بلوچ راج ءِ نَنّگ، گُهار زَرینہ نَدکار : ڈَگار بلوچ

بلوچ راج ءِ نَنّگ، گُهار زَرینہ مری

نَدکار : ڈَگار بلوچ

ہمگام: نبشتانک

دنیا ءِ تَها ھزاراں راج اَست اِنت کہ زوراوریں راجانی ایردست ءُ گُلام اَنت هَر هما راجاں کہ وتئی راجی ایردستی ءُ گُلامی ماریتگ، آهاں وتئی راجی آجوئی ءُ راجی وت واجهی ءِ جنگ وتئی وَس ءُ واک ءَ بِندات کُرتگ ءُ راجی آجوئی ءِ دَگّ ءَ رھادگ بوتگ اَنت هِچ مهلوک ءُ سهدارے ابرم ءَ ایردستی ءُ گُلامی هَاوندءَ نِبشتگ نہ کُرتگ نئے کہ راجانی تالهہ مان اِنت اے یَک شهد ءُ شّکَلیں راستی یے هَر مهلوک ءُ سهدارے بُنکی ءُ ابرمی هَک آجوئی اِنت دنیا ءِ تها لَکاں راج اَستیں وهدا وتئی راجی آجوئی ءُ راجی آشوبی ءُ راجی وت واجهی ءِ جنگا اَنت هَر هما راجاں کہ وتئی آجوئی جنگ بِندات کُرتگ۔ دُژمنءَ آهانی هَزاراں کِساس پیر ءُ آجز ءُ زَهگ تپِل ءُ زَلبولاں هَوار آشوبی ءُ سلاه بَندیں گَلانی لَٹ ءُ کُڈ ءَ ابید لَس مهلوک ءِ گار ءُ بیگواه ءُ زِندانانی تها تهاریں کوڈیاں بَندیگ کَنگءُ شَهید کنگ هَوار اَنت اے گَپ چہ هِچ کَسءَ چیر ءُ اندیم نہ اِنت کہ دنیا ءِ تها ھزارں راجاں وتئی راجی وت واجهی ءُ راجی آجوئی ءِ جنگ ءَ را وهدے کہ بِندات کُرتگ گُڈا دُژمِن ءَ را هَر هما راجانی آجوئی ءِ کاروان ءِ اوشت آماچی ءِ هاترا هَر پیمیں کوشِست کُرتگ تاکہ هما راجانی ایردستی ءُ گُلام دارگءَ سوبمند بہ باں اے دراهیں دردناکیں ءُ نہ سَگّوکیں ویلاں ایردست ءُ گُلامیں راج سَگّ ءُ اُپار کن اَنت گُشگ ءِ مُراد ایش اِنت کہ دُژمن هَر پیمیں درد ءُ دور ایر دستیں راجاں دَنت ایشانی تها گار ءُ بیگواه کنگ گِسانی ماندارگ لَٹءُ کُٹ کنگ تهاریں زندانانی تها بَندیگ کنگ هَاس راجانی زَلبولانی بِرَهْنگ کنگ هوار گوں آهاں بَدکردی ءُ بَدپیلی کنگ هَوار اَنت اے دراهیں ءُ دردناکیں ءُ نہ سَگّوکیں ویلانی کنگ ءِ مول ءُ مُراد دُژمن ءِ ایش اِنت کہ ایردستیں راجاں گیشءَ چہ گیش ایردست ءُ گُلام داشت بہ کنت وتئی زُلمءُ زُورے هاکمیءَ برجاه داشت بہ کنتءُ ایردستیں راجاں کَرّءُ کئورءُ گُنگءِ درورءَ بہ دنت تاں دُژمِنءِ وش روت آ اے زُلمءُ زورے جُهدا کنت بلے راستی ایش اِنت کہ دنیاے تها لَکاں چوشیں زُراکیں راج بوتگءُ استیں تاریخ گواه اِنت کہ هِچ زوراکیں راجءِ زُراکی ابدی نہ منتگءُ نہ کہ مانیت اگاں پَٹءُ پول بہ کنئے تاں شمارا ھزاراں اے پیمیں ایردستیں راج دست کپیت کہ آهاں هَر پیمیں زُلمءُ زُراکی سَگَگءَ چہ ابید آهاں دُژمِنءِ دیم ءَ سَر جھل نہ کتگ، دُژمِن سجدگ نہ کُرتگ بِزاں سر جهلی نہ منِتگ وتئی راجی وت واجهی ءُ راجی آجوئیءِ جهدا سوبمند بوتگ اَنت ءُ استیں وهدا دنیا ءِ تها آجوهیں ءُ زندگیں راج زانگ بنتءُ جوانیں زندے گوازینگا اَنت هَمے پیمءَ هِچ پیمیں زُلمءُ زُراکی تاں ابد نہ مانیت.
چہ هما ایردستیں راجاں چے یَک راجے بلوچ اِنت۔ استیں وهدا دژمنانی ایردستءُ گُلام اِنت بلے بلوچ راجءَ را هِچ زُراکءُ زُراوریں راجانی هاکمی نہ منِتّگ بلوچ راجدپترا شمارا هَزاراں نرمزاریں سَرانی مِسال دست کَپیت کہ وتئی راجی ایردستیءُ گُلامیءِ رَکّینگ ءِ ءُ وتئی راجی آجوئی ءِ هاترا وتئی نُگرهیں سَر ندر کتگ اَنت بلوچ راجدپتر ءَ هَزاراں هَملءُ دادشاه پیمیں نر مزار بکشاتگ بلوچ راجدپتر یک پراهءُ مَزن شهگانیں لَڈ یے اے لَڈ ءِ تها هَزاراں ل نُگرهیں سر راجی ایردستی ءُ راجی گُلامیءِ نہ منَنّگ ءِ هاترا کُربان بوتگ ءُ استیں وهدا بوهَگّ ءَ اَنت انگریز ءِ وهدا بگر تاں استیں وهد ءَ بلوچ راج وتئی راجی آجوئی ءُ راجی وت واجهی ءِ جنگا اِنت۔
