جوانانِ بلوچ نبشتہ کار ــــ امینه سربازی

بلوچستان دگنیا ءِ اندر ءَ ھما دمگ انت که ابرمی مادن ءَ چی چکار انت ادا بلوچستان ءِ دگنیا ءِ تمامیں مادن دست کپ انت، بلے وائی شومیں قسمت ” که ایش بلوچ ءِ واک ءَ نیاں ـ بلوچ ءِ تمامیں ابرمی مادن، زِر، درچک ءُ دار کشت ءُ کشار ءَ بگر دانکه زند ءُ مرگ ءَ بیا دراہ دری راجانی زورکیانی ھرجان انت ـ بلوچ چنڈے نان ءِ مھتاج انت ـ بلوچ ءِ گورا چوشیں وانگ ءُ زانت ئے ھم نه گوائیت که وتی لَکڑّ ( قابلیت) بنیات ءَ وتی زند ءِ ھورکیں ھنداں پُر بکنت ـ
ایرانی زیر دستیں بلوچستان به بیت، پاکستانی زیر دستیں بلوچستان به بیت یا که اوگانستان ءِ زیر دستیں بلوچستان ءَ جھ نندیں تمام بلوچ ءِ زندمان تھنا یک قیامت ئے ـ
روزگار، بزنس، فیکٹری ءُ کارخانه بلوچستان ءِ تمامیں دمگاں ھچ نیست، بلوچ ءِ گورا چوشیں تعلیم ئے ھم نیست که وتی قابلیت ءِ بنیات ءَ کم چه کم ڈنی ملکاں بروت وتی لاپ ءَ شوھاز بکنت ھر چیز بیت بلوچ ھاس جوانانی ھاتر ءَ بلوچستان جند انت چیا که وھدے تئی ماتیں وتن دژمن ءِ دست ءَ دزگیر بیت گرا په وتن ءِ پسگاں ھچ نه مان ایت ـ الم ھر چیز په لاپ ءَ شوھاز کنے ھمے قبضه کرتگیں گلزمین ءَ اندر ءَ شوھاز کن دانکه دو وھد ءِ نگن به رسیت ـ بلے بژن ءِ ھبر ایش انت که ادا الگار کرتگیں گلزمین ءِ ھر روزگار ءِ سرا غیر بومی مردمانی ھم قبضه انت ـ
بلے ایشی ءَ ابید انگت بلوچ جوانان وتی لاپ ءِ شوھاز ءَ دست ءُ پاد جناں ـ بلوچ جوانان گیشتر روکپتی بلوچستان بزاں ایرانی چیر دستیں بلوچستان ءَ په چنڈے نان ءِ شوھاز ءَ زند ءُ مرگ ءِ آچشدان ءَ گوزگی انت ـ من گشیتر ھمے دمگ ءَ واکپان چیا که منی پیرینانی کبر روکپتی بلوچستان ءَ انت ـ پمیشه ادا گیشتر ارس گواراں ـ
ھمے نان ءِ شوھازگ ءَ بلوچ روکپت ءِ سوختبری ( بزان ایرانی، تیل ءُ گیس ءِ کار انت که ایرانی چیر دستیں بلوچستان ءِ دمگاں کن انت که چی کار ءَ بلوچ جوانان دو وھد ءِ نگن رسیت) کن انت ـ بلے ھمے کار ءَ ایران ءِ بیمکاریں ءُ کچکیں فوج ءُ آئی ایندگر ادارہ ھچ داب ءَ اوپار نه کنت ءُ بلوچ ءَ را ھمے کاروبار ءِ تھا بازیں رنداں مرگ ءَ گوں دچار بیئگی انت ـ ایشی مستریں درور ایش انت که گوستگیں سال 2021 ءَ سی ءُ پنچ بلوچ سوختبر ایرانی فوج ءَ تیرگواری کت ءُ شھید کتاں ایش واکیه سراوان ءَ شمسر ءَ بیتگ ات که شمسر ءِ ھر درچک ءُ دار ءُ کوہ ءُ تلار ایش ورناھیں بلوچانی کوش ءَ موتک کار ایت ـ
ایشی ءَ ابید بازیں بلوچ جوان بلوچستان ءِ آتراپاں در کئیت ایرانی ایندگر شھراں روت په لاپ ءِ شوھاز ءَ اودا ھم بلوچ جوان یک بلوچے ءِ بستار ءَ بکشگ نه بیت ـ
زیکیں روچ ءَ ھالرسانکاں ھالے شنگ ات که ایران ءِ شھر یزد ءَ یزد ءِ دمگی ( مقامی) مردماں یک بلوچ مزورے ھمے ھاترا چاقو ءِ سرا ٹپیگ کتگ که ترا بلوچی پوشاک گورا ادا گردش کنے ءُ تو پدا بلوچے ءِ!!!
جیڑگی انت که اول ھمے راج ءَ تئی گلزمین قبضه کرتگ، ھمے راج ءَ ترا غلام برجا داشتگ، ھمے راج ءَ را مروچی 91 سال انت که تئی ابرمی مادناں
Natural Resources
لٹ ءُ پل کنگ ءَ انت تئی لوگ ءَ پترتگ ءُ تئی ننگ ءُ ناموس ءِ سرا الگار کرتگ، تئی چکچینی ءَ اینچوک ءَ چک ءُ پد نه بیت مروچی ھمے راج بلوچ ءَ تھنا بلوچستان ءِ اندر ءَ کشگ ءَ نه بلکیں بلوچستان ءِ آتراپاں ڈن ایران ءِ ایندگر شھر ءُ دمگاں ھم لٹ ءُکٹ کنگ ءَ انت ـ
ایران ءِ بازیں شھر است انت که اودا بلوچ شتگ په روزگار ءَ بلے بلوچ اودا ھم دژمن ءِ کہرستانی ءِ آماچ انت ـ گوستگیں روچانی تھا یزد ءَ بلوچ جوان ءِ سرے ارش ھمے پدر کنت که انسانے نه ایت چه جانور ءَ رد تر انت ـ ایشی ءَ ابید ھمے یزد ءِ تھا یزدی مردماں یکشل ءَ ھر جاہ ءَ بینر جتگ که بلوچاں لوگ کراہ دیگ مه بیت ءُ ھچ بلوچ ءَ را ادا آیگ ءُ کار کنگ ءِ ھک نیست ـ
نی ادا چی زانگ بیت که بلوچ سد درسد غلام انت ایرانی تمامیں آتراپ ءُ دمگاں ـ
بازیں ھال اے داب ءَ ھم اتکگ ایران ءِ ھر راجے که است انت ایران ءِ تھا آ ھچ وش نه انت بلوچ ءِ سرا ءُ آ لوٹ ایت که بلوچ دگنیا ءِ نقشه ءَ چی گار به بیت ءُ بلوچستان بس مئے به بیت ـ
نی جیڑگی انت ھما بلوچ رھشونانی که بلوچستان ءِ آجوھی بیرک ایش دست ءَ انت بلوچ ءِ واسته نعرہ جناں ـ
ایشی ھاترا بلوچ ءَ را وتی تمامیں بلوچ ادارہ مھکم ءُ سنگین کنگی انت ھما ادارہ که بلوچ آجوھی ءَ ھمگرنچ انت ـ ءُ وتی گلیں زمین آجوھ کنگی انت اگان بلوچ مھکم نه بیت گرا یزد ءَ نا بلکیں باندا ھمے یزدی مردم سرباز ءُ سراوان کایان من ء بلوچ ءَ گس ءِ اندر ءَ چکچین کناں ـ