کوئٹہ ( ہمگام نیوز) بلوچ راجی زْرمبشت۔ بی این ایم ءَ پاکستان ءِ جوڑ بیگ ءِ روچ چاردہ اگست سیاھیں روچ لیک اتگ ءُ اے روچ ءَ پنتاک بھر کنگ ءِ پجیگ ءَ دیوال نبیسی باوست (کمپئن) ءِ ھم جار پرینتگ۔چہ بی این ایم ءِ نیمگ ءَ شنگ بیتگیں جار ءِ تہ ءَ پہ دیوال نبیسی ءَ اوگام (نعرہ) ھم گْوشگ بیتگ اَنت ءُ باسکاں رنگ جوڑ کنگ ءُ دیوال نبیسی ءِ بارہ ءَ سوج ھم دیگ بیتگ۔
جار ءَ گْوشگ بیتگ چاردہ اگست ھما شومیں روچ اِنت کہ اے روچ ءَ انگریزاں پہ وتی جھانداری ءِ لوٹاں ھندوستان دوگپڑ ءَ کرت ءُ نیمگے پاکستان نامیں وتساچ ڈیھے جوڑ کرت۔ ھمے ڈیھ ءَ رند ءَ 27 مارچ 1948 ءَ بلوچستان ءِ سر ءَ ارش کرت ءُ چہ بلوچاں آیانی آجوئی پل اِت۔
بی این ایم ءِ رد ءَ پاکستان 14 اگست ءَ ماں جھان ءَ وتی آجوئی ءِ روچ ءَ دار ایت ما بلوچ اے روچ ءَ سیاھیں روچے سرپد بہ ایں پمیشکا 14 اگست ءَ چہ بی این ایم ءِ نیمگءَ سیاھیں روچ دارگ ءِ جار جنگ بیتگ ، اے درگت ءَ پنتاک شنگ کنگ ءِ پجیگ ءَ دیوال نبیسی ھم کنگ بیت۔
بی این ایم ءِ نیمگ ءَ درسیں باسک ءُ دوزواہ گْوشگ بیتگ اَنت کہ آ وتی گیگ ءَ بہ چار اَنت ءُ اے روچ ءَ گل ءِ نام ءَ چاکنگ بہ کن اَنت۔
چہ بی این ایم ءِ نیمگ ءَ دیوالانی سر ءَ بلوچی ءُ براھوئی زبان ءَ چاکنگ کنگ بیت۔چہ بنجاھی تک ءَ ھپت چاکنگ ءِ اوگام شنگ کنگ بیتگ۔ چاردہ اگست سیاھیں روچ پہ بلوچاں شومیں روچ، مئے ھمک درد ءِ درمان آجوئی اِنت۔ناں آپ، ناں لین ، ناں دگ ءُ نادْراھجاہ ما چہ پاکستان ءَ آجوئی لوٹ ایں، پہ بلوچان ءُ پہ جھان ءَ سیاھیں روچ ، شومیں روچ ، چاردہ اگست اِنت۔چاردہ اگست جھان ءِ شومیانی بن اِنت ءُ ماں انگریزی ءَ 14August is black day for Baloch nation.
