ہمگام بلوچی نبشتانک
لھتیں چیز انت من آیانی سر ءَ پیسرا اوں گپ کتگ مرچی پد ءَ گپ کناں مرچی ھمے جیڑھاں پد ءَ لاچار کتگ کہ گپ بہ کناں مئے لبزانک بہ بیت، سیاست بہ بیت سیاسی باسک ءُ لبزانکی نودربر بہ بنت ھرکس پہ دیم انت وتی راجی ڈبہ ءُ زمہ واری ءَ نہ زان انت من نہ زاناں اے بے شعوری انت، ادارھانی نزوری انت یا اے مئے وتی نا بزانتی انت من نام نہ گراں یک روچے من آزمانکی کتابے ءِ وانگ بندات کت داں چاراں اے کتاب ءِ تہ ءَ مرد بلوچستان ءِ وجود ءَ چہ انکاری انت اگاں آ جاھے ءَ رؤگ ءَ انت آ جاہ ءِ نام اتکگ انت گڑا آئی ءَ زورگیر ءِ نام ءَ گوں ھوار کتگ ءُ گشتگ چش کہ ”مرچی من دبئی ءَ در کپتگاں مکران پاکستان ءَ رؤگ ءَ اوں“ نوں وت اندازگ بہ جن تئی لبزانکی مردمے چشیں کار کن انت گڑا دژمنانی چے گلگ!!
چیزے سالاں ساری شاہ جان داؤدی ءَ وتی نوارے ءَ سوتے گشتگ ات شائر ءَ نہ زاناں کے انت سوت چش ات کہ
بیا سیل ءَ روئیں ایران ءَ
منی لیلٰی رواں زاھدان ءَ
دگہ شئرے انوں زوت ءَ شنگ بوتگ کہ
بیا سیل ءَ رواں ایران
زاھدان ءُ گلیں چھبار ءَ
نوں اد ءَ چے بوھگ ءَ انت اد ءَ ھما دژمنیں ریاست ءِ جوڑ کتگیں لیکہ ءَ دیمروئی دیگ ءَ انت اے سوت ءَ بلوچ ءِ چک ءُ زھگ اشکن انت تاں ھمے سرپد باں ما ایرانی انت زاھدان ایران چھبار ایران انت تو بزاں دژمن ءِ کاراں وت ارزان کنگ ءَ ئے لھتیں مردم بہ گند ئے اے چیزاں ھچ من نیار اِیت بلّے منی زات گونڈیں چیزانی تہ ءَ مزنیں چیز شوھاز کنت منی نز ءَ تباھی ھما چیز کار انت چم ءَ نیا انت ھمے گونڈیں شے مزنیں ھرابی کن انت چشیں شئیر ءُ آزمانک تئی راج ءَ گلامی ءِ مھکمیں سانکلاں بندیگ کت کنت اد ءَ باھد ما اے سوتانی سر ءَ زھرشانی بہ کتیں بلے بژن کہ مئے سیاسی باسک دگہ بازیں کسے ءَ ھمے سوت پہ شانے شنگ کتگ۔
دگہ گپے ءَ من ھیراناں تو وتی لبزانکی مردمے ءَ بُگش شما ھستیں جاورانی سر ءَ پرچا نبشتہ نہ کن ات مرچی انچیں جاورے ودی بوتگ چشیں گسے نیست اود ءَ پُرس ءِ پتر پچ نہ انت دہ دہ سال انت مردمانی چُک بیگواہ انت، مھلوک گژنگی ءِ آماچ انت مزنیں دلپروشی یے ودی بوتگ مردم وتکشی کنگ ءَ انت دگہ انچیں جیڑہ انت مھلوک جزباتی انت وتا تاوان دیگ ءَ انت پد ءَ آیانی پسہ ھمیش انت ما ساچشت کار انت ما ساچشت نبشتہ کنیں ایا اے جیڑھانی تہ ءَ ھمے سرھالانی سرا ساچشت نبشتہ بوت نہ کنت، شاچشت ءَ ابید تو ھمے زمین ءِ مردمے نہ وے تئی وانوک