ایرانشہر(ہمگام نیوز ) گزشتہ روز ایرانی مقبوضہ بلوچستان کے شہر ایرانشہر میں دریائے دامِن سے دو بلوچ شہریوں کی لاشیں برآمد ہوئی ہیں۔ دونوں نوجوان مبینہ طور پر تیراکی اور نہانے کے لیے دریا پر گئے تھے، تاہم کئی گھنٹوں تک ان کا کوئی سراغ نہ ملنے کے بعد تلاش کے دوران ان کی لاشیں دریا کے قریب سے ملیں۔
ذرائع کے مطابق، جاں بحق ہونے والے شہریوں کی شناخت 20 سالہ مبین براہوئی، ولد امان، اور 22 سالہ عاصف شہلی بر، ولد عبدالواحد کے ناموں سے ہوئی ہے۔
مقامی ذرائع کے مطابق، دونوں نوجوان 11 ستمبر 2026 کو شام تقریباً 4 بجے ایرانشہر کے علاقے دامِن میں واقع دریا پر تیراکی اور نہانے کے لیے گئے تھے۔ کئی گھنٹوں تک ان سے رابطہ نہ ہونے کے بعد تلاش شروع کی گئی، جس کے نتیجے میں تقریباً شام 7 بجے دونوں کی لاشیں دریا سے نکال لی گئیں۔
ذرائع نے دعویٰ کیا ہے کہ ابتدائی طبی معائنے کے دوران دونوں لاشوں کے سروں پر چوٹ کے نشانات پائے گئے، جبکہ پھیپھڑوں میں پانی موجود نہ ہونے کا بھی دعویٰ کیا گیا ہے۔ ان مبینہ شواہد کی بنیاد پر خدشہ ظاہر کیا جا رہا ہے کہ دونوں نوجوانوں کو پانی میں پھینکے جانے سے قبل قتل کیا گیا ہو۔
ذرائع کے مطابق یہ قیاس بھی سامنے آیا ہے کہ ممکنہ طور پر دونوں نوجوانوں کے سر پر پتھر یا لکڑی سے وار کیے گئے اور اس کے بعد لاشیں دریا میں پھینک دی گئیں۔
تاہم، دونوں شہریوں کی موت کی اصل وجہ اور واقعے کی مکمل نوعیت کی آزادانہ طور پر تصدیق نہیں ہو سکی ہے۔ واقعے سے متعلق مزید تحقیقات جاری ہیں اور حتمی نتیجہ فرانزک اور قانونی تحقیقات کے بعد ہی سامنے آ سکے گا۔