«بی این ایم ءِ سرجمیں جارتاک»
بی این ایم ءِ چاردہ اگست ءِ درگت ءَ دیوال نبیسی باوست (14 اگست چاکنگ کمپئن) ءُ سر ءُ سوج
14 اگست ھما شومیں روچ اِنت کہ اے روچ ءَ انگریزاں پہ وتی جھانداری ءِ لوٹاں ھندوستان دوگپڑ ءَ کرت ءُ نیمگے پاکستان نامیں وتساچ ڈیھے جوڑ کرت۔ ھمے ڈیھ ءَ رند ءَ 27 مارچ 1948 ءَ بلوچستان ءِ سر ءَ ارش کرت ءُ چہ بلوچاں آیانی آجوئی پل اِت۔
پاکستان 14 اگست ءَ ماں جھان ءَ وتی آجوئی ءِ روچ ءَ دار ایت ما بلوچ اے روچ ءَ سیاھیں روچے سرپد بہ ایں پمیشکا 14 اگست ءَ چہ بی این ایم ءِ نیمگءَ سیاھیں روچ دارگ ءِ جار جنگ بیتگ ، اے درگت ءَ پنتاک شنگ کنگ ءِ پجیگ ءَ دیوال نبیسی ھم کنگ بیت۔
باسک ءُ دوزواہ وتی میتگ، شھر ءُ دمگاں جھل ءِ اوگاماں دیوال نبیسی بہ کن اِت۔ دیوال نبیسی بلوچستان ءِ ھند ءُ دمگاں بلوچی ءُ براھوئی زبان ءَ کنگ بیت ءُ جاھے جاھے مزنیں شھدگانی سر ءَ انگریزی ءَ ھم نبیسگ بیت۔
دیوال نبیسی اوگام:
1۔ 14 اگست سیاھیں روچ۔۔۔ پہ بلوچاں شومیں روچ ، بی این ایم | مئے ھمک درد ءِ درمان آجوئی اِنت۔ بی این ایم | 14August is black day for Baloch nation.bnm| ناں آپ ، ناں لین ، ناں دگ ءُ نادْراھجاہ ما چہ پاکستان ءَ آجوئی لوٹ ایں۔ بی این ایم | پہ بلوچان ءُ پہ جھان ءَ ، سیاھیں روچ ، شومیں روچ ، چاردہ اگست اِنت ۔ بی این ایم | چاردہ اگست جھان ءِ شومیانی بن اِنت۔ بی این ایم
پہ دیوال نبیسی ءَ سوج
پہ چاکنگ ءَ وش نبیسی المی اِنت ، چاکنگ انچوش کنگ بہ بیت کہ مردمانی چماں زیبا ءُ واناک بہ بیت۔
رنگ ءِ کارمردی
چوشیں جاھے کہ آ اود ءَ ماندگاریں چاکنگے کنگی اِنت ، انچیں دانک ءُ اوگامے نبیسگی اِنت کہ آ مدام پہ مردمانی سکین ءَ نوک بہ بیت گڑا پھتوئیں رنگ کارمرد کنگ بیت ، چوش کہ آئل پینٹ ، اسپرے ءُ ۔۔۔۔ بلے اگاں باوستی دیوال نبیسی کنگی اِنت گڑا انچیں رنگ کارمرد کنگ بہ بیت کہ آ ماہ ءُ دو ماہ ءِ تہ ءَ بہ لڑ اَنت داں دومی گشت ءَ چاکنگ ءَ جاہ بہ بیت۔
رنگ ءِ جوڑ کنگ
سھریں رنگ : چاکنگ ءِ رنگ وڑ وڑ ءَ جوڑ کنگ بیت۔ بی این ایم ءِ گیشتریں چاکنگ سھریں رنگاں بہ اَنت کہ آشوب ءِ رنگ اِنت۔پہ باوستی چاکنگ ءَ سھریں رنگ گوں گلک ءَ جوڑ کنگ بیت ۔ گلک کیمیکلے کہ داراں جن اَنت ئِے داں داراں کوگ مہ وارت، شھر ءُ بازاراں آسانی ءَ بھا ءَ رس ایت۔ نھاد ئِے ارزان اِنت ءُ نیم کیلو ءُ کیلویے گلک ءَ باز سھریں رنگ جوڑ بیت کہ مزنیں بازارے چاکنگ بوت کنت۔