بالی وڈ کے مزاحیہ اداکار قادر خان علالت کے بعد کینیڈا میں انتقال کرگئے

کینیڈا(ہمگام نیوز ڈیسک) بالی وڈ کے نامور مزاحیہ اداکار اداکار81 سالہ قادر خان کاکڑ دماغی مرض سپرا نیوکلیئر پالسی (Progressive Supra nuclear Palsy) میں مبتلا اور کافی دنوں سے کینیڈا کے اسپتال میں زیر علاج تھے۔گزشتہ رات اداکار کی حالت تشویش ناک ہوئی، جس کے بعد انہیں وینٹی لیٹر پر منتقل کردیا گیا، تاہم صبح سانس اکھڑنے کے باعث وہ دنیا سے رخصت ہوگئے۔تفصیلات کے مطابق قادر خان 22 اکتوبر 1937ء کو افغانستان کے دارالحکومت کابل میں پیدا ہوئے، ان کا تعلق مشہور پشتون قبیلے کاکڑ سے تھا۔انہوں نے اپنے فلمی کیریئر کا آغاز 1973ء میں ریلیز ہونے والی فلم ‘داغ’ سے کیا اور جلد ہی فلم نگری میں اپنے قدم جمالیے۔انہوں نے 300 سے زائد فلموں میں اداکاری کے جوہر دکھانے کے ساتھ ساتھ ڈھائی سو فلموں کے مکالمے بھی لکھے۔قادر خان نے مقبول فلم ’مقدر کا سکندر‘ میں اداکار امیتابھ بچن کا نام سکندر رکھا تھا جبکہ انہوں نے مشہور فلمیں ’قلی‘، ’امر اکبر انتھونی‘ اور ’شرابی‘ کے مکالمے بھی لکھے، جو یادگار ہیں۔ان کی مشہور فلموں میں ’مقصد‘، ’نیا قدم‘، ’آنکھیں‘ ، ’جڑواں‘ اور’میں کھلاڑی تو اناڑی‘ شامل ہیں۔ انہوں نے متعدد بار فلموں میں مزاحیہ کردار ادا کیا لیکن فلم ‘باپ ایک نمبری بیٹا دس نمبری’ پر انھیں بہترین کامیڈین کے فلم فیئر ایوارڈ سے بھی نوازا گیا۔امجد خان کے ساتھ انہوں نے کئی مرتبہ منفی رول یعنی ولن کے کردار بھی بہتر انداز میں ادا کیے۔