بلوچی اکیڈمی کے زیراہتمام بلوچی شاعری کے موضوع پر سیمینار کا انعقاد

کوئٹہ ( ہمگام نیوز) اطلاع کے مطابق بلوچی اکیڈمی کے زیر اہتمام قدیم بلوچی شاعری کے عنوان سے سیمینار کا انعقاد ہوا۔ دو دن کی اس سیمینار میں بلوچی زبان و ادب سے تعلق رکھنے والے ادباء اور محققین نے بلوچی قدیم شاعری کے مختلف پہلوؤں اور موضوعات کے بارے میں اپنے مقالے پیش کیے۔ 9 اور 10اکتوبر کو بلوچی اکیڈمی کمپلکس میں منعقدہ سیمینار میں بلوچی زبان کے نامور محقق اور ادباء ڈاکٹر واحد بخش بزدار، اکبر غمشاد، ڈاکٹر ضیا بلوچ، ڈاکٹر غفور شاد، شرف شاد، زاہدہ رئیسی، قدیر لقمان، ثانیہ امجد ، نسیم گُل، اسحاق رحیم اور نور الحق شاہ نے اپنے مقالے پیش کیے۔ اس سیمینار میں ادب اور شاعری سے تعلق رکھنے والے ادیبوں اور طلبہ نے شرکت کی اور مختلف سیشنز میں ان مقالوں کے بارے میں سوال و جوابات کئے گئے۔ بلوچی اکیڈمی کے زیر اہتمام اس سیمینار میں 11 مقالے پیش کیے گئے جن میں بلوچی قدیم شاعری کی تاریخ ، بلوچی کلاسیکل شاعری کی ابتدا اور ارتقاء، قدیم شاعری میں عروض اور صرف و نحو، قدیم شاعری میں عورتوں کے جذبات اور احساسات، بلوچی داستانوں کی دیگر ہمسایہ اقوام کے داستانوں میں تقابلی فرق، بلوچی شاعری میں محاورات اور ضرب المثل جیسے موضوعات شامل تھے۔ دو دن جاری رہنے والے اس سیمینار میں طلبہ اور بلوچی ادب و شاعری سے شغف رکھنے والے ناظرین کی بڑی تعداد نے شرکت کی۔