گلک ءَ گوں کچ ءُ کیل آپ مان کن اَنت چہ ایشی ءَ سھریں رنگے جوڑ بیت۔ پہ چاکنگ ءَ سنگت دستانہ دست ءَ بہ کن اَنت۔ پہ رنگ ءِ پھتو تر کنگ ءَ سسر (گْونجک ءُ کندرک ھم گْوشگ بیت کہ چہ درچکاں رس ایت ، بازار ءَ درمان بھا کنوکانی کر ءَ بھائی ھم ھست) ، شکر ءِ وٹ یا گوند یا اسپیتیں گلو (چہ ایشاں یکے ، ھما کہ آسانی ءَ ءُ ارزانی ءَ دست بہ کپ ایت)کہ دارانی لیچینگ ءَ کارمرد بیت ایشی ءَ ھم آپانی تہ ءَ مان کرت کن ئے۔ گلک چوناھیا ءَ ھم رنگ کنت بلے پھتوئیں رنگ ءِ جوڑ کنگ ءَ نام گپتگیں چیز ھوار گیجگ بہ اَنت ، بلے دلجم بہ بہ ئے کہ جوڑ بیتگیں رنگ سکا آپ یا سک بز مہ بیت ، پہ ایشی ءَ ایمنیں جاھے دیوال ءِ سر ءَ بہ چکاس۔رنگ ھمینچو جوڑ بہ کن اِت کہ کارمرد بوت بہ کنت۔
سیاھیں رنگ : بی این ایم ءِ چاکنگ گوں سھریں رنگ ءَ بہ اَنت کہ گوں گلک ءَ باز شریں وڑے ءَ جوڑ بیت۔بلے 14 اگست ءِ باوستی چاکنگ گوں سیاھیں رنگ ءَ بیت۔ پہ سیاھیں رنگ جوڑ کنگ ءَ اشکراں چوپ ، پہ اشکرانی رنگ ءِ پھتو کنگ ءَ سسر (گْونجک ءُ کندرک ھم گْوشگ بیت کہ چہ درچکاں رس ایت درمان بھا کنوکانی کر ءَ بھائی ھم رس ایت) یا شکر ءِ وٹ یا گوند یا اسپیتیں گلو (چہ ایشاں یکے ھما کہ آسانی ءُ ارزانی ءَ دست بہ کپ ایت) کہ دارانی لیچینگ ءَ کارمرد بیت ایشاں گوں آپاں ھوار کن ، شر مکس کن ءُ لھڑ بہ دئے۔دلجم بہ بہ ئے کہ رنگ سک بز مہ بیت ءُ سک تنک ھم مہ بیت۔ پہ ایشی ءَ ایمنی جاھے دیوال ءِ سر ءَ بہ چکاس (انچوش کہ سر بیت نی بہ چار کہ بز اِنت یا تنک ، پہ آمید کنگ ءَ آپاں یا کہ اشکراں گیش کن) ۔ رنگ ھمینچو جوڑ بہ کن اِت کہ کارمرد بوت بہ کنت۔
پہ چاکنگ ءَ برش
اگاں وتی جوڑ کرتگیں رنگاں کارمرد کنگ لوٹ اِت گڑا اسپنجی چنڈے بہ زیر اِت ءُ ھمیشی ءَ رنگاں بہ میسین اِت ءُ نبشتہ بہ کن اِت۔ اگاں اسپنج دست نہ کپت گڑا پشتکی گدے بہ زیر اِت تل ماں تل کن اِت ءُ گوں انچیں دارے ءَ کہ دست ءَ دارگ ئِے وش بہ بیت بہ پتا اِت۔اے رنگیں دو دانگ جوڑ بہ کن اِت اگاں یکے چاکنگ ءَ ھراب بوت گڑا دومی ءَ کارمرد کرت بہ کن اِت۔وتی جوڑ کرتگیں برش ءَ ایمنیں جاھے بہ چکاس اِت۔
اوگامانی گچین
ھما دانک ءُ گپ کہ دیوال ءَ نبیسگی اَنت آیاں پیش ءَ کاگدے ءَ سر ءَ نبیس یا زھن ءَ شر شر ءَ یاداشت کن۔ نبشتگیں دانکانی ’سیاھگ ءُ بنرھبند‘ ءِ ھیالداری کنگی اِنت داں وانوک شری ءَ سرپد بیت بہ کن اَنت۔ چہ بنجاہ ءِ نیمگ ءَ دیگ بیتگیں اوگامانی سیاھگ ءُ بنرھبند شر چارگ بہ اَنت پمیشکا آیانی نبیسگ جْوان اِنت ، اے پمیشکا ھم المی اِنت داں سرجمیں بلوچستان ءَ یک پیم ءَ چاکنگ بوت بہ کنت۔ ھما سنگت کہ وانگ ءُ نبیسگ ءَ بلد نہ اِنت آ چاکنگ مہ کنت۔
