نبشتہ کار ۔ کریم بلوچ تھل
ھمگام بلوچی
دنیا کجا شتگ و رستگ ، بلوچ کجام پگر و هیالاں وتا بستگ و پتاتگ . ادان منی مراد لَس ( عام ) مردم نه انت ، بلکیں هما مردم انت که وتا واننده و زانتکار گوئشنت . مئی وانندهانی لیکهانی بنیات ءَ ، سماج و اجتماع ، اوشتوکیں چیزے گندگ بیت ، و آئیا « کاست » ءِ داب ءَ چاراں و بهر – بهر کنان انت و مردمانی جند ءَ _ لَس مهلوک ءِ هساب ءَ _ نه گند ایت بزان مردماں هما پگری و « کتابی » کاستانی تها گند انت و بس .
مئی چاگرد ءِ ناجوڑیاں باز انت . لهتے مردماں دین و پگر ءِ هساب ءَ بهر- بهر کنان انت که مسلمانے یا نمازی یے یا سوشلسٹ و کجام پگر ءِ منوک انت و … ، لهتے مردماں زات و زریات و ٹک ءِ هساب ءَ بهر- بهر کنان انت ، لهتے آهاں گَلّ و گروپانی هساب ءَ بهر- بهر کنان انت لهتے هم مرچاں « طبقهے » در برتگ و آهاں « طبقه – طبقه کنان انت کاریانی و گریبانی طبقه ، خان و نوابانی طبقه ، ملایانی طبقه ، سیٹانی طبقه و … مئی مردماں بهر – بهر کنان انت .
اداں هم اے پهک هما جاه رَسنت که وتا جوان و نیک و ایدگراں گندگ و هراب زاننت و سرپد بینت .
اے پگر ءِ بنیات ءَ « طبقه » انت که مردماں همے « طبقه » ءِ بنیات ءَ بهر کنان انت . هرکجام گروپ ءَ « طبقهے » زان انت و هر « طبقه » ءَ وتی سیت و زیان ءِ لیکه ءِ واجهی انت .
چشیں چاگردے ءَ هر کس وتا چاگرد ءِ یک مردمے نه زانت که چاگرد ءِ زمه واری آئی ءِ کوپگ انت ، بلکیں هر کس وتا کجام گروپ ، زات ، پگر ، لیکه و … بندوک زانت و بس و په وتی چاگرد ءِ گهبودی و زمه واریانی پیلو کنئگ ءَ جهدے نه کنت . اداں اے لیکهاں نه گند انت که مئی پیشی چاگرد ءَ هنیں نوکیں و زلیں دولتاں اڈ و پئیم بیتگ انت که مئی چاگرد ءِ سرجمیں کنٹرول و واجهی هماهانی دست انت . چشیں چاکرد ءَ نه هان و نواب ءَ واکے هست و نه ملا و آدگر ءَ و اگں کسے ءَ وس و واکے هست ، هما هکومت ءِ منتگیں و داتگیں « واک » انت که آهانی داته و هر وهد به لوٹیت هما واک ءَ چه آهاں گپت کنت . بزان هان و نواب و ملا ، واننده و … اے گروپانی تها مردماں بهر- بهر کناں و چه یک و دگر بد دل کنان انت تاں وتی زوراکی و ناراهی سیاستاں گهتر دیما به بر انت . راجاں گوے اے بهر- بهر کنئگ ءَ گهتر و گیشتر نزور کن انت . مردمانی جوانی و هرابی گوں مردمانی « نام » و « زات » بندوک نه انت ، بلکیں گوں مردمانی کِرد بندوک انت . هر هما ملا ، واننده ، یا نواب و ایدگراں که وتی مردمانی همراه انت و په آهانی گهبودی ءَ جهدے بکنت ، آ واجه ءِ نیکیں کار و جهد ، راج ءِ راجدپتر و مردمانی دل ءِ تها نمیران و ابدمان بیت و هر هما « واننده » و « زانوگر » و « گریب ءِ چُک » هم که بدکِردیں هکومتانی بدکردیں کاراں همراه و هوار بیتگ انت و هست انت ، آهانی بدنامی هم ماندگار انت .
نه گریب ، ملا ، نواب ، واننده ، نیزگار و دگه کسباں ، جوانی ءِ نشان انت و نه گندگی ءِ ، بلکیں اے مردمانی کِرد انت که آهاں ماں اے گروپ و یا آدگه گروپ هوار کنت …. په همے هاترءَ ما را زانگ لوٹیت که چاگرد ءِ بدل کنئگ گوں درستیں اے واکانی همراهی ، گهتر و زیت تر بیت کنت و بلوچستان ءِ چاگرد ءِ گهتری ، درستانی سیت و پایدگ انت و تهنا هما زوراک و زورگرانی زلر ( ضرر ) و نکس انت و بس .
ما دگراں زیت رنجینت کنیں ، بلے اے مئی جند ءِ نکس و مئی وشنیتکانی مفاد انت که ما نزور و چه و یک و دگه جتا و بد دل و نزور به بئیں .
