کوئٹہ (ہمگام نیوز) 11 سال پہلے مقبوضہ بلوچستان کے شہر کوئٹہ سے قابض پاکستانی فوج اور خفیہ اداروں کے ہاتھوں جبری طور اغواء ہونے والے نوشکی کے رہائشی سمیع مینگل کے لواحقین نے اپیل کرتے ہوئے کہا ہے کہ سمیع مینگل بے قصور ہے اُسے باحفاظت بازیاب کیا جائے۔
سمیع مینگل کے لواحقین نے مزید کہا کہ اگر سمیع مینگل نے کوئی جرم کیا ہے تو اسے ریاست کے ہی قانون کے مطابق عدالت میں پیش کرکے انصاف کے تقاضے پورے کیئے جائیں۔ جبکہ اس کے برعکس ہمارے پیاروں کو کئی سالوں سے اس طرح فوجی کیمپوں کے اذیت خانوں میں مسلسل حبس بے جا میں رکھنا انسانی حقوق کی سنگین خلاف ورزی ہے۔
ہم ملکی اور غیر ملکی انسانی حقوق کے علمبرداروں سے اپیل کرتے ہیں کہ بلوچ جبری مغوی اسیران کی باحفاظت بازیابی کے لیے اپنا کردار ادا کرکے جبری مغویان کے پورے خاندان کو اجتماعی اذیت سے نجات دلانے میں ہماری مددکریں۔ واضع رہے بلوچستان میں جبری اغوا شدہ افراد کی تعداد ہزاروں میں ہے،جن کے لواحقین کے احتجاج کا سلسلہ تاحال جاری ہے۔