ھمے زمین ءِ مردم نہ انت اے راج کہ نہ بیت تئی ساچشت کجام درد ءِ درمان بیت، نوں باھد نبشتہ کاراں اے نگیگیں جاوراں گیش ءَ چہ گیش نبشتہ کتیں نوکیں لیکہ دیم ءَ بیاؤرتیں وتی مھلوک ءِ تب مٹ کتیں آیاناں چرے زوراکیں وھد ءِ تہ ءَ آیانی رھشونی کتیں دنیا ءِ ھمک ڈیھانی نبشتہ کاراں بوان آ الم وتی ڈیھہ ءُ ملک، وتی زیبائی وتی گژنگی وتی بزگی آیاں نبشتہ کتگ انت مئے باری کہ بیت گش انت ما ساچشت کار انت ما ھوالکار نہ انت اڈے گڑا کے کیت نبشتہ کنت دگہ گیبی مھلوک و نئیت پہ شما کنت۔
مستریں چیز شعور ءِ کمی انت بلوچ وتا بلوچ گش ایت بلے بلوچ بوھگ ءِ ھک ءَ اد ءَ کنگ ءَ نہ انت نوں من کایاں چاگردی رسانکدر ءِ نیمگ ءَ اود ءَ چے کنگ ءَ انت ما چاگردی رسانکدر کارمرز کنگ ءَ انت بلے آئی کارمرز کنگ ءَ نہ زانگ ءَ انت چش کہ آ دگہ مھلوک کارمرز ءَ انت آ وڑ ما کت کنگ ءَ نہ انت چش کہ پہ درور سندھ ءَ اُشترے ءِ ٹانگ پروشگ بوت سرجمیں چاگردی رسانکدر ءَ اے ھال بڑّ ءَ بوت دانکہ دبئی ءَ چہ ھمے اُشتر ءَ وتساچیں ٹانگے دیم دیگ بوت منی گشگ ءِ متلب اِش انت تو چاگردی رسانکدر ءِ کامرزی ءَ بزاں چون کارمرز کنگی انت وتی راجی نپانی ھاترا ترا کارمرز کنگی انت، یک برے پد ءَ گشاں سوشل میڈیا ءِ کارمرز کنگ ءَ بزان ات چش کہ امران ھان زی ءِ ٹولی ءَ بچار آیاں چنچو پیج جوڑ کتگ ءُ چنچو لک آیانی شیئر کنوک انت وھدے کہ ماھرنگ اسلام آباد ءَ شت سوشل میڈیا ءَ کہ اے توار برز شت مستریں سپورٹ ھمے امران ھان ءِ ٹولی ات کسے من اِیت شر نہ من ایت تنیگا برو ھمیشانی پیجاں بچار ھرچیز دست کپ انت، مئے یک ءُ دو پیج ھست انت اود ءَ آیانی کار ھمیش جنکانی چمانی اکساں پیشدار شرنگیں جنکانی تامراں ابید ترا ھچ دست نہ کپ ایت یک پیجے کہ نام ءِ “زیبـــائی” انت ایشی ءَ سرچ کن ات بچار ات ابید شرنگیں جنکاں دگہ ھچ نیست اے مئے کار انت واجہ دگہ یکے “balochi doch” ءِ نام ءِ سر ءَ پیجے ھست لکانی ھساب ءَ آئی پالور انت بلے ابید چکی اکس ءَ دگہ ھچ نیست چشیں ھزاراں بلوچانی پیج ھست انت آ رد کارمرز بوھگ ءَ انت اے جنکانی ءُ دگہ انچیں بے سریں تامرانی شنگ کنگ ءِ چے نپ!!! اد ءَ من پوہ باں مئے تہ ءَ شعور ءِ کمی انت کساس ءَ چہ گیش اے وھد ءُ جاوراں ما وتی زمہ واریاں زانگ ءَ نہ انت باھد انت نوں پوہ بہ بنت چاگردی رسانکدر ءِ بستار ءَ بزان انت آئی جوان کامرز بہ کن انت وتی راجی نپانی ھاترا!!!!