جاہ ءِ گچین
شر ءُ پلگاریں دیوال کہ دگ ءُ راھانی سر ءَ اَنت ، اندیم نہ اَنت۔ آیانی سر ءَ جْوانے ءَ چاکنگ بوت کنت۔اگاں جاہ کسان اِنت کسانیں گپے بہ نبیس اگاں مزن اِنت گڑا مزنیں گپے بہ نبیس۔مردم، اسکول ، دکان ءُ نادراھجاہ ۔۔۔۔ چوناھیں ھم جاھے بہ بیت دروازگ ءُ دریگانی سر ءَ چاکنگ کنگ شر نہ اِنت۔جاھے کسے ءَ اگاں وتی دیوال کاشیگ (ٹائل) جتگ ، یا زیبائیں ڈرائنگے جوڑ کرتگ یا انچیں چیزے کہ پہ ڈوالداری جوڑ کنگ بیتگ آئی ءِ سر ءَ چاکنگ مہ کن اِت۔
چاکنگ ءِ زیبائی
پہ چاکنگ ءَ وش نبیسی المی اِنت۔چاکنگ ءَ ھمے پیم بہ کن اِت کہ وش نبیس ءُ واناک بہ بیت۔ چاکنگ ءَ کسے گند ایت آئی ءَ پہ چارگ ءُ وانگ ءَ دوست بہ بیت۔
وت ءَ پھریزگ
بی این ایم ءِ باسک بی این ایم ءِ تیوکیں مڈی اَنت۔ پمیشکا چہ چاکنگ ءَ پیش وتی جند ءَ بہ پھریز اِت۔پہ چاکنگ ءِ رنگ جوڑ کنگ ءَ المی ئیں چیزاں مدام وتی دست ءِ گْور ءَ ایر کن اِت۔ پہ رنگ ءِ زیرگ ءَ وتی نزیکیں شھر ءُ دکاناں مہ رو اِت۔ھما دکاناں کہ کیمرہ جتگ ھم روگ ءَ پھریز بہ کن اِت۔ گیشتر کوشست بہ کن اِت کہ وتی جوڑ کرتگیں رنگاں کارمرد بہ کن اِت۔پہ رنگانی مان کنگ ءَ یک کسانیں درپے بہ زیر ایت کہ چاکنگ کنوک ءِ دست ءَ بہ بیت ءُ دگہ کمو مسترینے کہ آئی ءِ تہءَ گیشتر رنگ مان بہ بیت آ ھمراہ ءَ گون بہ بیت۔ دگانی سر ءَ چاکنگ ءَ اگاں بوت کنت سئے کس پجیگ ءَ بہ رو اِت۔ یکے دوریں راھاں بہ چار ایت ءُ دگرے چاکنگ کنوک ءِ نزیک ءَ بہ اوشت ایت۔ انچوش چاکنگ بہ کن اِت کہ کس مہ گند ایت۔پاکستانی دلار ، پولیس ، لیویز، ایپ سی ءُ دگہ لشکری کارمنداں وت ءَ شر بہ پھریز اِت۔شپ ءَ چاکنگ بہ کن اِت ءُ وتی دیم ءَ بہ گر اِت۔دستانگ دست ءَ کنگ مہ شموش اِت۔گشادی ءَ نبشتہ بہ کن اِت ءُ زیت وتی جاہ ءَ مٹ بہ کن اِت۔اگاں سما بوت کہ کسے ءَ شمارا دیستگ یا کسے ءِ چماں کپگ ءِ وڑ اِنت گڑا وتی رنگ ، دستانہ ءُ برش ءَ جاھے ایر بہ کن اِت ءُ وت ءَ اندیم بہ کن اِت۔
*
بی این یم وتی درسیں باسک ءُ دوزواھاں کڈن کنت کہ ھرچ کج ءَ شما نشتگ اِت ، وتی گیگ ءُ گْوم ءَ بہ چار اِت ءُ چاردہ اگست ءِ روچ ءَ چہ گل ءِ نام ءَ چاکنگ بہ کن اِت۔