اے گَپ وت وتئی تاریخی گواه اِنت کہ بلوچ راج ءَ را هِچ راج ءِ هاکمی ءُ زُراکی نہ منِتّگ انگریز وهدے کہ بلوچستان ءِ ءُ بلوچ راج ءَ ایردست ءُ گُلام دارگ ءِ واهگءَ داریت گڈا انگریزی لَشکر بلوچ سَرڈگار ءِ سَرا اُرش کنت بلوچ راج ءِ هَما نر مَزاریں سر وتئی نُگرهیں سرانی کُربان کنگ ءَ چک ءُ پد نہ بنت یک شلا وتئی نُگرهیں سَرانی کُربانی ءَ بِندات کَن انت وتئی راجی نَنگ ءِ ءُ وتئی راجی لَج ءِ هاترا بلوچ راج ءَ را هِچ زُراک ءِ دیم ءَ وتئی راجی سر جهلی نہ منِتّگ هَمے پیما وهدے کہ انگریزی لَشکر وتئی داهمی ءُ ابدی پروش ورگ ءِ سمیسراں سَر بیت گُڈا آ بلوچ راج ءِ مادریں سرڈگار ءَ را بهر ءُ بانگ کنگ ءِ نہ وشیں جُهدا کنت تاکہ بلوچ راج نِزور بہ بیت ءُ گوں آدگراں دست گولاهیش بہ بیت ءُ مانگیشوک ءُ آڈانگ آماچ بہ بیت انکریزی لَشکر بلوچ سَرڈگارا را سئے بهر کن اَنت ءُ ادارُکی سیمسر اڈل دنت ءُ هَمے واهگ ءَ داریت کہ بلوچ نِزور بہ بیت بلے اے ادارُکی سیمسرانی هِچ پیمیں بِستار ءُ ارزِشت نیست چیا کہ دنیا ءِ تها هَزاراں راجانی سرڈگار زُراکیں راجاں بهر ءُ بانگ ءُ ادارُکی سیمسر جوڈینتگ ءُ ٹَهینتگ هَمے دابءَ درستاں چے ارزِشت بکشیںءُ بستار داریں جَزبگ گُلامی ءُ ایردستی ءِ مارَگ اِنت هَر راجے کہ وتئی راجی ایردستی ءُ راجی گُلامی ءَ را ماریت آ راجانی سرڈگارانی ادارُکی سیمسر پدا وتئی راجدپتر ءُ پیشی داب ءَ بنت آ راج زندگءُ ابدمان بنت بلوچ راجے سرڈگار ءِ هیرات کنگ هِچ کسّ ءَ چے چیر نہ اِنت سرڈگارء بلوچستان چہ انگریزی لَشکر ءِ ادارُکی بهر ءُ بانگ ءَ چے ابید تاں هما روچ ءَ بگر تاں استیں وهدا بلوچ راج وتئی راجی وت واجهی ءُ راجی آجوئیءُ راجی سرڈگارءِ سیمسرانی داهمی رَکّینگءِ جُهدا اِنت دُژمِن ایران بہ بیت پاکستان بلوچ راجی دُژمِن ءُ راجی بدواه زانگ بنت اے گَپ راستے کہ بلوچ راجی آجوئی جُهدارا سُست ءُ تُرندی اتکگ بلے بلوچ راج ءَ را سر جهل نہ کُرتگ استیں وهدا بلوچ راج ءَ وتئی راجی آجوئی ءِ ءُ وتئی راجی سرڈگار ءِ پَنچُمی جنگ بِندات کُرتگ کاروان ءِ آجوئی دیم پہ گُڈی منزل ءَ جُنزان اِنت دژمن ءَ ھزاراں کِساس بلوچ گار ءُ بیگواه کُرتگ ءُ بازینیں شَهید کُتگ، آهانی سیادی سلاه بندیں گلیءَ بوتگ یا آشوبی گلی ءَ بہ بیت بلوچ ءِ نام وت یک مَزنیں ءُ ٹوهیں گناهے جوڈ بونگ چیا کہ دُژمِناں بلوچ راج پَکار نہ اِنت بلوچ سرڈگار پَکار اِنت استیں وهد ءَ هزاراں پُسّگ بلوج راج ءِ بیگواه اَنت آهانی تها نوجوانانی مَزنیں کَچ ءُ کِساس یے هواریں، مَزن کسان پیر ءُ آجز زهگ ءُ زالبول هَم هَوار اَنت بلوچستان ءِ هَر کُنڈ ءُ هَر گورا سرجمیں بلوچستان ءَ استیں وهدا چوشیں جاهے چوشیں هَکے میتگے چوشیں لوگ یے نیست کہ اُدا کسے نہ کسے بیگواه نہ اِنت هَزاراں بلوچ پُسگ گار ءُ بیگواه اَنت چہ آهاں بازینیں شهید کُرتگ ءُ بازینے انگت دُژمِن ءِ تهاریں کُٹیاں دردءُ هَر پیمیں ازیت سَگّگااَنت چہ هما بیگواهاں چے یکے بلوچ راجے نَنّگ گُهار زَرینہ مری اِنت کہ پاکستانی چیریں ادارهانی ائ ایس ائی ءَ را سال 2006 ءَ چہ وتئی مادریں سرڈگار ءَ چہ وتئی هَلگ ڈیراه بگٹی کوهَلو ءَ گوں وتئی دو سالی زَهگ ءَ هَوار آوار جَتگ ءُ بیگواه کُرتگ روچءِ مروچی انگت گوں وتئی رَهگءَ هَوار بیگواه اِنت زَرینہ مری ءِ گناه ءُ میار چی اِنت؟ زَرینہ مری یک اسکول ٹیچر یے بوتگ آهی ءَ وتئی هَلگ ءِ بِزاں ڈیراه بگٹی ءِ دَمگ کوهَلو ءَ وتئی میتگ ءِ چُک ءُ زَهگانی علم ءُ زانت ءِ دربرگ ءِ گناه کُرتگ۔۔۔۔۔۔۔
دیگئے هِچ۔۔۔۔۔۔۔۔۔

