۔
حملے کی ذمہ داری ایران میں سرگرم سنی تنظیم ‘جیش العدل’ نے قبول کی تھی جن کا کہناٰ ہے کہ وہ ایران میں آباد سنی العقیدہ اقلیت کو شیعہ اکثریت کے مظالم سے بچانے اور ان کے حقوق کے تحفظ کے لیے سرگرم ہے۔
ایرانی حکام کا الزام رہا ہے کہ اس کی حدود میں سرگرم ‘جیش العدل’ اور دیگر سنی تنظیموں کے سرحد پار پاکستان میں محفوظ ٹھکانے ہیں اور وہ بارہا پاکستان سے ان تنظیموں کے خلاف کارروائی کا مطالبہ کرتے رہے ہیں۔
تفصیلات کے مطابق ہفتے کو ایران کے سرکاری ٹی وی سے گفتگو کرتے ہوئے پاسدارانِ انقلاب کے سربراہ نے کہا کہ انہیں معلوم ہے کہ حالیہ حملے میں ملوث افراد کے ٹھکانے کہاں ہیں ؟ اور اگر پاکستان نے ان کے خلاف کارروائی نہ کی تو ایران انہیں خود سزا دے گا۔
جنرل محمد علی جعفری نے سعودی عرب اور متحدہ عرب امارات پر بھی ایران میں سرگرم سنی شدت پسند تنظیموں کی پشت پناہی کرنے کا الزام دہرایا اور کہا کہ ان دونوں ملکوں کو بھی اس کا خمیازہ بھگتنا پڑے گا۔
ایرانی جنرل کا کہنا تھا کہ حملہ آوروں کو ردِ عمل کا شکار علاقائی ریاستوں سعودی عرب اور متحدہ عرب امارات کی مدد حاصل ہے جو اسرائیلی اور امریکیوں کے حکم پر ان کی مدد کر رہی ہیں۔
