دبئی (ہمگام نیوز ) متحدہ عرب امارات کے وزیر مملکت برائے امور خارجہ انور قرقاش نے کہا ہے کہ ایران کی جارحانہ پالیسیاں ہی اس کے خلاف امریکا کی ا قتصادی پابندیوں کے دوبارہ نفاذ کی ذمے دار ہیں۔
انھوں نے ہفتے کے روز ایران کے خلاف امریکا کی دوبارہ پابندیوں کے نفاذ سے دو روز قبل ٹویٹ میں کہا ہے کہ اس ضمن میں خطے کے نقطہ نظر کو بھی ملحوظ رکھا جانا چاہیے۔وہ لکھتے ہیں کہ ’’بحران کے حل کے لیے ایران کو اپنی جارحانہ پالیسیوں کا خاتمہ کرنا چاہیے‘‘۔
امریکا ایران کے خلاف سوموار سے نئی مگر سخت پابندیوں کو متعارف کرا رہا ہے،ا ن کے تحت ایران کی تیل کی فروخت اور بنک کاری کے شعبے کو ہدف بنایا جائے گا۔ان کا مقصد ایران کی معیشت کو زبوں حال کرنا اور اس کو جوہری پروگرام پر دوبارہ مذاکرات کی میز پر آنے کے لیے مجبور کرنا ہے۔امریکا چاہتا ہے کہ ایران جوہری پروگرام کے علاوہ اپنے بیلسٹک میزائلوں کے پروگرام کو بھی ختم کردے اور مشرقِ وسطیٰ بھر میں اپنی گماشتہ تنظیموں کی حمایت سے باز آجائے۔
ایرانی لیڈر امریکا کے ساتھ اپنے جوہری پروگرام پر دوبارہ مذاکرات سے انکار کرچکے ہیں اور ان کا کہنا ہے کہ دنیا بھر میں صدر ڈونلڈ ٹرمپ کی یک طرفہ پالیسیوں اور اقدامات کی مخالفت کی جارہی ہے۔ واضح رہے کہ امریکی صدر نے 8 مئی 2018ء کو یک طرفہ طور پر ایران کے ساتھ جولائی 2015ء میں طے شدہ جوہری معاہدے سے دست بردار ہونے کا اعلان کردیا تھا لیکن باقی پانچ ممالک نے اس سے علیحدگی اختیار نہیں کی اور وہ اس کو بچانے کے لیے کوشاں ہیں۔
