فورسز کے آپریشن میں 4 افراد نے خود کو دھماکے سے اڑا لیا.
کوئٹہ( ہمگام نیوز )لورالائی میں پاکستانی سیکیورٹی فورسز کے آپریشن کے دوران مکان میں موجود 4 افراد نے خود کو دھماکے سے اڑا لیا جب کہ فائرنگ کے تبادلے میں 4 سیکیورٹی اہلکار بھی زخمی ہوگئے.
سیکریٹری داخلہ بلوچستان کے مطابق سیکیورٹی فورسز نے لورالائی کے علاقے ناصر آباد میں ایک مکان میں دہشت گردوں کی موجودگی کی اطلاع پر سرچ آپریشن کیا تو اس دوران فورسز اور دہشت گردوں کے درمیان فائرنگ کا تبادلہ ہوا.
سیکریٹری داخلہ نے بتایا کہ فائرنگ کے تبادلے کے بعد مکان میں موجود چاروں دہشت گردوں نے خود کو دھماکا خیز مواد سے اڑا لیا.
اے ایس پی لورالائی کے مطابق خود کو دھماکے سے اڑانے والوں میں ایک خاتون بھی شامل ہے، دھماکے سے ساتھ واقع گھر کی دیواریں گر گئیں جس کے ملبے تلے دب کر 4 افراد زخمی ہوگئے.
اے ایس پی نے بتایا کہ آپریشن میں سی ٹی ڈی اور پولیس اہلکاروں نے بھی حصہ لیا جب کہ فائرنگ کے تبادلے میں سیکیورٹی فورسز کے 4 اہلکار زخمی ہوگئے جنہیں فوری طبی امداد کے لیے اسپتال منتقل کردیا گیا۔
پولیس حکام کے مطابق علاقے میں آپریشن مکمل کرلیا گیا.