مروچی بانُکیں گُهارار پُریں 12 سال سرجم کُرتگ کہ انگت بیگواه اِنت اَلم اے ویل پہ بلوچ راج ءَ یک دردناکیں ءُ ماتی زاهی ءِ برابر ءُ هَمسنگ اِنت ایوک ءَ گُهار زَرینہ مری نہ اِنت کہ بیگواه اِنت هَزاراں بانُکیں گُهار زَرینہ بیگواه اِنت آ پاکستانی رستریں لَشکر ءِ تهاریں ءُ دردناکیں زِندانانی تها بَندیگ اَنت گُوں هما ماتءُ بانُکیں گُهاراں چے پیمیں رنگی ءَ ناپاکیں لَشکر پیش کیت اے هَبر چہ هِچ کس ءَ چے چیر ءُ اندر نہ اِنت.
ادا بلوچ نَنّگ لَگتمال بوهگا اِنت بلوچ راجی لج لَگتمال بوهگا اِنت اے پیمیں نہ وشیں جاوراں بلوج راج ءَ چے کنگی اِنت؟ چون وتئی راجی نَنّگ پهازگی اِنت هَمے جُست ءِ پدا بلوچ راجی رهشوناں تِپاک بوهگی اِنت تِپاکی الّمی ءُ اژدری اِنت استیں وهدا جاور چنچو نہ گیگ ءُ نہ وش اَنت آئوکیں وهدا گیش ءَ چہ گیش نَگیگ تری ءِ گمان اِنت اے پیمیں جاوراں راجی رهشونانی راجی زِمواری بیت کہ وتئی راج ءَ را چرےنہ تپاکی ءِ نہ وشیں ویل ءَ چہ درکنگ ءُ تِپاکی ءِ سیمسراں سَر کنگی اِنت.