سیلاب زدگان کے لئے تیسری امدادی کھیپ روانہ ، سیلاب متاثرین کو تنہا نہیں چھوڑیں گے، آمنہ بلوچ

کراچی( ہمگام نیوز) ویب ڈیسک کی رپورٹ کے مطابق بلوچ یکجہتی کمیٹی کراچی نے پیر کی رات بلوچستان کے سیلاب زدگان کے لئے تیسری امدادی کھیپ روانہ کردی ۔ یہ امدادی کھیپ چار ٹرکوں کے ذریعے ضلع لسبیلہ کے مختلف علاقوں میں پہنچائی جارہی ہے۔ امدادی کھیپ میں کمبل، کپڑے، لحاف، گھی، چاول، دال، چینی، سمیت دیگر اشیا شامل ہیں۔ بلوچ یکجہتی کمیٹی کراچی کے رضا کار گزشتہ کئی دنوں سے سیلاب سے متاثرین کی بحالی کے لئے دن و رات کام کرکے ، ضلع لسبیلہ میں امدادی سامان تقسیم کرنے میں مصروف تھے ۔ بلوچ یکجہتی کمیٹی کراچی کی آرگنائزر آمنہ بلوچ نے بلوچستان حکومت پر شدید تنقید کرتے ہوئے کہا کہ حکومت کی جانب سے سیلاب زدگان کو بے یار و مدد گار چھوڑدیا گیا ہے ۔ ان کی بحالی کے لئے سرکاری سطح پر کوئی بھی اقدامات نہیں اٹھائے جارہے ہیں۔ وزرا محض فوٹو سیشن میں مصروف ہیں۔ آمنہ بلوچ نے کہا کہ جاری طوفانی بارشوں نے بلوچستان میں تباہی مچادی ہے۔ اور اس مشکل وقت میں متاثرین کا ساتھ نہیں چھوڑیں گے۔ ان کی مدد کے لئے ہر ممکن کوشیش کرینگے۔ انھوں نے بلوچ مخیر حضرات کو بلوچستان میں سیلاب زدگان کی مدد کی اپیل کرتے ہوئے کہا کہ وہ زیادہ سے زیادہ امدادی عمل کا حصہ بنیں اور تاکہ اس مشکل گھڑی میں ان کے دکھ درد میں شامل ہوسکیں۔ انہوں نے حکومت پر زور دیتے ہوئے کہا کہ اس وقت حکومت کی یہ ذمہ داری بنتی ہے کہ وہ سیلاب زدگان کی بھرپور مدد کریں۔