کوئٹہ(ہمگام نیوز) مقبوضہ بلوچستان سے جبری طور پر گمشدہ بلوچ طالب علم رہنماء زاکر مجید بلوچ کی والدہ نے سوشل میڈیا کے ذریعے اپنے بیٹے کی بازیابی کیلئے اپیل کرتے ہوئے کوئٹہ میں موجود تمام مکاتب فکر کے لوگوں سے عید کے روز کوئٹہ پریس کلب کے سامنے ہونے والے لاپتہ افراد کی بازیابی کے لئے احتجاجی مظاہرے میں شریک ہونے کی درخواست کی.
انہوں نے عید کے روز لاپتہ افراد کی بازیابی کیلئے منعقدہ مظاہرے میں شرکت کی درخواست کرتے ہوئے کہا کہ ‘ہر سال خوشیوں کے تہوار کے روز لاپتہ افراد کے لواحقین اپنے پیاروں کی جبری گمشدگیوں کے خلاف سراپا احتجاج رہتے ہیں لیکن انہیں سننے والا کوئی نہیں۔’
‘میرے بیٹے کی جبری گمشدگی کو 12 سال کا طویل عرصہ ہوچکا یے اس تمام عرصے میں نے کوئی خوشی نہیں دیکھی اور میری طرح دیگر لاپتہ افراد کے لواحقین بھی اسی اذیت میں زندگی گزار رہے ہیں۔’
انہوں نے کہا کہ ‘زاکر مجید و اسکے دوست زاہد کرد، شبیر بلوچ طالب علم تھے، اپنے حقوق کی بات کرتے تھے، لاپتہ افراد کو منظر عام پر لاکر انکے لواحقین کی خوشیاں لوٹائیں۔ وزیر اعظم و وزیر اعلی سمیت گورنر بلوچستان سے میری درخواست ہے کہ وہ ہمارے پیاروں کے بارے ہمیں آگاہ کریں۔’
لاپتہ طالب علم رہنماء زاکر مجید کی والدہ کا کہنا تھا کہ ‘ ان 12 سالوں کی عیدیں ماتم زدہ ماحول میں گزاری ہے اب حکمران بتائے آنے والے مزید کتنے عیدیں اس حالت میں گزارینگے بااختیار ادارے لاپتہ افراد کو منظرے عام پر لاکر انصاف کا موقع فراہم کریں۔’
