بلوچ راجی جُنز ءُ پُرشت ءُ پُروش ءِ سرا من هر وهدءَ قلم چست کُتگ کہ جیڑانی سرا چیزے نبِشتہ بکن آں، پدا هَیال کُتگ گُنگ بو بُو هچ نبشتہ مہ کن، بلے مرچی منا جاوراں سک نگیگ کُتگ کہ من چیزے نبِشتہ بکن آں۔
بلوچ راجی جُنز ءَ را مرچی یک بلاهیں مُدتے بیت کہ دیم پہ منزل ءَ جُنزان انت۔ بلوچ جُنز ءَ ھَوار هزارانی کساس ءَ بلوچ ءِ تنگوئیں بچاں وتئی نْگرئیں جان کربان کُتگ انت کہ مئےَ جُنز شَرّیں وڑے ءَ دیمروے بِہ کنت ءُ مئے آهوکیں نسل یک َشرّیں زندے بِگوازین اَنت، بلے مرچی اگاں ما جُنز ءِ سرا چمشانکے بدے اِنت ءُ بِچاریں، هِچّ وڑئیں گیشیں دیمروئی گندگ ءَ نئیت ، مئے آجوئی لوٹوکیں گَلاں یکے دومی ءِ ھلاس کنگ ءَ پہ لانک بستگ، دژمن ءَ چہ گیش وت ماں وت گُٹگیر اَنت، پرچا اے وڑ اَنت.؟ ھمے وت ماں وتی ھڈ ءُ کُڈْانی سوَب ءَ روچے نوکیں گَلے جوڑ کنگ بیت بلے کار انگت ھما جاہ ءَ کپتگ انت۔ مئے راهشون دژمن ءِ هلاپ ءَ هِنچو پندل نہ سازانَت ھِنچو کہ یکے دومی ءِ هلاپ ءَ پندل سازگ ءَ دز گٹ اَنت، بیدئے وتئی دست ءِ گُڈگ ءَ، دِگہ هچّ وڑیں دیمروئی نہ بوہگ ءَ انت۔ مرچی بلوچ راج ءِ چمّ ءُ اُمیت گوں وتی راهشوناں بندوک انت بلے راهشونانی کردِ اَتکگ اِش اَنت کہ وتئی کوپگ آں گُڈ ءُ وت ءَ تل تل بِکن کہ من اَگلی کارے کنگ ءَ آں۔ منی گوں کُلیں راجی سرکیلاں دزبندی اِنت کہ بیا اَنت دست ماں دست بِہ بنت، اے کاروان ءَ دیما بِہ بر اَنت، وھد انگت دست ءَ نہ لگُشتگ ، دْراھیں بلوچ یک مُشترکہ پرنٹے جوڑ بِکن اَنت تا کہ آهوکیں وهد ءَ دُرستیں جیڑا گیش ءُ گیوار بہ بنت ءُ یک شریں ھکمت ھملی یے جوڑ بکن اَنت کہ آ ھکمت املی بلوچ راجی جنز ءِ گِھترے ءِ ھاترا جوڈ کنگ بہ بیت
من گوں وتئی یک کوهنیں سنگتے ءِ گوما گپ ءُ تران کنگ ءَ اتاں، سنگت ءَ گُشت “ھشتاد ءُ پنچ ءَ کہ بلوچ راجی جنز روان بوتگ، هما وھد ءَ بی ایس او آمان ءُ بی ایس او متھده پُرشت ءُ پروش ءِ نیمگ ءَ شُتاں کہ چرائی ءِ سبب ءَ راجی جنز ءَ توان رَست” اے ھما پروشت ءُ پروشاں کہ روچ ء مروچی ھم برجم انت ءُ روچ پہ روچ اے پروشت ءُ پروش گیش بوان انت۔ بی ایل ایپ ءَ چہ ماسٹر سلیم ءَ اکتلاپات داشت ءُ بی این ایل ایف جوڑ کُرت، اگاں ماسٹر سلیم ءَ گوں سنگتاں اکتلاپات هست اَت گُڈاَ بائید ھَمیشَ اَت کہ ماسٹر ءَ گل ءِ تہا گپ ءُ تران کتیں ءُ جیڑا توجیل ءِ نیمگ ءَ بُرت ایں ، بلے ما دیست ماسٹر ءَ دگہ سلاہ بندیں گلے بی این ایل ایپ نام ءَ جوڈ کُت، اگاں ماسٹر سلیم ءَ بی ایل ایپ ءَ گوں اکتلاپ اَستا، گڈا بجائے دگہ گلے ءِ جوڈ کنگ ءَ دگہ سلاہ بندیں گلے ءَ ھوار بوتیں ۔ بی این ایل ایف ءِ جوڑ بوهگ ءَ جُنز ءَ را هچ وڑیں پائیدگ نہ دات ھمے پیما پدا بی ایل اے سرا هم اے پُروشت ءُ پروش اتک انت ، قادر مری ءَ گوں لہتیں سنگتاں بی ایل اے ءَ چہ اکتلاپات داشت ءُ دگہ تنظیمے یو بی اے ءِ نام ءَ جوڑ کُرت، ءُ ایدگہ لھتیں تنظیماں قادر مری کُمک کُت ، تاکہ اے پروشت ءُ پروش آکسیجن دیگ بہ بیت ءُ قادر گوں سنگتاں پدا بی ایل اے مروت، بلکیں یو بی اے ءَ جوڑ بکنت ۔
ادارہ آنی پروشت ءُ پروش ءِ سرا ھاموشی ءَ بازیں ماردُماں موہ دات کہ آ گلانی پروشت ءُ پروش ءَ یکشلہ برجم بدار انت ۔یک رندے پدا بی ایل اے ءِ تہا پروشت ءُ پروش آرگ ءِ ھاترا اسلم ءُ بشیر زیب کمک کنگ بوت انت، ھما مردم کہ بی ایل اے ءَ گل ءِ راھبند ءِ لگت مالی ءِ جرم ءَ چہ گَل ءَ کش اتاں، آ مردم دومی سیاسی ءُ سلاہ بندیں گلانی نیمگ ءَ چہ دلبڈی دیَگ بوتاں تاکہ آ وتئی جیڑہ آں بی ایل اے ءِ تہا توجیل مکنت ءُ پدا بی ایل اے ءَ دو ٹُکر بہ کن انت۔ جُست ھِش انت کہ داں کدی اے پروشت ءُ پروش برجم مان انَت ، باریں دگہ چنچو گل پروشت ءُ پروش ءِ آماچ بیت ءُ دگہ چنچو گل جوڑ کنگ بیتَ؟ بائید بلوچ نو ھوش بہ کنت ءُ اے مسلہ ءُ جیڑه آں گیش ءُ گیوار بہ کنت ءُ آهینده پُروشت ءُ پروشوک ءُ پروشت ءُ پروشوکاناں دلبڈی کنوک کڈن کنگ بہ بنت ءُ راج ءِ دیما آیانی ھتساب کنگ بہ بیت تاکہ بلوچ راجی جنز ءِ تہا پرشت ءُ پروش ءِ دود ھتم بہ بیت۔
